Airteagal 60 Dualgais na sealbhóirí sonraí sláinte

1.   Déanfaidh sealbhóirí sonraí sláinte sonraí leictreonacha sláinte ábhartha dá dtagraítear in Airteagal 51 a chur ar fáil arna iarraidh sin don chomhlacht rochtana sonraí sláinte, i gcomhréir le cead sonraí arna eisiúint de bhun Airteagal 68, nó ar iarraidh ar shonraí sláinte arna formheas de bhun Airteagal 69.

2.   Cuirfidh na sealbhóirí sonraí sláinte na sonraí leictreonacha sláinte arna n-iarraidh dá dtagraítear i mír 1 ar fáil don chomhlacht rochtana sonraí sláinte laistigh de thréimhse ama réasúnta agus nach déanaí ná trí mhí ón iarraidh ón gcomhlacht rochtana sonraí sláinte a fháil. I gcásanna a bhfuil údar cuí leo, féadfaidh an comhlacht rochtana sonraí sláinte síneadh suas le trí mhí ar a mhéad a chur leis an tréimhse sin.

3.   I gcomhréir le hAirteagal 77, déanfaidh an sealbhóir sonraí sláinte tuairisc ar an tacar sonraí atá ina sheilbh a chur in iúl don chomhlacht rochtana sonraí sláinte. Seiceálfaidh an sealbhóir sonraí sláinte, ar bhonn bliantúil ar a laghad, go bhfuil an tuairisc ar a thacar sonraí sa chatalóg náisiúnta tacair sonraí cruinn agus cothrom le dáta.

4.   I gcás ina ngabhann lipéad cáilíochta agus áirgiúlachta sonraí leis an tacar sonraí de bhun Airteagal 78, soláthróidh an sealbhóir sonraí sláinte doiciméadacht leordhóthanach don chomhlacht rochtana sonraí sláinte ionas go ndéanfaidh an comhlacht sin cruinneas an lipéid a fhíorú.

5.   Áiritheoidh sealbhóirí sonraí sláinte ar shonraí leictreonacha neamhphearsanta sláinte rochtain ar shonraí trí bhunachair sonraí oscailte iontaofa chun rochtain neamhshrianta a sholáthar do na húsáideoirí uile agus chun sonraí a stóráil agus a chaomhnú. Beidh rialachas láidir, trédhearcach agus inbhuanaithe i bhfeidhm ag bunachair sonraí oscailte iontaofa phoiblí chomh maith le múnla trédhearcach do rochtain úsáideora.