Artikolu 60 Dmirijiet tad-detenturi tad-data dwar is-saħħa

1.   Detenturi tad-data dwar is-saħħa għandhom jagħmlu d-data elettronika dwar is-saħħa msemmija fl-Artikolu 51disponibbli fuq talba lill-korp tal-aċċess għad-data dwar is-saħħa, f’konformità mal-permess tad-data maħruġ skont l-Artikolu 68, jew fuq talba għal data dwar is-saħħa approvata skont l-Artikolu 69.

2.   Id-detenturi tad-data dwar is-saħħa għandu jqiegħed id-data elettronika dwar is-saħħa mitluba għad-dispożizzjoni tal-korp tal-aċċess għad-data dwar is-saħħa fi żmien raġonevoli u mhux iktar tard minn tliet xhur minn meta jirċievi t-talba mill-korp tal-aċċess għad-data dwar is-saħħa. F’każijiet ġustifikati, il-korp tal-aċċess għad-data dwar is-saħħa jista’ jestendi dak il-perjodu sa massimu ta’ tliet xhur.

3.   Id-detentur tad-data dwar is-saħħa għandu jikkomunika lill-korp tal-aċċess għad-data dwar is-saħħa, deskrizzjoni tas-sett tad-data li jżomm f’konformità mal-Artikolu 77. Id-detentur tad-data dwar is-saħħa għandu, mill-inqas fuq bażi annwali, jivverifika li d-deskrizzjoni tas-sett tad-data tiegħu fil-katalgu tas-settijiet tad-data nazzjonali tkun preċiża u aġġornata.

4.   Meta tikketta tal-kwalità u tal-utilità tad-data takkumpanja s-sett tad-data skont l-Artikolu 78, id-detentur tad-data dwar is-saħħa għandu jipprovdi dokumentazzjoni suffiċjenti lill-korp tal-aċċess għad-data dwar is-saħħa biex dak il-korp jivverifika l-akkuratezza tat-tikketta.

5.   Id-detenturi tad-data dwar is-saħħa ta’ data elettronika mhux personali dwar is-saħħa għandhom jipprovdu l-aċċess għad-data permezz ta’ bażijiet tad-data miftuħa affidabbli biex jiġi żgurat aċċess mhux ristrett għall-utenti kollha u l-ħżin u l-preservazzjoni tad-data. Il-bażijiet ta’ data pubbliċi miftuħa affidabbli għandu jkollhom fis-seħħ governanza robusta, trasparenti u sostenibbli u mudell trasparenti ta’ aċċess għall-utenti.