Airteagal 17 Ceanglais maidir le lipéadú táirgí

1.   Beidh lipéad ag gabháil le glantaigh agus dromchlaghníomhaithe a chuirtear ar fáil ar an margadh i bpacáistíocht aonair nó trí athlíonadh.

2.   Maidir le hoibreoir eacnamaíoch a chuireann glantach nó dromchlaghníomhaí ar fáil ar an margadh go díreach d’úsáideoir deiridh trí athlíonadh, soláthróidh sé an lipéad fisiceach agus an t-iompróir sonraí dá dtagraítear in Airteagal 21(2), pointe (h) don úsáideoir deiridh, agus áiritheoidh sé go mbeidh an lipéad fisiceach agus an t-iompróir sonraí ar fáil le haghaidh gach pacáiste a athlíontar le glantach nó le dromchlaghníomhaí.

3.   Beidh an fhaisnéis a shonraítear i gCuid A d’Iarscríbhinn V ar lipéad glantach agus dromchlaghníomhaithe.

4.   I dteannta na faisnéise dá dtagraítear i mír 3, beidh faisnéis dáileoige i gcomhréir le Cuid B d’Iarscríbhinn V ar lipéad na nglantach níocháin tomhaltóra, na nglantach miasniteoirí uathoibríocha tomhaltóra agus na nglantach tomhaltóra le haghaidh dromchlaí.

5.   Beidh an fhaisnéis dá dtagraítear i mír 3 agus i mír 4 i dteanga amháin nó níos mó ar féidir le húsáideoirí deiridh a thuiscint go héasca, arna gcinneadh ag an mBallstát lena mbaineann, agus beidh sí soléite, soiléir, intuigthe agus intuisceana. Beidh an lipéad inrochtana chun críocha cigireachta áit a chuirtear an glantach nó an dromchlaghníomhaí ar fáil ar an margadh.