Artikolu 17 Rekwiżiti ġenerali tat-tikkettar

1.   Id-deterġenti u l-aġenti tensjoattivi mqiegħda fis-suq f'imballaġġ individwali jew permezz ta' rikarika għandhom ikunu akkumpanjati minn tikketta.

2.   Operatur ekonomiku li jqiegħed deterġent jew aġent tensjoattiv fis-suq direttament lil utent finali permezz ta' rikarika għandu jipprovdi lill-utent finali t-tikketta fiżika u l-mezz ta' data msemmija fl-Artikolu 21(2), punt (h), u għandu jiżgura li t-tikketta fiżika u l-mezz ta' data jkunu disponibbli għal kull imballaġġ li jerġa' jimtela b'deterġent jew aġent tensjoattiv.

3.   It-tikketta tad-deterġenti u tal-aġenti tensjoattivi għandu jkun fiha l-informazzjoni speċifikata fil-Parti A tal-Anness V.

4.   Minbarra l-informazzjoni msemmija fil-paragrafu 3, it-tikketta tad-deterġenti tal-ħasil tal-ħwejjeġ għall-konsumatur, tad-deterġenti tal-magni tal-ħasil tal-platti awtomatiċi għall-konsumatur u tad-deterġenti għas-superfiċji tal-konsumatur għandu jkun fiha informazzjoni dwar id-dożaġġ f'konformità mal-Parti B tal-Anness V.

5.   L-informazzjoni msemmija fil-paragrafi 3 u 4 għandha tkun f'lingwa, waħda jew aktar, li tista' tinftiehem faċilment mill-utenti finali, kif determinat mill-Istat Membru kkonċernat, u għandha tkun leġġibbli, ċara, tinftiehem u intelliġibbli. It-tikketta għandha tkun aċċessibbli għal skopijiet ta' spezzjoni meta d-deterġent jew l-aġent tensjoattiv ikun mqiegħed fis-suq.