16. Feidhm iniúchóireachta inmheánaí

I gcás ina mbunaítear í, ba cheart don fheidhm iniúchóireachta inmheánaí (IAF) a bheith neamhspleách agus údarás, stádas agus acmhainní leordhóthanacha a bheith aici. Go háirithe, ba cheart d’eisitheoirí ARTanna a áirithiú go bhfuil cáiliú bhaill foirne IAF agus acmhainní IAF, go háirithe a uirlisí iniúchóireachta agus a mhodhanna anailíse riosca, leordhóthanach d’eisitheoir mhéid agus shuíomhanna ARTanna, agus do chineál, scála agus castacht na rioscaí a bhaineann le samhail ghnó, gníomhaíochtaí, cultúr riosca agus fonn riosca eisitheoir ARTanna.

Ba cheart do IAF a bheith neamhspleách ar na gníomhaíochtaí iniúchta. Dá bhrí sin, níor cheart IAF a chomhcheangal le feidhmeanna eile.

Ba cheart do IAF, agus cur chuige rioscabhunaithe á leanúint aige, athbhreithniú neamhspleách a dhéanamh agus dearbhú oibiachtúil a sholáthar maidir le comhlíonadh ghníomhaíochtaí agus aonaid uile eisitheora ARTanna, lena n-áirítear úsáid a bhaint as eintitis tríú páirtí, le beartais agus nósanna imeachta eisitheoir ARTanna agus le ceanglais rialála sheachtracha.

Níor cheart go mbeadh baint ag an IAF le beartais, sásraí, nósanna imeachta nó teorainneacha riosca sonracha maidir le rialú inmheánach a dhearadh, a roghnú, a bhunú nó a chur chun feidhme. Níor cheart, áfach, go gcuirfeadh sé sin cosc ar an gcomhlacht bainistíochta ina fheidhm bhainistíochta ionchur a iarraidh ó iniúchadh inmheánach maidir le hábhair a bhaineann le riosca, rialuithe inmheánacha agus comhlíonadh na rialacha is infheidhme.

Ba cheart do IAF measúnú a dhéanamh i dtaobh an bhfuil creat rialaithe inmheánaigh eisitheoir ARTanna mar a leagtar amach i dTeideal V éifeachtach agus éifeachtúil araon. Go háirithe, ba cheart do IAF measúnú a dhéanamh ar na nithe seo a leanas:

• a. oiriúnacht chreat rialachais eisitheoir ARTanna;
• b. cibé an bhfuil na beartais agus na nósanna imeachta atá ann cheana leordhóthanach i gcónaí agus an gcomhlíonann siad ceanglais dhlíthiúla agus rialála agus straitéis riosca agus fonn riosca eisitheoir ARTanna;
• c. comhlíonadh na nósanna imeachta leis na dlíthe agus na rialacháin is infheidhme agus le cinntí an chomhlachta bainistíochta;
• d. cibé an bhfuil na nósanna imeachta curtha chun feidhme i gceart agus go héifeachtach (e.g. comhlíonadh idirbheart, an leibhéal riosca a thabhaítear go héifeachtach, etc.); agus
• e. leordhóthanacht, cáilíocht agus éifeachtacht na rialuithe arna ndéanamh agus an tuairiscithe arna dhéanamh ag na haonaid ghnó (an chéad líne chosanta) agus na feidhmeanna bainistíochta riosca agus comhlíonta.

Ba cheart do IAF sláine na bpróiseas lena n-áirithítear iontaofacht mhodhanna agus theicnící an eisitheora ARTanna maidir le cainníochtú riosca, lena n-áirítear samhlacha, a fhíorú go háirithe. Ba cheart meastóireacht a dhéanamh ann freisin ar cháilíocht agus ar úsáid uirlisí cáilíochtúla um shainaithint agus um measúnú riosca agus ar na bearta maolaithe riosca a rinneadh.

Ba cheart do IAF athbhreithniú a dhéanamh ar leordhóthanacht na bpróiseas chun páipéir bhána a fhorbairt, ar a bhformheas agus ar na próisis maidir leis an gcaoi a dtairgtear ARTanna don phobal.

Ba cheart go mbeadh rochtain gan srian ag IAF ar fud an eisitheora ar thaifid, ar dhoiciméid, ar fhaisnéis agus ar fhoirgnimh uile eisitheoir ARTanna. Ba cheart go n-áireofaí leis sin rochtain ar chórais faisnéise bainistíochta agus miontuairiscí na gcoistí agus na gcomhlachtaí cinnteoireachta uile.

Ba cheart do IAF cloí le caighdeáin ghairmiúla náisiúnta agus idirnáisiúnta. Sampla de na caighdeáin ghairmiúla dá dtagraítear anseo is ea na caighdeáin arna mbunú ag Institiúid na nIniúchóirí Inmheánacha.

Ba cheart obair iniúchóireachta inmheánaí a dhéanamh go rialta i gcomhréir le plean iniúchóireachta agus le clár mionsonraithe iniúchóireachta de réir cur chuige rioscabhunaithe.

Ba cheart plean iniúchóireachta inmheánaí a chur i dtoll a chéile uair sa bhliain ar a laghad bunaithe ar chuspóirí rialaithe bliantúla na hiniúchóireachta inmheánaí. Ba cheart don chomhlacht bainistíochta an plean iniúchóireachta inmheánaigh a fhormheas.

Ba cheart na moltaí iniúchóireachta uile a bheith faoi réir nós imeachta leantach foirmiúil de réir na leibhéal iomchuí bainistíochta, ba cheart iad a chur in iúl do chomhlacht bainistíochta eisitheoir na ARTanna agus ba cheart iad a chur ar fáil don údarás inniúil chun a réiteach éifeachtach tráthúil a áirithiú agus chun tuairisciú ina leith.