4.1 Comaoin chomhréireachta

D’fhonn a áirithiú go mbeidh an fhaisnéis atá le soláthar i bplean téarnaimh, a formáid agus a hathbhreithniú ag údaráis inniúla comhsheasmhach leis an bpróifíl riosca aonair, le cineál agus samhail ghnó an eisitheora ARTanna nó EMTanna agus le scála agus castacht a ghníomhaíochtaí, ba cheart d’eisitheoirí agus d’údaráis inniúla aird a thabhairt ar phrionsabal na comhréireachta agus pleananna téarnaimh á dtarraingt suas nó á measúnú acu.

Chun an mhír roimhe seo a chur i bhfeidhm, ba cheart d’eisitheoirí agus d’údaráis inniúla na critéir uile seo a leanas a chur san áireamh:

• a. méid, castacht, cineál agus samhail ghnó an eisitheora;
• b. aicmiú an chomhartha sócmhainn-tagartha nó an chomhartha ríomh-airgid a eisítear mar chomhartha suntasach de bhun Airteagail 43 agus 44 agus Airteagail 56 agus 57 de Rialachán (AE) 2023/1114;
• c. i gcás eisitheoirí comharthaí sócmhainn-tagartha: méid, luaineacht, comhdhéanamh, comhchruinniú agus cineál na gcúlsócmhainní agus an chomhartha sócmhainn-tagartha féin;
• d. i gcás eisitheoirí comharthaí ríomh-airgid: méid, luaineacht, comhdhéanamh agus comhchruinniú na sócmhainní atá mar thaca do na cistí a fuarthas;
• e. tábhacht agus próifílí riosca soláthraithe seirbhísí cripteashócmhainní a úsáidtear chun na seirbhísí a bhaineann leis na comharthaí sócmhainn-tagartha nó leis na comharthaí ríomh-airgid eisithe ag an eisitheoir faoi seach a chur ar fáil;
• f. tábhacht agus próifílí riosca líonraí DLT a úsáideann an t-eisitheoir faoi seach chun comharthaí sócmhainn-tagartha nó comharthaí ríomh-airgid a eisiúint tríothu;
• g. próifíl riosca soláthraithe tríú páirtí seachas soláthraithe seirbhísí cripteashócmhainní agus líonraí DLT a sholáthraíonn seirbhís TFC shuntasach nó chriticiúil don eisitheoir faoi seach.

Chun prionsabal na comhréireachta a chur i bhfeidhm, ba cheart d’eisitheoirí comharthaí a aicmítear mar chomharthaí suntasacha na ceanglais a leagtar amach i mír 62 a chur i bhfeidhm ar bhonn bliantúil ar a laghad agus gach catagóir táscairí plean téarnaimh a leagtar síos i míreanna 29 agus 30 a áireamh ina bplean téarnaimh.