Airteagal 3 Údaráis réitigh agus aireachtaí inniúla a ainmniú

1.   Ainmneoidh gach Ballstát údarás réitigh amháin nó, go heisceachtúil, níos mó ná údarás réitigh amháin a bhfuil sé de chumhacht acu na huirlisí réitigh a chur i bhfeidhm agus na cumhachtaí réitigh a fheidhmiú.

2.   Is iad na bainc cheannais náisiúnta, na haireachtaí inniúla, na húdaráis riaracháin phoiblí nó údaráis a bhfuil cumhachtaí riaracháin phoiblí de chúram orthu a bheidh sna húdaráis réitigh.

3.   I gcás ina gcuirfear feidhmeanna eile, lena n-áirítear feidhmeanna maoirseachta, de chúram ar údarás réitigh, cuirfear socruithe struchtúracha leordhóthanacha i bhfeidhm chun coinbhleachtaí leasa a sheachaint idir na feidhmeanna arna gcur de chúram ar an údarás réitigh de bhun na Treorach seo agus na feidhmeanna maoirseachta nó na feidhmeanna eile, gan dochar don mhalartú faisnéise agus oibleagáidí comhair a cheanglaítear faoi mhír 6.

Áiritheoidh na Ballstáit go n-áiritheofar leis na socruithe sin neamhspleáchas oibríochtúil éifeachtach, lena n-áirítear go mbeidh baill foirne, línte tuairiscithe agus próisis chinnteoireachta ar leithligh ag an údarás réitigh le haghaidh na bhfeidhmeanna sin nach ionann iad agus aon fheidhm mhaoirseachta nó aon fheidhm eile atá acu.

4.   Leis na ceanglais a leagtar síos i mír 3, ní choiscfear:

5.   Glacfaidh na húdaráis réitigh rialacha inmheánacha agus poibleoidh siad iad chun coinbhleachtaí leasa a chosc i gcomhréir leis na ceanglais a leagtar amach i míreanna 3 agus 4, lena n-áirítear rialacha maidir le rúndacht ghairmiúil agus malartú faisnéise idir na réimsí feidhme difriúla.

6.   Éileoidh na Ballstáit go n-oibreoidh údaráis a bheidh ag feidhmiú na bhfeidhmeanna maoirseachta agus réitigh agus daoine a bheidh ag feidhmiú na bhfeidhmeanna sin ar a son i ndlúthchomhar lena chéile nuair a bheidh cinntí réitigh á n-ullmhú, á bpleanáil agus á gcur i bhfeidhm, i gcás inar eintitis ar leithligh iad an t-údarás réitigh agus an t-údarás maoirseachta araon agus i gcás ina gcuirtear na feidhmeanna i gcrích san eintiteas céanna.

7.   Ainmneoidh gach Ballstát aon aireacht amháin mar an aireacht inniúil faoin Treoir seo. I gcás inarb ábhartha, áiritheoidh na Ballstáit go gcuirfear sásra comhordúcháin iomchuí i bhfeidhm le haireachtaí eile lena mbaineann.

8.   I gcás nach ionann an t-údarás réitigh i mBallstát agus an aireacht inniúil, cuirfidh an t-údarás réitigh an aireacht inniúil ar an eolas faoi na cinntí a ghlactar de bhun na Treorach seo gan moill mhíchuí agus, mura leagtar síos a mhalairt sa dlí náisiúnta, ní chuirfidh sé chun feidhme aon chinneadh a mbeidh tionchar fioscach díreach aige gan formheas na haireachta inniúla sin a bheith faighte aige.

9.   I gcás ina n-ainmneoidh Ballstát níos mó ná údarás réitigh amháin, tabharfaidh sé fógra a bheidh réasúnaithe go hiomlán don Choimisiún agus do EIOPA faoin gcúis a ndearna sé é sin agus leithdháilfidh sé feidhmeanna agus freagrachtaí go soiléir idir na húdaráis sin, áiritheoidh sé go mbeidh comhordú leormhaith eatarthu agus ainmneoidh sé údarás aonair mar údarás teagmhála chun críoch comhair agus comhordaithe le húdaráis ábhartha na mBallstát eile.

10.   Cuirfidh na Ballstáit EIOPA ar an eolas faoin údarás náisiúnta nó faoi na húdaráis náisiúnta a ainmneofar mar údaráis réitigh agus, i gcás inarb ábhartha, faoin údarás teagmhála agus a gcuid feidhmeanna agus freagrachtaí sonracha. Foilseoidh EIOPA liosta de na húdaráis réitigh agus de na húdaráis teagmhála sin.

11.   Gan dochar d’Airteagal 67, féadfaidh na Ballstáit teorainn a chur le dliteanas an údaráis réitigh, an údaráis maoirseachta agus a bhfoirne faoi seach i gcomhréir leis an dlí náisiúnta maidir lena ngníomhartha agus lena neamhghníomhartha le linn dóibh a gcuid feidhmeanna faoin Treoir seo a chomhlíonadh.