Artikolu 7a Kont attiv

Meta kontroparti finanzjarja jew kontroparti mhux finanzjarja ssir soġġetta għall-obbligu li żżomm kont attiv skont l-ewwel subparagrafu, dik il-kontroparti finanzjarja jew kontroparti mhux finanzjarja għandha tinnotifika lill-AETS u lill-awtorità kompetenti rilevanti tagħha b’dan u għandha tistabbilixxi tali kont attiv fi żmien sitt xhur minn meta ssir soġġetta għal dak l-obbligu.

L-obbligu ta’ rappreżentanza msemmi fil-paragrafu 3, il-punt (d), ma għandux japplika għal kontropartijiet b’volum tal-ikklerjar nozzjonali pendenti ta’ inqas minn EUR 6 biljun fil-kuntratti tad-derivati msemmija fil-paragrafu 6.

Il-valutazzjoni tal-obbligu ta’ rappreżentanza msemmi fil-paragrafu 3, il-punt (d), għandu jkun ibbażat fuq is-sottokategoriji. Għal kull klassi ta’ kuntratti tad-derivati, l-għadd ta’ sottokategoriji għandu jirriżulta mill-kombinazzjoni tad-daqsijiet ta’ tranżazzjonijiet differenti u tal-firxiet ta’ maturità differenti.

Ir-rekwiżiti msemmija fil-paragrafu 3, il-punti (a), (b) u (c), għandhom jiġu ssodisfati mill-kontroparti fi żmien sitt xhur minn meta ssir soġġetta għall-obbligu stabbilit fil-paragrafu 1 ta’ dan l-Artikolu u dik il-kontroparti għandha tirrapporta regolarment f’konformità mal-Artikolu 7b. Ir-rekwiżiti għandhom jiġu ttestjati għall-istress regolarment mill-inqas darba fis-sena.

Għall-obbligu ta’ rappreżentanza msemmi fil-paragrafu 3, il-punt (d), li għandu jiġi ssodisfat, il-kontropartijiet għandhom jikklerjaw, fuq bażi medja annwali, mill-inqas ħames tranżazzjonijiet f’kull waħda mill-aktar sottokategoriji rilevanti għal kull klassi ta’ kuntratti tad-derivati u għal kull perjodu ta’ referenza definit f’konformità mal-paragrafu 8, it-tielet subparagrafu. Meta l-għadd ta’ tranżazzjonijiet li jirriżulta jaqbeż nofs it-tranżazzjonijiet totali ta’ dik il-kontroparti għat-12-il xahar preċedenti, l-obbligu ta’ rappreżentanza msemmi fil-paragrafu 3, il-punt (d), għandu jitqies issodisfat meta dik il-kontroparti tikklerja mill-inqas tranżazzjoni waħda f’kull waħda mill-aktar sottokategoriji rilevanti għal kull klassi ta’ kuntratti tad-derivati għal kull perjodu ta’ referenza.

L-obbligu ta’ rappreżentanza msemmi fil-paragrafu 3, il-punt (d), m’għandux japplika għall-provvista ta’ servizzi tal-ikklerjar tal-klijenti. Il-kalkolu tal-volum tal-ikklerjar nozzjonali pendenti ta’ kontroparti msemmija fil-paragrafu 8, ir-raba’ subparagrafu, m’għandux jinkludi l-attivitajiet tal-ikklerjar tal-klijenti tagħha.

Sabiex tiġi emendata l-lista ta’ kuntratti soġġetti għal obbligi ta’ kont attiv, l-AETS, wara li tikkonsulta mal-BERS u bi qbil mal-banek ċentrali tal-ħruġ, għandha tippreżenta lill-Kummissjoni analiżi bir-reqqa u komprensiva tal-ispejjeż imqabbla mal-benefiċċji, f’konformità mal-valutazzjoni teknika kwantitattiva speċifikata fl-Artikolu 25(2c), l-ewwel subparagrafu, il-punt (c), kif rilevanti, inklużi l-effetti fuq muniti oħra tal-Unjoni, u tivvaluta l-effetti possibbli tal-estensjoni tal-obbligi tal-kont attiv għat-tipi ġodda ta’ kuntratti, u opinjoni b’rabta ma’ din il-valutazzjoni. Il-ftehim tal-banek ċentrali tal-ħruġ għandu jirrelata biss mal-kuntratti denominati fil-munita li joħorġu.

Meta l-AETS twettaq il-valutazzjoni u toħroġ opinjoni li tikkonkludi li jenħtieġ li tiġi emendata l-lista ta’ kuntratti, il-Kummissjoni għandha s-setgħa li tadotta att delegat f’konformità mal-Artikolu 82 biex temenda l-lista ta’ kuntratti tad-derivati skont l-ewwel subparagrafu ta’ dan il-paragrafu.

Fir-rigward tal-obbligu ta’ rappreżentanza msemmi fil-paragrafu 3, il-punt (d), l-AETS għandha tispeċifika l-klassijiet differenti ta’ kuntratti tad-derivati, soġġetti għal limitu ta’ tliet klassijiet, il-firxiet ta’ maturità differenti, soġġetti għal limitu ta’ erba’ firxiet ta’ maturità, u l-firxiet differenti tad-daqs tat-tranżazzjonijiet, soġġetti għal limitu ta’ tliet firxiet ta’ daqsijiet tat-tranżazzjonijiet, biex tiġi żgurata r-rappreżentattività tal-kuntratti tad-derivati li għandhom jiġu kklerjati permezz tal-kontijiet attivi.

L-AETS għandha tistabbilixxi l-għadd, li ma għandux ikun ogħla minn ħamsa, tal-aktar sottokategoriji rilevanti għal kull klassi ta’ kuntratti tad-derivati li għandhom jiġu rappreżentati fil-kont attiv. Is-sottokategoriji l-aktar rilevanti għandhom ikunu dawk li fihom l-ogħla għadd ta’ tranżazzjonijiet matul il-perjodu ta’ referenza.

L-AETS għandha tistabbilixxi wkoll id-durata tal-perjodu ta’ referenza, li ma għandux ikun inqas minn sitt xhur għal kontropartijiet b’volum tal-ikklerjar nozzjonali pendenti ta’ inqas minn EUR 100 biljun fil-kuntratti tad-derivati msemmija fil-paragrafu 6 u mhux inqas minn xahar għall-kontropartijiet b’volum tal-ikklerjar nozzjonali pendenti ta’ aktar minn EUR 100 biljun fil-kuntratti tad-derivati msemmija fil-paragrafu 6.

L-AETS għandha tippreżenta l-abbozzi ta’ standards tekniċi regolatorji msemmija fl-ewwel subparagrafu lill-Kummissjoni sal-25 ta’ Ġunju 2025.

Il-Kummissjoni tingħata s-setgħa li tissupplimenta dan ir-Regolament billi tadotta l-istandards tekniċi regolatorji msemmija fl-ewwel subparagrafu ta’ dan il-paragrafu skont l-Artikoli 10 sa 14 tar-Regolament (UE) Nru 1095/2010.

Mingħajr preġudizzju għad-dritt tal-Istati Membri li jipprevedu u jimponu penali kriminali, meta jinstab li kontroparti finanzjarja jew mhux finanzjarja tkun qed tikser l-obbligi tagħha skont dan l-Artikolu, l-awtorità kompetenti tagħha għandha, permezz ta’ deċiżjoni, timponi penali amministrattivi jew pagamenti perjodiċi ta’ penali, jew titlob lill-awtoritajiet ġudizzjarji kompetenti jimponu penali jew pagamenti perjodiċi ta’ penali, sabiex iġġiegħel lil dik il-kontroparti ttemm il-ksur tagħha.

Il-pagament perjodiku ta’ penali msemmi fit-tieni subparagrafu għandu jkun effettiv u proporzjonat u ma jaqbiżx massimu ta’ 3 % tal-fatturat medju ta’ kuljum fis-sena kummerċjali preċedenti. Dan għandu jiġi impost għal kull jum ta’ inadempjenza, u jiġi kkalkolat mid-data stipulata fid-deċiżjoni li timponi l-pagament perjodiku ta’ penali.

Il-pagament perjodiku ta’ penali msemmi fit-tieni subparagrafu għandu jiġi impost għal perjodu massimu ta’ sitt xhur wara n-notifika tad-deċiżjoni tal-awtorità kompetenti. Wara t-tmiem ta’ dak il-perjodu, l-awtorità kompetenti għandha tirrieżamina l-miżura u testendiha jekk ikun meħtieġ.

L-AETS għandha takkumpanja l-valutazzjoni msemmija fl-ewwel subparagrafu b’rapport lill-Parlament Ewropew, lill-Kunsill u lill-Kummissjoni, li jinkludi valutazzjoni tal-impatt motivata bis-sħiħ dwar miżuri komplementari, inklużi limiti kwantitattivi.

Minkejja l-ewwel subparagrafu, l-AETS għandha tippreżenta l-valutazzjoni u r-rakkomandazzjonijiet tagħha fi kwalunkwe ħin wara li tirċievi notifika formali mill-Mekkaniżmu Konġunt ta’ Monitoraġġ, li tindika l-materjalizzazzjoni probabbli tar-riskji għall-istabbiltà finanzjarja għall-Unjoni b’riżultat ta’ ċirkostanzi speċifiċi li jiskattaw avveniment b’implikazzjonijiet sistemiċi.

Fi żmien sitt xhur minn meta tirċievi r-rapport tal-AETS msemmi fit-tieni subparagrafu, il-Kummissjoni għandha tħejji r-rapport tagħha li jista’ jkun akkumpanjat, meta jkun il-każ, minn proposta leġiżlattiva.