Airteagal 7a Cuntas gníomhach

I gcás ina dtagann contrapháirtí airgeadais nó contrapháirtí neamhairgeadais faoi réir na hoibleagáide cuntas gníomhach a shealbhú i gcomhréir leis an gcéad fhomhír, tabharfaidh an contrapháirtí airgeadais nó an contrapháirtí neamhairgeadais sin fógra faoi do ESMA agus dá údarás inniúil ábhartha agus bunóidh sé cuntas gníomhach den sórt sin laistigh de 6 mhí ón uair a bheidh sé faoi réir na hoibleagáide sin.

Ní bheidh feidhm ag an oibleagáid ionadaíochais dá dtagraítear i mír 3, pointe (d), maidir le contrapháirtithe ag a bhfuil méid barúlach imréitigh gan íoc atá níos lú ná EUR 6 bhilliún sna conarthaí díorthach dá dtagraítear i mír 6.

Is ar fhochatagóirí a bhunófar an measúnú ar an oibleagáid ionadaíochais dá dtagraítear i mír 3, pointe (d). I gcás gach aicme conarthaí díorthach, is toradh ar theaglaim de mhéideanna éagsúla na dtrádálacha agus de na raonta aibíochta a bheidh i líon na bhfochatagóirí.

Comhlíonfaidh an contrapháirtí na ceanglais dá dtagraítear i mír 3, pointí (a), (b) agus (c), laistigh de 6 mhí ón uair a thiocfaidh sé faoi réir na hoibleagáide a leagtar amach i mír 1 den Airteagal seo agus tuairisceoidh an contrapháirtí sin go tráthrialta i gcomhréir le hAirteagal 7b. Déanfar tástáil struis go tráthrialta ar na ceanglais uair amháin sa bhliain ar a laghad.

Chun go gcomhlíonfar an oibleagáid ionadaíochais dá dtagraítear i mír 3, pointe (d), déanfaidh na contrapháirtithe cúig thrádáil ar a laghad a imréiteach, ar bhonn meán bliantúil, i ngach ceann de na fochatagóirí is ábhartha de réir aicme conarthaí díorthach agus in aghaidh na tréimhse tagartha a shainítear i gcomhréir le mír 8, an tríú fomhír. I gcás inar mó líon na dtrádálacha dá thoradh sin ná leath na dtrádálacha iomlána a bhí ag an gcontrapháirtí sin don 12 mhí roimhe sin, measfar an oibleagáid ionadaíochais dá dtagraítear i mír 3, pointe (d), a bheith comhlíonta i gcás ina n-imréitíonn an contrapháirtí sin trádáil amháin ar a laghad i ngach ceann de na fochatagóirí is ábhartha in aghaidh na haicme conarthaí díorthach in aghaidh na tréimhse tagartha.

Ní bheidh feidhm ag an oibleagáid ionadaíochais dá dtagraítear i mír 3, pointe (d), maidir le seirbhísí imréitigh cliant a sholáthar. Agus méid barúlach imréitigh contrapháirtí gan íoc dá dtagraítear i mír 8, an ceathrú fomhír, á ríomh, ní áireofar a ghníomhaíochtaí imréitigh cliant.

Chun liosta na gconarthaí atá faoi réir oibleagáidí cuntais ghníomhaigh a leasú, cuirfidh ESMA faoi bhráid an Choimisiúin, tar éis dó dul i gcomhairle le BERS agus le comhaontú ó na bainc cheannais eisiúna, anailís chríochnúil agus chuimsitheach costais is tairbhe, i gcomhréir leis an measúnú teicniúil cainníochtúil a shonraítear in Airteagal 25(2c), an chéad fhomhír, pointe (c), de réir mar is ábhartha, lena n-áirítear éifeachtaí ar airgeadraí eile de chuid an Aontais, agus ina ndéantar measúnú ar na héifeachtaí a d’fhéadfadh a bheith ag na hoibleagáidí cuntais ghníomhaigh a leathnú chuig na cineálacha nua conarthaí, agus tuairim i dtaca leis an measúnú sin. Ní bhainfidh comhaontú na mbanc ceannais eisiúna ach leis na conarthaí atá ainmnithe san airgeadra a eisíonn siad.

I gcás ina ndéanann ESMA an measúnú agus ina n-eisíonn sé tuairim ina gcinntear gur cheart liosta na gconarthaí a leasú, tugtar de chumhacht don Choimisiún gníomh tarmligthe a ghlacadh i gcomhréir le hAirteagal 82 chun liosta na gconarthaí díorthach faoin gcéad fhomhír den mhír seo a leasú.

Maidir leis an oibleagáid ionadaíochais dá dtagraítear i mír 3, pointe (d), sonróidh ESMA na haicmí éagsúla conarthaí díorthach, faoi réir teorainn trí aicme, na raonta aibíochta éagsúla, faoi réir teorainn ceithre raon aibíochta, agus na raonta éagsúla méide trádála, faoi réir teorainn trí raon méide trádála, chun ionadaíochas na gconarthaí díorthach atá le himréiteach trí na cuntais ghníomhacha a áirithiú.

Socróidh ESMA líon na bhfochatagóirí is ábhartha in aghaidh na haicme conarthaí díorthach, nach mbeidh níos airde ná 5 cinn, atá le léiriú sa chuntas gníomhach. Is iad a bheidh sna fochatagóirí is ábhartha na fochatagóirí sin ina bhfuil an líon is airde trádálacha le linn na tréimhse tagartha.

Socróidh ESMA freisin fad na tréimhse tagartha, nach mbeidh níos lú ná 6 mhí i gcás contrapháirtithe ag a bhfuil méid barúlach imréitigh gan íoc atá níos lú ná EUR 100 billiún sna conarthaí díorthach dá dtagraítear i mír 6 agus nach lú ná mí amháin i gcás contrapháirtithe a bhfuil méid barúlach imréitigh gan íoc atá níos mó ná EUR 100 billiún acu sna conarthaí díorthach dá dtagraítear i mír 6.

Cuirfidh ESMA na dréachtchaighdeáin theicniúla rialála dá dtagraítear sa chéad fhomhír faoi bhráid an Choimisiúin faoin 25 Meitheamh 2025.

Déantar an chumhacht a tharmligean chuig an gCoimisiún chun an Rialachán seo a fhorlíonadh trí na caighdeáin theicniúla rialála dá dtagraítear sa chéad fhomhír den mhír seo a ghlacadh i gcomhréir le hAirteagail 10 go 14 de Rialachán (AE) Uimh. 1095/2010.

Gan dochar do cheart na mBallstát foráil a dhéanamh maidir le pionóis agus pionóis a fhorchur, i gcás ina bhfaightear go bhfuil a oibleagáidí faoin Airteagal seo á sárú ag contrapháirtí airgeadais nó neamhairgeadais, déanfaidh a údarás inniúil, le cinneadh, pionóis riaracháin nó íocaíochtaí pionósacha tréimhsiúla a fhorchur, nó iarrfaidh sé ar údaráis bhreithiúnacha inniúla pionóis nó íocaíochtaí pionósacha tréimhsiúla a fhorchur, chun iallach a chur ar an gcontrapháirtí sin deireadh a chur lena shárú.

Beidh an íocaíocht phionósach thréimhsiúil dá dtagraítear sa dara fomhír éifeachtach agus comhréireach agus ní bheidh sí níos mó ná 3 % ar a mhéad den mheánláimhdeachas laethúil sa bhliain ghnó roimhe sin. Déanfar í a fhorchur ar gach lá moille, agus déanfar í a ríomh ón dáta a shonraítear sa chinneadh lena bhforchuirtear an íocaíocht phionósach thréimhsiúil.

Déanfar an íocaíocht phionósach thréimhsiúil dá dtagraítear sa dara fomhír a fhorchur ar feadh uastréimhse 6 mhí tar éis an fógra faoi chinneadh an údaráis inniúil a fháil. Tar éis dheireadh na tréimhse sin, déanfaidh an t-údarás inniúil athbhreithniú ar an mbeart agus cuirfidh sé síneadh leis más gá.

Cuirfidh ESMA tuarascáil chuig Parlaimint na hEorpa, chuig an gComhairle agus chuig an gCoimisiún i dteannta an mheasúnaithe dá dtagraítear sa chéad fhomhír, lena n-áirítear measúnú tionchair lánréasúnaithe ar bhearta comhlántacha, lena n-áirítear tairseacha cainníochtúla.

D’ainneoin na chéad fhomhíre, tíolacfaidh ESMA a mheasúnú agus a mholtaí tráth ar bith tar éis dó fógra foirmiúil a fháil ón Sásra Faireacháin Comhpháirteach, ina léirítear gur dócha go dtiocfaidh rioscaí cobhsaíochta airgeadais don Aontas chun cinn mar thoradh ar imthosca sonracha a spreag teagmhas a bhfuil impleachtaí sistéamacha aige.

Laistigh de 6 mhí ón tuarascáil ó ESMA dá dtagraítear sa dara fomhír a fháil, ullmhóidh an Coimisiún a thuarascáil féin agus féadfaidh togra reachtach a bheith ag gabháil léi, i gcás inarb iomchuí.