Artikolu 7 Valutazzjoni tar-riskju fil-livell tal-Unjoni

1.   Il-Kummissjoni għandha twettaq valutazzjoni tar-riskji tal-ħasil tal-flus u tal-finanzjament tat-terroriżmu, kif ukoll tan-nonimplimentazzjoni u l-evażjoni ta' sanzjonijiet finanzjarji mmirati li jaffettwaw is-suq intern u huma relatati ma' attivitajiet transfruntiera.

2.   Sal-10 ta’ Lulju 2028, il-Kummissjoni għandha, tfassal rapport li jidentifika, janalizza u jevalwa dawk ir-riskji fil-livell tal-Unjoni. Il-Kummissjoni għandha taġġorna dak ir-rapport kull erba' snin wara dan. Il-Kummissjoni tista’ taġġorna partijiet mir-rapport aktar ta’ spiss, jekk ikun xieraq.

Meta, waqt li tkun qed taġġorna r-rapport tagħha, il-Kummissjoni tidentifika riskji ġodda, hija tista' tirrakkomanda lill-Istati Membri jqisu li jaġġornaw il-valutazzjonijiet tar-riskju nazzjonali tagħhom, jew li jwettqu valutazzjonijiet tar-riskju settorjali, skont l-Artikolu 8, sabiex jivvalutaw dawk ir-riskji.

Ir-rapport imsemmi fl-ewwel subparagrafu għandu jiġi ppubblikat, ħlief dawk il-partijiet li jinkludu informazzjoni klassifikata.

3.   Ir-rapport imsemmi fil-paragrafu 1 għandu jkopri mill-inqas dan li ġej:

4.   Il-Kummissjoni għandha tagħmel rakkomandazzjonijiet lill-Istati Membri dwar il-miżuri xierqa biex jiġu indirizzati r-riskji identifikati. Fl-eventwalità li l-Istati Membri jiddeċiedu li ma japplikaw l-ebda rakkomandazzjoni fir-reġimi nazzjonali tagħhom fil-qasam tal-AML/CFT, huma għandhom jinnotifikaw lill-Kummissjoni b'dan u jipprovdu ġustifikazzjoni dettaljata fejn jiddikjaraw ir-raġunijiet tagħhom għal tali deċiżjoni.

5.   Sal-10 ta’ Lulju 2030 u kull sentejn wara dan, l-AMLA, f'konformità mal-Artikolu 55 tar-Regolament (UE) 2024/1620, għandha toħroġ opinjoni indirizzata lill-Kummissjoni dwar ir-riskji tal-ħasil tal-flus u tal-finanzjament tat-terroriżmu li jaffettwaw lill-Unjoni. L-AMLA tista' toħroġ opinjonijiet jew aġġornamenti tal-opinjonijiet preċedenti tagħha aktar ta' spiss, meta tqis li jkun xieraq li tagħmel dan. L-opinjonijiet maħruġa mill-AMLA għandhom jiġu ppublikati, ħlief dawk il-partijiet li jinkludu informazzjoni klassifikata.

6.   Meta twettaq il-valutazzjoni msemmija fil-paragrafu 1, il-Kummissjoni għandha torganizza l-ħidma fil-livell tal-Unjoni, għandha tqis l-opinjonijiet imsemmija fil-paragrafu 5 u għandha tinvolvi lill-esperti tal-Istati Membri fil-qasam tal-AML/CFT, lir-rappreżentanti mill-awtoritajiet superviżorji nazzjonali u mill-FIUs, mill-AMLA u minn korpi oħra fil-livell tal-Unjoni, u, fejn ikun xieraq, partijiet ikkonċernati rilevanti oħra.

7.   Fi żmien sentejn mill-adozzjoni tar-rapport imsemmi fil-paragrafu 2, u kull erba' snin wara dan, il-Kummissjoni għandha tippreżenta rapport lill-Parlament Ewropew u lill-Kunsill dwar l-azzjonijiet meħuda abbażi tas-sejbiet ta' dak ir-rapport.