Artikolu 22 Tweġibiet għal talbiet għall-informazzjoni

1.   L-Istati Membri għandhom jiżguraw li l-FIUs ikunu jistgħu jwieġbu f'waqthom għal talbiet motivati għal informazzjoni ġġustifikati minn tħassib relatat mal-ħasil tal-flus, ir-reati predikati tiegħu jew il-finanzjament tat-terroriżmu mill-awtoritajiet kompetenti msemmija fl-Artikolu 2(1), il-punti (44)(c) u (d), tar-Regolament (UE) 2024/1624 fl-Istat Membru rispettiv tagħhom fejn dik l-informazzjoni tkun diġà miżmuma mill-FIU u tkun meħtieġa fuq bażi ta' każ b'każ. Id-deċiżjoni biex wieħed jipproċedi għad-disseminazzjoni tal-informazzjoni għandha tibqa' f'idejn l-FIU.

Meta jkun hemm raġunijiet oġġettivi biex wieħed jassumi li l-għoti ta' tali informazzjoni ser ikollu impatt negattiv fuq investigazzjonijiet jew fuq analiżijiet li jkunu għaddejjin, jew, f'ċirkostanzi eċċezzjonali, meta d-divulgazzjoni tal-informazzjoni jkun kjarament sproporzjonat għall-interessi leġittimi ta' persuna fiżika jew ġuridika jew irrelevanti f'dak li għandu x'jaqsam mal-għanijiet li għalihom tkun intalbet, l-FIU ma għandhiex tkun obbligata li tosserva t-talba għall-informazzjoni.

F'każijiet bħal dawn, l-FIU għandha tipprovdi r-raġunijiet bil-miktub lill-awtorità rikjedenti.

2.   L-awtoritajiet kompetenti għandhom jipprovdu feedback lill-FIU dwar l-użu li jkun sar mill-informazzjoni pprovduta f'konformità ma' dan l-Artikolu u l-Artikolu 3, u l-utilità tagħha, u l-Artikolu 19(3), u dwar l-eżitu tal-azzjonijiet u l-investigazzjonijiet imwettqa abbażi ta' dik l-informazzjoni. Tali feedback għandu jiġi pprovdut malajr kemm jista' jkun u fi kwalunkwe każ, f'forma aggregata, mill-inqas fuq bażi annwali, b'tali mod li l-FIU tkun tista' ttejjeb il-funzjoni ta' analiżi operazzjonali tagħha.