ANNESS V GĦODOD TAL-ĠESTJONI TAL-LIKWIDITÀ DISPONIBBLI GĦALL-AIFMs LI JIMMANIĠĠAW AIFs MIFTUĦA

1. Sospensjoni ta’ sottoskrizzjonijiet, xiri mill-ġdid u tifdijiet: is-sospensjoni ta’ sottoskrizzjonijiet, xiri mill-ġdid u tifdijiet tfisser li ma jkunx permess temporanjament is-sottoskrizzjoni, ix-xiri mill-ġdid u t-tifdija ta’ tal-unitajiet jew l-ishma tal-fond.

2. Limitu ta’ tifdija: limitu ta’ tifdija jfisser restrizzjoni temporanja u parzjali tad-dritt tat-titolari tal-unitajiet jew tal-azzjonisti li jifdu l-unitajiet jew l-ishma tagħhom, fejn l-investituri jkunu jistgħu jifdu biss ċertu porzjon tal-unitajiet jew tal-ishma tagħhom.

3. Estensjoni ta’ perjodi ta’ avviż: l-estensjoni ta’ perjodi ta’ avviż tfisser l-estensjoni tal-perjodu ta’ avviż li t-titolari tal-unitajiet jew l-azzjonisti jridu jagħtu lill-maniġers tal-fondi, lil hinn minn perjodu minimu li jkun xieraq għall-fond, meta jifdu l-unitajiet jew l-ishma tagħhom.

4. Tariffa ta’ tifdija: tariffa ta’ tifdija tfisser tariffa, f’firxa predeterminata li tqis il-kost tal-likwidità, li titħallas lill-fond minn titolari tal-unitajiet jew azzjonisti meta jifdu unitajiet jew ishma, u li tiżgura li t-titolari tal-unitajiet jew l-azzjonisti li jibqgħu fil-fond ma jkunux żvantaġġati b’mod inġust.

5. Aġġustar tal-valur tal-likwidazzjoni: aġġustar tal-valur tal-likwidazzjoni jfisser mekkaniżmu predeterminat li bih il-valur nett tal-assi tal-unitajiet jew tal-ishma f’fond ta’ investiment jiġi aġġustat bl-applikazzjoni ta’ fattur (“fattur ta’ varjazzjoni”) li jirrifletti l-kost tal-likwidità.

6. Ipprezzar doppju: ipprezzar doppju jfisser mekkaniżmu predeterminat li bih il-prezzijiet tas-sottoskrizzjoni, tax-xiri mill-ġdid u tat-tifdija tal-unitajiet jew tal-ishma ta’ fond ta’ investiment jiġu stabbiliti billi jiġi aġġustat il-valur nett tal-assi għal kull unità jew sehem b’fattur li jirrifletti l-kost tal-likwidità.

7. Imposta kontra d-dilwizzjoni: imposta kontra d-dilwizzjoni tfisser tariffa li titħallas lill-fond minn titolar ta’ unità jew azzjonist fil-ħin tas-sottoskrizzjoni, ix-xiri mill-ġdid jew it-tifdija ta’ unitajiet jew ishma, li tikkumpensa lill-fond għall-kost tal-likwidità mġarrba minħabba d-daqs ta’ dik it-tranżazzjoni, u li tiżgura li t-titolari tal-unitajiet jew l-azzjonisti l-oħra ma jkunux żvantaġġati b’mod inġust.

8. Tifdija in natura: tifdija in natura tfisser it-trasferiment ta’ assi miżmuma mill-fond, minflok flus, biex jissodisfaw it-talbiet ta’ tifdija ta’ titolari ta’ unitajiet jew azzjonisti.

9. Side pockets: side pockets ifissru s-separazzjoni ta’ ċerti assi, li l-karatteristiċi ekonomiċi jew legali tagħhom inbidlu b’mod sinifikanti jew saru inċerti minħabba ċirkostanzi eċċezzjonali, mill-assi l-oħra tal-fond.