Artikolu 10 Il-programmazzjoni tar-riżorsi tal-JTF

Il-Kummissjoni għandha tapprova programm biss, jew kwalunkwe emenda oħra għalih, fejn l-identifikazzjoni tat-territorji l-aktar milquta ħażin mill-proċess ta’ tranżizzjoni, inklużi fil-pjan territorjali għal tranżizzjoni ġusta rilevanti, tkun debitament iġġustifikata u l-pjan territorjali għal tranżizzjoni ġusta rilevanti jkun konsistenti mal-pjan nazzjonali integrat dwar l-enerġija u l-klima tal-Istat Membru kkonċernat.

F’konformità mal-Artikolu 90(5) tar-Regolament (UE) 2021/1060, l-ammont imħallas bħala prefinanzjament eċċezzjonali għandu jiġi kklerjat mill-kontijiet tal-Kummissjoni sa mhux aktar tard mis-sena kontabilistika finali.

F’konformità mal-Artikolu 90(6) tar-Regolament (UE) 2021/1060, kwalunkwe mgħax iġġenerat mill-prefinanzjament eċċezzjonali għandu jintuża għall-programm ikkonċernat bl-istess mod bħall-JTF u għandu jiġi inkluż fil-kontijiet għas-sena kontabilistika finali.

F’konformità mal-Artikolu 97(1) tar-Regolament (UE) 2021/1060, il-prefinanzjament eċċezzjonali ma għandux jiġi sospiż.

F’konformità mal-Artikolu 105(1) tar-Regolament (UE) 2021/1060, il-prefinanzjament li għandu jitqies għall-finijiet tal-kalkolu tal-ammonti li għandhom jiġu diżimpenjati għandu jinkludi l-prefinanzjament eċċezzjonali mħallas.

B’deroga mill-Artikolu 112 tar-Regolament (UE) 2021/1060, ir-rati massimi ta’ kofinanzjament għal prijoritajiet iddedikati stabbiliti biex jappoġġaw l-objettivi ta’ STEP għandhom ikunu pari għal 100 %.

Tali programm jista’ jibbenefika mill-prefinanzjament addizzjonali ta’ darba msemmi fl-Artikolu 7a(1), l-ewwel subparagrafu, tar-Regolament (UE) 2021/1058, meta applikabbli.

Meta tali programm jibbenefika minn skadenza estiża għall-eliġibbiltà tan-nefqa kif ukoll għad-diżimpenn f’konformità mal-Artikolu 7a tar-Regolament (UE) 2021/1058, tali estensjoni għandha tapplika wkoll għar-riżorsi tal-JTF.

Meta mill-anqas 10 % tar-riżorsi finanzjarji tal-programm jiġu riallokati għal prijorità ddedikata waħda jew aktar imsemmija fl-ewwel subparagrafu, il-Kummissjoni għandha, fl-2026, tħallas 1,5  % tal-appoġġ totali mill-JTF għall-programm bħala prefinanzjament eċċezzjonali ta’ darba. Barra minn hekk, ir-riallokazzjonijiet għal prijoritajiet iddedikati stabbiliti biex jappoġġaw investimenti li jikkontribwixxu għall-objettivi ta’ STEP approvati fl-emendi tal-programm qabel ir-rieżami ta’ nofs it-terminu għandhom jgħoddu wkoll għal-limitu ta’ 10 %. Ir-riżorsi mill-Istrument tal-Unjoni Ewropea għall-Irkupru msemmija fl-Artikolu 4 ma għandhomx jitqiesu għall-fini tal-kalkolu tal-ammont li jikkorrispondi għall-10 % tar-riżorsi finanzjarji tar-riżorsi tal-programm.

Il-prefinanzjament dovut lill-Istat Membru li jirriżulta mill-emendi tal-programm skont ir-riallokazzjoni għall-prijoritajiet imsemmija fl-ewwel subparagrafu ta’ dan il-paragrafu għandu jingħadd bħala pagamenti li saru fl-2025 għall-fini tal-kalkolu tal-ammonti li għandhom jiġu diżimpenjati skont l-Artikolu 105 tar-Regolament (UE) 2021/1060, dment li t-talba għall-emenda tal-programm tiġi ppreżentata lill-Kummissjoni sal-31 ta’ Diċembru 2025.

B’deroga mill-Artikolu 63(2) u l-Artikolu 105(2) tar-Regolament (UE) 2021/1060, id-data finali għall-eliġibbiltà tan-nefqa u tad-diżimpenn għandha tkun il-31 ta’ Diċembru 2030. Dik id-deroga għandha tapplika biss meta jkunu ġew approvati l-emendi tal-programm li jirriallokaw mill-anqas 10 % tar-riżorsi finanzjarji tal-programm għal prijorità ddedikata waħda jew aktar stabbiliti fit-tieni subparagrafu ta’ dan il-paragrafu.

Għal tali programmi, meta r-Regolament (UE) 2021/1060 jistabbilixxi d-data finali għall-finijiet tal-applikazzjoni tar-rekwiżiti tal-qafas ta’ prestazzjoni, tal-ġestjoni finanzjarja, tar-rappurtar u tal-evalwazzjoni, dan għandu jinqara bħala li jirreferi għall-istess data fis-sena ta’ wara. Barra minn hekk, b’deroga mill-Artikolu 2, il-punt (29), tar-Regolament (UE) 2021/1060, għal tali programmi s-sena kontabilistika finali għandha titqies li tirreferi għall-perjodu mill-1 ta’ Lulju 2030 sat-30 ta’ Ġunju 2031.

Minbarra l-valutazzjoni għal kull programm dwar l-eżitu tar-rieżami ta’ nofs it-terminu li għandu jiġi ppreżentat skont l-Artikolu 18(2) tar-Regolament (UE) 2021/1060, l-Istati Membri jistgħu jippreżentaw mill-ġdid lill-Kummissjoni valutazzjoni komplementari kif ukoll talbiet relatati għal emendi tal-programm, filwaqt li jqisu l-attivitajiet appoġġati introdotti mir-Regolament (UE) 2025/1914 sal-31 ta’ Diċembru 2025. Għandhom japplikaw l-iskadenzi stabbiliti fl-Artikolu 24 tar-Regolament (UE) 2021/1060.