Artikolu 8 Applikazzjoni eċċezzjonali ta’ tariffi supplimentari bl-imnut għall-konsum ta’ servizzi tar-roaming bl-imnut regolati u l-forniment ta’ tariffi alternattivi

1.   Mingħajr preġudizzju għat-tielet subparagrafu, meta fornitur tar-roaming japplika tariffa supplimentari għall-konsum ta’ servizzi tar-roaming bl-imnut regolati li taqbeż il-limiti skont xi politika ta’ użu ġust, dan għandu jissodisfa dawn ir-rekwiżiti, għajr il-VAT:

Fir-rigward tal-punt (b) tal-ewwel subparagrafu ta’ dan il-paragrafu, meta l-Kummissjoni tiddeċiedi, wara r-rieżami tagħha tal-att delegat adottat skont l-Artikolu 75(1) tad-Direttiva (UE) 2018/1972, li l-iffissar ta’ rata għat-terminazzjoni ta’ telefonati madwar l-Unjoni ma għadux meħtieġ u tiddeċiedi li ma timponix rata massima għat-terminazzjoni ta’ telefonati bil-mobile, kwalunkwe tariffa supplimentari applikata għat-telefonati tar-roaming regolati riċevuti ma għandhiex taqbeż ir-rata stabbilita fl-aktar att delegat riċenti adottat skont l-Artikolu 75 ta’ dik id-Direttiva.

Il-fornituri tar-roaming ma għandhom japplikaw l-ebda tariffa supplimentari għall-messaġġi SMS tar-roaming regolati riċevuti jew għall-messaġġi voicemail tar-roaming riċevuti. Dan għandu jkun mingħajr preġudizzju għal tariffi applikabbli oħra bħal dawk għas-smigħ ta’ dawk il-messaġġi.

Il-fornituri tar-roaming għandhom jimponu tariffi għat-telefonati tar-roaming magħmula u riċevuti abbażi ta’ kull sekonda. Il-fornituri tar-roaming jistgħu japplikaw perjodu minimu inizjali ta’ tariffar li ma jkunx jaqbeż it-30 sekonda għat-telefonati magħmula. Il-fornituri tar-roaming għandhom jimponu tariffa fuq il-klijenti tagħhom għall-forniment ta’ servizzi tar-roaming regolati tad-data abbażi ta’ kull kilobyte, għajr għall-messaġġi MMS li jistgħu jiġu ttariffati abbażi ta’ kull unità. F’każ bħal dan, it-tariffa bl-imnut li fornitur tar-roaming jista’ jimponi fuq il-klijent tar-roaming tiegħu għat-trażmissjoni jew il-wasla ta’ messaġġ MMS tar-roaming ma għandhiex taqbeż it-tariffa bl-imnut massima għas-servizzi tar-roaming regolati tad-data stabbilita fl-ewwel subparagrafu.

2.   Il-fornituri tar-roaming jistgħu joffru, u l-klijenti tar-roaming jistgħu jagħżlu deliberatament, tariffa tar-roaming għajr dik stabbilita f’konformità mal-Artikoli 4, 5 u 6 u mal-paragrafu 1 ta’ dan l-Artikolu, li bis-saħħa tagħha l-klijenti tar-roaming ikunu jgawdu minn tariffa differenti għas-servizzi tar-roaming regolati minn dik li jintalbu mingħajr dik l-għażla. Il-fornitur tar-roaming għandu jfakkar lil dawk il-klijenti tar-roaming dwar in-natura tal-vantaġġi tar-roaming li b’hekk jintilfu.

Mingħajr preġudizzju għall-ewwel subparagrafu, il-fornituri tar-roaming għandhom japplikaw tariffa stabbilita f’konformità mal-Artikoli 4 u 5, u mal-paragrafu 1 ta’ dan l-Artikolu għall-klijenti tar-roaming eżistenti u ġodda kollha b’mod awtomatiku.

Il-klijenti tar-roaming kollha jistgħu, fi kwalunkwe ħin, jitolbu li jaqilbu għal jew minn tariffa stabbilita f’konformità mal-Artikoli 4, 5 u 6 u mal-paragrafu 1 ta’ dan l-Artikolu. Meta l-klijenti tar-roaming deliberatament jagħżlu li jaqilbu minn jew lura għat-tariffa stabbilita f’konformità mal-Artikoli 4, 5 u 6 u mal-paragrafu 1 ta’ dan l-Artikolu, kwalunkwe qlib għandu jsir fi żmien jum tax-xogħol mill-wasla tat-talba, ikun mingħajr ħlas u ma jkunx jinvolvi kundizzjonijiet jew restrizzjonijiet li jappartjenu għal elementi tal-abbonamenti għajr ir-roaming. Il-fornituri tar-roaming jistgħu jdumu ma jagħmlu l-qlib sakemm it-tariffa tar-roaming preċedenti tkun ilha effettiva għal perjodu minimu speċifikat li ma jaqbiżx ix-xahrejn.

3.   Mingħajr preġudizzju għall-Parti III, it-Titolu III tad-Direttiva (UE) 2018/1972, il-fornituri tar-roaming għandhom jiżguraw li kuntratt bl-imnut li jinkludi kwalunkwe tip ta’ servizz tar-roaming bl-imnut regolat ikun jispeċifika l-karatteristiċi ta’ dak is-servizz tar-roaming bl-imnut regolat ipprovdut, inkluż partikolarment:

4.   Il-fornituri tar-roaming għandhom jiżguraw li kuntratt bl-imnut li jinkludi kwalunkwe tip ta’ servizz tar-roaming bl-imnut regolat jipprovdi informazzjoni dwar it-tipi ta’ servizzi li jistgħu jkunu soġġetti għal żieda fit-tariffi tar-roaming, mingħajr preġudizzju għall-Artikolu 97 tad-Direttiva (UE) 2018/1972.

5.   Il-fornituri tar-roaming għandhom jippubblikaw l-informazzjoni msemmija fil-paragrafi 3 u 4.

Barra minn hekk, il-fornituri tar-roaming għandhom jippubblikaw informazzjoni dwar ir-raġunijiet l-għala s-servizz tar-roaming huwa potenzjalment offrut b’kundizzjonijiet li huma inqas vantaġġużi minn dawk offruti fil-livell nazzjonali. Dik l-informazzjoni għandha tinkludi fatturi li jista’ jkollhom impatt fuq il-kwalità tas-servizz tar-roaming li l-klijenti tar-roaming jabbonaw għalih, bħall-ġenerazzjonijiet tan-network u t-teknoloġiji disponibbli għall-klijenti tar-roaming fi Stat Membru miżjur.

6.   Għall-fini tal-iżgurar tal-applikazzjoni konsistenti ta’ dan l-Artikolu, sal-1 ta’ Jannar 2023, wara konsultazzjoni mal-partijiet ikkonċernati u f’kooperazzjoni mill-qrib mal-Kummissjoni, il-BEREC għandu jaġġorna l-linji gwida tiegħu dwar ir-roaming bl-imnut, b’mod partikolari fir-rigward tal-implimentazzjoni ta’ dan l-Artikolu u tal-miżuri tat-trasparenza msemmija fl-Artikoli 13, 14 u 15.