Artikolu 17 Superviżjoni u infurzar

1.   L-awtoritajiet regolatorji nazzjonali u, fejn applikabbli, awtoritajiet kompetenti oħra għandhom iwettqu monitoraġġ u superviżjoni tal-konformità fit-territorju tagħhom ma’ dan ir-Regolament.

L-awtoritajiet regolatorji nazzjonali għandhom iwettqu monitoraġġ u superviżjoni stretti tal-fornituri tar-roaming li jużaw l-Artikoli 5 u 6.

Fejn applikabbli, awtoritajiet kompetenti oħra għandhom jimmonitorjaw u jissorveljaw il-konformità mill-operaturi mal-obbligi stabbiliti f’dan ir-Regolament li huma rilevanti għall-eżerċizzju tas-setgħat mogħtija lilhom mil-liġi nazzjonali li tittrasponi d-Direttiva (UE) 2018/1972.

2.   L-awtoritajiet regolatorji nazzjonali u, meta applikabbli, awtoritajiet kompetenti oħra u l-BEREC għandhom irendu aċċessibbli għall-pubbliku informazzjoni aġġornata dwar l-applikazzjoni ta’ dan ir-Regolament, b’mod partikolari l-Artikoli 4, 5, 6 u 8 sa 11, b’mod li l-partijiet ikkonċernati jkun jista’ jkollhom aċċess faċli għaliha.

3.   Bħala preparazzjoni għar-rieżami previst fl-Artikolu 21, l-awtoritajiet regolatorji nazzjonali u, fejn applikabbli, awtoritajiet kompetenti oħra għandhom, b’mod konformi mal-kompetenzi rispettivi tagħhom, jimmonitorjaw l-iżviluppi fit-tariffi bl-ingrossa u bl-imnut għall-forniment ta’ servizzi bil-vuċi u tad-data, inkluż SMS u MMS, lill-klijenti tar-roaming, anke fl-aktar reġjuni periferiċi msemmija fl-Artikolu 349 tat-Trattat dwar il-Funzjonament tal-Unjoni Ewropea. L-awtoritajiet regolatorji nazzjonali u, fejn applikabbli, awtoritajiet kompetenti oħra għandhom ukoll jiġu notifikati dwar il-każ partikolari ta’ roaming involontarju fir-reġjuni tal-fruntieri ta’ Stati Membri ġirien u jimmonitorjaw jekk ikunux qed jintużaw tekniki ta’ ġestjoni tat-traffiku b’mod żvantaġġuż għall-klijenti.

L-awtoritajiet regolatorji nazzjonali u, fejn applikabbli, awtoritajiet kompetenti oħra għandhom jimmonitorjaw u jiġbru informazzjoni dwar ir-roaming involontarju u jieħdu miżuri xierqa.

4.   L-awtoritajiet regolatorji nazzjonali u, fejn applikabbli, awtoritajiet kompetenti oħra għandu jkollhom is-setgħa li jeżiġu li l-impriżi soġġetti għall-obbligi skont dan ir-Regolament, jipprovdu kull informazzjoni rilevanti għall-implimentazzjoni u l-infurzar ta’ dan ir-Regolament. Dawk l-impriżi għandhom jipprovdu din l-informazzjoni minnufih meta mitluba, u sal-iskadenzi u bil-livell ta’ dettall meħtieġ mill-awtorità regolatorja nazzjonali u, fejn applikabbli, awtoritajiet kompetenti oħra.

5.   Meta awtorità regolatorja nazzjonali jew awtoritajiet kompetenti oħra jidhrilhom li f’konformità mar-regoli tal-Unjoni jew nazzjonali dwar il-kunfidenzjalità kummerċjali, ċertu informazzjoni tkun kunfidenzjali, il-Kummissjoni, il-BEREC u kwalunkwe awtorità regolatorja nazzjonali oħra u, fejn applikabbli, awtorità kompetenti oħra kkonċernata għandhom jiżguraw dik il-kunfidenzjalità. Il-kunfidenzjalità kummerċjali ma għandhiex tipprevjeni il-kondiviżjoni fil-ħin tal-informazzjoni bejn l-awtorità regolatorja nazzjonali jew awtoritajiet kompetenti oħra, il-Kummissjoni, il-BEREC u kwalunkwe awtorità regolatorja nazzjonali oħra jew awtorità kompetenti oħra kkonċernata, għall-finijiet ta’ rieżami, monitoraġġ u superviżjoni tal-applikazzjoni ta’ dan ir-Regolament.

6.   L-awtoritajiet regolatorji nazzjonali għandhom jingħataw is-setgħa jintervjenu b’inizjattiva tagħhom stess biex jiżguraw il-konformità ma’ dan ir-Regolament. L-awtoritajiet regolatorji nazzjonali jew awtoritajiet kompetenti oħra fis-sitwazzjonijiet imsemmija fl-Artikolu 61(2), punti (b) u (c) tad-Direttiva (UE) 2018/1972 għandhom, meta meħtieġ, jużaw is-setgħat fis-sens tal-Artikolu 61 ta’ dik id-Direttiva biex jiżguraw aċċess u interkonnessjoni adegwati ħalli jiżguraw konnettività end-to-end u interoperabbiltà tas-servizzi tar-roaming, pereżempju meta l-klijenti ma jkunux jistgħu jagħmlu skambju ta’ messaġġi SMS tar-roaming regolati ma’ klijenti ta’ network pubbliku tal-komunikazzjoni mobbli terrestri fi Stat Membru ieħor minħabba n-nuqqas ta’ ftehim tar-roaming bl-ingrossa li jippermetti t-twassil ta’ dawk il-messaġġi.

7.   Meta awtorità regolatorja nazzjonali jew, fejn applikabbli għall-eżerċizzju tas-setgħat konferiti fuqhom mil-liġi nazzjonali li tittrasponi d-Direttiva (UE) 2018/1972, awtoritajiet kompetenti oħra jsibu li jkun sar ksur tal-obbligi stabbiliti f’dan ir-Regolament, din għandu jkollha s-setgħa teżiġi l-waqfien immedjat ta’ dan il-ksur.