Artikolu 9 Skemi tal-obbligi tal-effiċjenza enerġetika

Fejn l-Istati Membri jiddeċiedu li jwettqu l-obbligi tagħhom biex jiksbu l-ammont ta’ ffrankar meħtieġ skont l-Artikolu 8(1) permezz ta’ skema ta’ obbligi ta’ effiċjenza fl-enerġija, huma għandhom jiżguraw li l-partijiet obbligati msemmija fil-paragrafu 3 ta’ dan l-Artikolu li joperaw fit-territorju ta’ kull Stat Membru jissodisfaw, mingħajr preġudizzju għall-Artikolu 8(8) u (9), ir-rekwiżit tagħhom ta’ ffrankar kumulattiv fl-użu finali tal-enerġija stabbilit fl-Artikolu 8(1).

Meta l-Istati Membri jiddeċiedu li jissodisfaw l-obbligi tagħhom biex jiksbu l-ammont ta’ ffrankar meħtieġ skont l-Artikolu 8(1) permezz ta’ skema tal-obbligi tal-effiċjenza enerġetika, huma jistgħu jaħtru awtorità pubblika ta’ implimentazzjoni biex tamministra l-iskema.

L-Istati Membri għandhom jiddeżinjaw, abbażi ta’ kriterji oġġettivi u nondiskriminatorji, partijiet obbligati minn fost l-operaturi tas-sistemi tat-trażmissjoni, l-operaturi tas-sistemi tad-distribuzzjoni, id-distributuri tal-enerġija, il-kumpaniji li jbigħu l-enerġija bl-imnut u d-distributuri tal-fjuwil tat-trasport jew il-bejjiegħa bl-imnut tal-fjuwil tat-trasport li joperaw fit-territorju tagħhom. L-ammont meħtieġ ta’ ffrankar tal-enerġija biex jiġi ssodisfat l-obbligu għandhom jiksbuh il-partijiet obbligati fost il-klijenti finali, deżinjati mill-Istat Membru, indipendentement mill-kalkolu li sar skont l-Artikolu 8(1) jew, jekk l-Istati Membri jiddeċiedu hekk, bi ffrankar iċċertifikat miksub minn partijiet oħra kif stipulat fil-paragrafu 11, il-punt (a), ta’ dan l-Artikolu.

Fejn kumpaniji li jbigħu l-enerġija bl-imnut ikunu nnominati bħala partijiet obbligati taħt il-paragrafu 3, l-Istati Membri għandhom jiżguraw li waqt li qed jissodisfaw l-obbligu tagħhom, kumpanniji li jbigħu l-enerġija bl-imnut ma joħolqu l-ebda xkiel li jimpedixxi lill-konsumaturi milli jaqilbu minn fornitur għal ieħor.

L-Istati Membri għandhom jinkoraġġixxu lill-partijiet obbligati jiksbu sehem tal-obbligu tal-iffrankar tal-enerġija tagħhom fost il-persuni affettwati mill-faqar enerġetiku, il-klijenti vulnerabbli, persuni li ġejjin minn familji b’introjtu baxx u, meta applikabbli, il-persuni li jgħixu f’akkomodazzjoni soċjali. L-Istati Membri jistgħu jeħtieġu wkoll li l-partijiet obbligati jilħqu miri ta’ tnaqqis fil-kostijiet tal-enerġija, dment li dawn jirriżultaw fi ffrankar tal-enerġija fl-użu finali u jiġu kkalkulati skont l-Anness V, u jiksbu ffrankar tal-enerġija billi jippromwovu miżuri li jtejbu l-effiċjenza enerġetika, inkluż miżuri ta’ appoġġ finanzjarju li jtaffu l-effetti tal-prezz tal-karbonju fuq l-SMEs u l-mikrointrapriżi.

L-Istati Membri jistgħu jitolbu lill-partijiet obbligati jaħdmu mas-servizzi soċjali, l-awtoritajiet reġjonali, l-awtoritajiet lokali jew mal-muniċipalitajiet biex jippromwovu miżuri li jtejbu l-effiċjenza enerġetika fost il-persuni affettwati mill-faqar enerġetiku, il-klijenti vulnerabbli, persuni li ġejjin minn familji b’introjtu baxx u, meta applikabbli, il-persuni li jgħixu f’akkomodazzjoni soċjali. Dan jinkludi l-identifikazzjoni u l-indirizzar tal-ħtiġijiet speċifiċi ta’ gruppi partikolari fir-riskju tal-faqar enerġetiku jew suxxettibbli aktar għall-effetti tiegħu. Biex jipproteġu lill-persuni affettwati mill-faqar enerġetiku, lill-klijenti vulnerabbli u, meta applikabbli, lill-persuni li jgħixu f’akkomodazzjoni soċjali, l-Istati Membri għandhom iħeġġu lill-partijiet obbligati jwettqu azzjonijiet bħal rinnovazzjoni tal-bini, inkluż l-akkomodazzjoni soċjali, sostituzzjoni tal-apparat domestiku, appoġġ finanzjarju u inċentivi għal miżuri li jtejbu l-effiċjenza enerġetika f’konformità mal-iskemi nazzjonali ta’ finanzjament u appoġġ, jew awditi tal-enerġija. L-Istati Membri għandhom jiżguraw l-eliġibbiltà tal-miżuri għal unitajiet individwali li jinsabu f’bini b’aktar minn appartament wieħed.

Meta japplikaw il-paragrafi 5 u 6, l-Istati Membri għandhom jirrikjedu li l-partijiet obbligati jirrapportaw annwalment dwar l-iffrankar tal-enerġija miksub mill-partijiet obbligati bl-azzjonijiet promossi fost il-persuni affettwati mill-faqar enerġetiku, il-klijenti vulnerabbli, persuni li ġejjin minn familji b’introjtu baxx u, meta applikabbli, il-persuni li jgħixu f’akkomodazzjoni soċjali, u għandhom jirrikjedu informazzjoni statistika aggregata dwar il-klijenti finali tagħhom, li tidentifika l-bidliet fl-iffrankar tal-enerġija meta mqabbla mal-informazzjoni sottomessa qabel, u dwar l-appoġġ tekniku u finanzjarju mogħti.

L-Istati Membri għandhom jesprimu l-ammont ta’ ffrankar tal-enerġija meħtieġ minn kull parti obbligata f’termini ta’ konsum primarju tal-enerġija jew konsum finali tal-enerġija. Il-metodu magħżul biex jiġi espress l-ammont meħtieġ ta’ ffrankar tal-enerġija għandu jintuża wkoll għall-kalkolu tal-iffrankar dikjarat mill-partijiet obbligati. Waqt il-konverżjoni tal-iffrankar tal-enerġija, għandhom japplikaw il-valuri kalorifiċi netti stabbiliti fl-Anness VI tar-Regolament ta’ Implimentazzjoni tal-Kummissjoni (UE) 2018/2066 ( 7 ) u l-fattur tal-enerġija primarja skont l-Artikolu 31 sakemm ma jkunx jista’ jiġi ġġustifikat l-użu ta’ fatturi tal-konverżjoni oħrajn.

L-Istati Membri għandhom jistabbilixxu sistemi ta’ kejl, kontroll u verifika li permezz tagħhom issir verifika dokumentata ta’ mill-inqas proporzjon u kampjun rappreżentattiv statistikament sinifikanti tal-miżuri li jtejbu l-effiċjenza enerġetika implimentati mill-partijiet obbligati. Il-kejl, il-kontroll u l-verifika għandhom isiru indipendentement mill-partijiet obbligati. Meta entità tkun parti obbligata skont skema nazzjonali tal-effiċjenza enerġetika skont l-Artikolu 9 u skont l-EU ETS għall-bini u għat-trasport bit-triq skont id-Direttiva 2003/87/KE, is-sistema ta’ monitoraġġ u ta’ verifika għandha tiżgura li l-prezz tal-karbonju mgħoddi waqt ir-rilaxx tal-fjuwil għall-konsum skont id-Direttiva 2003/87/KE għandu jitqies fil-kalkolu u fir-rappurtar tal-iffrankar tal-enerġija tal-miżuri tal-iffrankar tal-enerġija tal-entità.

L-Istati Membri għandhom jinfurmaw lill-Kummissjoni, bħala parti mir-rapporti ta’ progress nazzjonali integrati għall-enerġija u l-klima ppreżentati skont l-Artikolu 17 tar-Regolament (UE) 2018/1999, dwar is-sistemi ta’ kejl, kontroll u verifika stabbiliti, inkluż il-metodi użati, il-kwistjonijiet identifikati u kif dawk il-kwistjonijiet ġew indirizzati.

Fl-iskema tal-obbligi tal-effiċjenza enerġetika, l-Istati Membri jistgħu jawtorizzaw lill-partijiet obbligati biex iwettqu dan li ġej:

Darba fis-sena, l-Istati Membri għandhom jippubblikaw l-iffrankar tal-enerġija miksub minn kull parti obbligata, jew kull sottokategorija ta’ parti obbligata, u b’kollox taħt l-iskema.