Artikolu 10 Supersiti ta’ monitoraġġ

1.   Kull Stat Membru għandu jistabbilixxi mill-inqas supersit wieħed ta’ monitoraġġ għal kull 10 miljun abitant f’post bi sfond urban. L-Istati Membri li għandhom inqas minn 10 miljun abitant għandhom jistabbilixxu mill-inqas supersit wieħed ta’ monitoraġġ f’post bi sfond urban.

L-Istati Membri li t-territorju tagħhom huwa inqas minn 10 000 km2 iżda mhux iktar minn 100 000 km2, għandhom jistabbilixxu mill-inqas supersit wieħed ta’ monitoraġġ f’post bi sfond rurali. Kull Stat Membru li t-territorju tiegħu huwa iktar minn 100 000 km2 għandu jistabbilixxi mill-inqas supersit wieħed ta’ monitoraġġ għal kull 100 000 km2 f’post bi sfond rurali.

2.   Il-post fejn jinsabu s-supersiti ta’ monitoraġġ għandu jiġi ddeterminat għal postijiet bi sfond urban u postijiet bi sfond rurali f’konformità mal-Punt B tal-Anness IV.

3.   Il-punti kollha ta’ kampjunar li jissodisfaw ir-rekwiżiti stabbiliti fil-Punti B u C tal-Anness IV u li huma installati f’supersiti ta’ monitoraġġ jistgħu jitqiesu għall-finijiet li jiġu ssodisfati r-rekwiżiti dwar in-numru minimu ta’ punti ta’ kampjunar għas-sustanzi niġġiesa rilevanti kif speċifikat fl-Anness III.

4.   Stat Membru jista’ jistabbilixxi, flimkien ma’ Stat Membru ġar wieħed jew iktar, supersit wieħed jew iktar ta’ monitoraġġ konġunt biex jissodisfa r-rekwiżiti stabbiliti fil-paragrafu 1. Dan ma jaffettwax l-obbligu ta’ kull Stat Membru li jistabbilixxi mill-inqas supersit wieħed ta’ monitoraġġ f’post bi sfond urban u l-obbigu ta’ kull Stat Membru li t-territorju tiegħu jkun iktar minn 10 000km2 li jistabbilixxi mill-inqas supersit wieħed ta’ monitoraġġ f’post bi sfond rurali.

5.   Il-kejl fis-supersiti ta’ monitoraġġ f’postijiet bi sfond urban u f’postijiet bi sfond rurali għandu jinkludi s-sustanzi niġġiesa elenkati fit-Taqsima 1, it-Tabelli 1 u 2, tal-Anness VII u jista’ jinkludi wkoll is-sustanzi niġġiesa elenkati fit-Tabella 3 ta’ dik it-Taqsima.

6.   Stat Membru jista’ jagħżel li ma jkejjilx il-karbonju iswed, il-partikoli ultrafini jew l-ammonijaka f’nofs is-supersiti ta’ monitoraġġ tiegħu f’postijiet bi sfond rurali jekk l-għadd ta’ supersiti ta’ monitoraġġ tiegħu f’postijiet bi sfond rurali jaqbeż l-għadd ta’ supersiti ta’ monitoraġġ tiegħu f’postijiet bi sfond urban b’mill-inqas proporzjon ta’ 2:1, sakemm l-għażla tas-supersiti ta’ monitoraġġ tiegħu tkun rappreżentattiva għal dawk is-sustanzi niġġiesa.

7.   Meta jkun xieraq, il-monitoraġġ għandu jkun ikkoordinat mal-programm tal-istrateġija ta’ monitoraġġ u ta’ kejl tal-EMEP, l-Infrastruttura ta’ Riċerka dwar l-Aerosol, is-Sħab u l-Gassijiet Traċċa (ACTRIS), u l-monitoraġġ tal-impatti tat-tniġġis tal-arja mwettaq skont id-Direttiva (UE) 2016/2284.