Artikolu 1 Suġġett u kamp ta’ applikazzjoni

1.   Dan ir-Regolament jistabbilixxi regoli għall-ħolqien u l-funzjonament effettiv tal-Ajru Uniku Ewropew biex jissaħħu l-istandards tas-sikurezza tat-traffiku tal-ajru, biex jikkontribwixxi għall-iżvilupp sostenibbli tas-sistema tat-trasport bl-ajru u titjieb il-prestazzjoni ġenerali tas-servizzi tal-ġestjoni tat-traffiku tal-ajru u tan-navigazzjoni bl-ajru għat-traffiku tal-ajru ġenerali fl-Ewropa, bil-ħsieb li jiġu ssodisfati r-rekwiżiti tal-utenti kollha tal-ispazju tal-ajru. L-Ajru Uniku Ewropew għandu jikkonsisti minn network pan-Ewropew koerenti, spazju tal-ajru progressivament aktar integrat, ġestjoni tan-network u sistemi tal-ġestjoni tat-traffiku tal-ajru bbażati fuq is-sikurezza, l-effiċjenza, l-interoperabbiltà u l-modernizzazzjoni teknoloġika, għall-benefiċċju tal-utenti kollha tal-ispazju tal-ajru, taċ-ċittadini u tal-ambjent.

2.   L-applikazzjoni ta’ dan ir-Regolament hija mingħajr preġudizzju għas-sovranità tal-Istati Membri fuq l-ispazju tal-ajru tagħhom u għar-rekwiżiti tal-Istati Membri relatati mal-ordni pubbliku, mas-sigurtà pubblika u ma’ kwistjonijiet tad-difiża, kif stipulat fl-Artikolu 55. Dan ir-Regolament ma jkoprix l-operazzjonijiet u t-taħriġ militari. Il-koordinazzjoni mal-awtoritajiet militari għandha tiġi żgurata biex jiġu identifikati u indirizzati l-impatti potenzjali tal-applikazzjoni ta’ dan ir-Regolament fuq attivitajiet militari.

3.   L-applikazzjoni ta’ dan ir-Regolament hija mingħajr preġudizzju għad-drittijiet u d-doveri tal-Istati Membri skont il-Konvenzjoni ta’ Chicago tal-1944 dwar l-Avjazzjoni Ċivili Internazzjonali (il-Konvenzjoni ta’ Chicago). F’dak il-kuntest, dan ir-Regolament għandu l-għan li jassisti, fl-oqsma li jkopri, lill-Istati Membri biex jissodisfaw l-obbligi tagħhom skont il-Konvenzjoni ta’ Chicago, billi jipprovdi bażi għall-interpretazzjoni komuni u l-implimentazzjoni uniformi tad-dispożizzjonijiet tiegħu, u billi jiżgura li dawk id-dispożizzjonijiet jitqiesu kif jixraq f’dan ir-Regolament u fir-regoli mfassla għall-implimentazzjoni tiegħu.

4.   Dan ir-Regolament għandu japplika għall-ispazju tal-ajru fir-reġjun EUR tal-ICAO fejn l-Istati Membri huma responsabbli għall-forniment tas-servizzi tat-traffiku tal-ajru. L-Istati Membri jistgħu wkoll japplikaw dan ir-Regolament għall-ispazju tal-ajru taħt ir-responsabbiltà tagħhom f’reġjuni oħra tal-ICAO, dment li jinformaw b’dan lill-Kummissjoni u lill-Istati Membri l-oħra.