Artikolu 42 Disponibbiltà ta’ data operazzjonali dwar it-traffiku tal-ajru ġenerali u aċċess għaliha

1.   Fir-rigward tat-traffiku tal-ajru ġenerali, id-data operazzjonali rilevanti għandha tkun disponibbli f’format interoperabbli f’ħin reali, fuq bażi trasparenti u nondiskriminatorja u mingħajr preġudizzju għas-sigurtà nazzjonali, l-ordni pubbliku u l-interessi tal-politika tad-difiża, mill-fornituri kollha tas-servizzi tan-navigazzjoni bl-ajru, l-utenti tal-ispazju tal-ajru, l-ajruporti u l-Maniġer tan-Network, inkluż fuq bażi transfruntiera u mifruxa mal-Unjoni kollha. Din id-disponibbiltà għandha tkun għall-benefiċċju tal-fornituri tas-servizzi tan-navigazzjoni bl-ajru ċċertifikati jew iddikjarati, entitajiet li għandhom interess evidenzjat fil-kunsiderazzjoni tal-forniment tas-servizzi tan-navigazzjoni bl-ajru, l-entitajiet militari inkarigati minn attivitajiet tas-sigurtà u d-difiża, il-fornituri tas-servizzi tan-navigazzjoni bl-ajru militari, l-utenti tal-ispazju tal-ajru u l-ajruporti kif ukoll il-Maniġer tan-Network. Id-data għandha tintuża biss għal finijiet operazzjonali.

2.   Il-prezzijiet għas-servizz imsemmi fil-paragrafu 1 għandhom ikunu bbażati fuq prinċipji ġenerali u regoli komuni tal-ipprezzar li għandhom jiġu stabbiliti fl-att ta’ implimentazzjoni msemmi fil-paragrafu 4.

3.   L-aċċess għad-data operazzjonali rilevanti kif imsemmi fil-paragrafu 1 ta’ dan l-Artikolu għandu jingħata mingħajr ħlas lill-awtoritajiet inkarigati mis-sorveljanza tas-sikurezza, is-sorveljanza tal-prestazzjoni u tan-network, is-sigurtà, l-ordni pubbliku u d-difiża, inkluż l-Aġenzija, f’konformità mar-Regolament (UE) 2018/1139.

4.   Il-Kummissjoni għandha tadotta atti ta’ implimentazzjoni li jistabbilixxu r-rekwiżiti dettaljati għat-tqegħid għad-dispożizzjoni tad-data u l-aċċess għaliha f’konformità mal-paragrafi 1 u 3 ta’ dan l-Artikolu, inkluż id-data operazzjonali speċifika kkonċernata, il-prinċipji ġenerali u r-regoli komuni tal-ipprezzar għall-iffissar tal-prezzijiet kif imsemmi fil-paragrafu 2 ta’ dan l-Artikolu, u r-rekwiżiti għall-identifikazzjoni ta’ entitajiet li għandhom interess evidenzjat li jikkunsidraw il-forniment ta’ servizzi tan-navigazzjoni bl-ajru. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 48(3).