KAPITOLU IV ĠESTJONI TAN-NETWORK

Artikolu 40

Il-fornituri tas-servizzi tat-traffiku tal-ajru għandhom jistabbilixxu mekkaniżmi ta’ konsultazzjoni biex jikkonsultaw lill-utenti tal-ispazju tal-ajru, lill-operaturi tal-ajruporti u lill-awtoritajiet militari rilevanti dwar il-kwistjonijiet ewlenin kollha relatati mas-servizzi mogħtija, inkluż il-bidliet rilevanti fil-konfigurazzjonijiet tal-ispazju tal-ajru, jew investimenti ewlenin li jħallu impatt rilevanti fuq il-ġestjoni tat-traffiku tal-ajru u l-forniment tas-servizzi tan-navigazzjoni bl-ajru jew l-imposti. B’mod partikolari, il-pożizzjonijiet tagħhom għandhom jitqiesu fi stadju bikri fil-proċess tal-iżvilupp ta’ pjanijiet ta’ investiment strateġiku fit-tul, speċjalment fir-rigward ta’ aspetti li jeħtieġu sinkronizzazzjoni bejn l-użu tat-tagħmir tal-ajru u tal-art.

Artikolu 41

Fil-kuntest tal-politika komuni tat-trasport, l-Istati Membri għandhom jiżguraw li jiġu stabbiliti jew imġedda ftehimiet bil-miktub bejn l-awtoritajiet ċivili u militari kompetenti jew arranġamenti legali ekwivalenti fir-rigward tal-ġestjoni ta’ blokok tal-ispazju tal-ajru speċifiċi u jinfurmaw lill-Kummissjoni b’dan.