Artikolu 2 Identifikazzjoni tal-entitajiet finanzjarji meħtieġa li jagħmlu TLPT

Artikolu 2 1

1. L-awtoritajiet tat-TLPT għandhom jivvalutaw jekk xi entità finanzjarja hijiex meħtieġa tagħmel TLPT, filwaqt li jqisu l-impatt ta’ dawk l-entitajiet finanzjarji, il-karattru sistemiku tagħhom u l-profil tar-riskju tal-ICT tagħhom, abbażi tal-kriterji kollha li ġejjin:

(a)

fatturi relatati mal-impatt u mal-karattru sistemiku:

(i)	id-daqs tal-entità finanzjarja, determinat abbażi ta’ jekk l-entità finanzjarja tipprovdix servizzi finanzjarji fi Stat Membru wieħed jew aktar u billi jitqabblu l-attivitajiet tal-entità finanzjarja ma’ dawk ta’ entitajiet finanzjarji oħrajn li jipprovdu servizzi simili;

(ii)	il-firxa u n-natura tal-interkonnettività tal-entità finanzjarja ma’ entitajiet finanzjarji oħrajn fis-settur finanzjarju fi Stat Membru wieħed jew aktar;

(iii)

il-kritikalità jew l-importanza tas-servizzi li l-entità finanzjarja tipprovdi lis-settur finanzjarju;

(iv)	is-sostitwibbiltà tas-servizzi li tipprovdi l-entità finanzjarja;

(v)	il-kumplessità tal-mudell ta’ negozju tal-entità finanzjarja u s-servizzi u l-proċessi relatati;

(vi)	jekk l-entità finanzjarja hijiex parti minn grupp ta’ karattru sistemiku fil-livell tal-Unjoni jew f’dak nazzjonali fis-settur finanzjarju u jekk tikkondividix sistemi tal-ICT;

(b)

Fatturi relatati mar-riskju tal-ICT:

(i)	il-profil tar-riskju tal-entità finanzjarja;

(ii)	ix-xenarju ta’ theddid tal-entità finanzjarja;

(iii)

il-grad ta’ dipendenza tal-funzjonijiet kritiċi jew importanti jew il-funzjonijiet ta’ appoġġ tagħhom tal-entità finanzjarja fuq is-sistemi u l-proċessi tal-ICT;

(iv)	il-kumplessità tal-arkitettura tal-ICT tal-entità finanzjarja;

(v)	is-servizzi u l-funzjonijiet tal-ICT appoġġjati minn fornituri terzi ta’ servizzi tal-ICT, u l-kwantità u t-tip ta’ arranġamenti kuntrattwali ma’ fornituri terzi ta’ servizzi tal-ICT jew fornituri intragrupp ta’ servizzi tal-ICT;

(vi)	l-eżiti ta’ kwalunkwe rieżami superviżorju rilevanti għall-valutazzjoni tal-maturità tal-ICT tal-entità finanzjarja;

(vii)

il-maturità tal-pjanijiet ta’ kontinwità tal-operat tal-ICT u tal-pjanijiet ta’ rispons u ta’ rkupru għall-ICT;

(viii)

il-maturità tal-miżuri operazzjonali ta’ individwazzjoni u ta’ mitigazzjoni tas-sigurtà tal-ICT, inkluża l-kapaċità li:

(1)	jimmonitorjaw l-infrastruttura tal-ICT tal-entità finanzjarja fuq bażi permanenti;

(2)	jindividwaw avvenimenti relatati mal-ICT f’ħin reali;

(3)	janalizzaw l-avvenimenti msemmija fil-punt (2);

(4)	jirrispondu għall-avvenimenti msemmija fil-punt (2) fi żmien xieraq u b’mod effettiv;

(ix)	jekk l-entità finanzjarja hijiex parti minn grupp attiv fis-settur finanzjarju fil-livell tal-Unjoni jew f’dak nazzjonali li jikkondividi sistemi tal-ICT.

Għall-finijiet tal-punt (a)(i), l-awtorità tat-TLPT għandha, fejn possibbli, tqis:

(a)	il-pożizzjoni tas-sehem mis-suq tal-entità finanzjarja fil-livell tal-Unjoni u f’dak nazzjonali;

(b)	il-firxa ta’ attivitajiet offruti mill-entità finanzjarja;

(c)	is-sehem mis-suq tas-servizzi provduti mill-entità finanzjarja jew tal-attivitajiet li jsiru fil-livell tal-Unjoni u f’dak nazzjonali.

Għall-finijiet tal-punt (a)(v), l-awtorità tat-TLPT għandha, fejn possibbli, tqis;

(a)	jekk l-entità finanzjarja toperax aktar minn mudell ta’ negozju wieħed;

(b)	l-interkonnettività tal-proċessi tan-negozju differenti u s-servizzi relatati.

Artikolu 2 2

2. L-awtoritajiet tat-TLPT għandhom jirrikjedu li l-entitajiet finanzjarji kollha li ġejjin jagħmlu TLPT, sakemm il-valutazzjoni msemmija fil-paragrafu 1 fir-rigward ta’ entità finanzjarja ma tindikax li l-impatt tagħha, it-tħassib dwar l-istabbiltà finanzjarja relatat ma’ dik l-entità finanzjarja, jew il-profil tar-riskju tal-ICT tagħha, ma tiġġustifikax il-prestazzjoni ta’ TLPT:

(a)

istituzzjonijiet ta’ kreditu li jissodisfaw kwalunkwe waħda mill-kundizzjonijiet li ġejjin:

(i)	ikunu ġew identifikati bħala istituzzjonijiet globali sistemikament importanti (G-SIIs, global systemically important institutions) f’konformità mal-Artikolu 131 tad-Direttiva 2013/36/UE tal-Parlament Ewropew u tal-Kunsill (7);

(ii)	ikunu ġew identifikati bħala istituzzjonijiet oħra sistemikament importanti (O-SIIs, other systemically important institutions) f’konformità mal-Artikolu 131 tad-Direttiva 2013/36/UE;

(iii)

ikunu parti minn G-SIIs jew O-SIIs;

(b)

istituzzjonijiet ta’ pagament li f’kull waħda mis-sentejn kalendarji ta’ qabel il-valutazzjoni mill-awtorità tat-TLPT qabżu l-EUR 150 biljun tal-valur totali tat-tranżazzjonijiet ta’ pagament kif definiti fl-Artikolu 4, il-punt (5), tad-Direttiva (UE) 2015/2366 tal-Parlament Ewropew u tal-Kunsill (8);

(c)

istituzzjonijiet tal-flus elettroniċi li f’kull waħda mis-sentejn kalendarji ta’ qabel il-valutazzjoni mill-awtorità tat-TLPT qabżu il-EUR 150 biljun tal-valur totali tat-tranżazzjonijiet ta’ pagament kif definiti fl-Artikolu 4, il-punt (5), tad-Direttiva (UE) 2015/2366 jew l-EUR 40 biljun tal-valur totali tal-ammont ta’ flus elettroniċi pendenti;

(d)	depożitorji ċentrali tat-titoli;

(e)	kontropartijiet ċentrali;

(f)

ċentri ta’ negozjar b’sistema elettronika ta’ negozjar li jissodisfaw kwalunkwe wieħed mill-kriterji li ġejjin:

(i)

iċ-ċentru ta’ negozjar ikollu l-ogħla sehem mis-suq f’termini ta’ fatturat fil-livell nazzjonali f’kull waħda mis-sentejn kalendarji ta’ qabel il-valutazzjoni mill-awtorità tat-TLPT fi kwalunkwe waħda minn dawn li ġejjin:

(1)	titoli trasferibbli kif definiti fl-Artikolu 4(1), il-punt (44)(a), tad-Direttiva 2014/65/UE tal-Parlament Ewropew u tal-Kunsill (9);

(2)	titoli trasferibbli kif definiti fl-Artikolu 4(1), il-punt (44)(b), tad-Direttiva 2014/65/UE;

(3)	derivattivi kif definiti fl-Artikolu 2(1), il-punt (29), tar-Regolament (UE) Nru 600/2014 tal-Parlament Ewropew u tal-Kunsill (10);

(4)	prodotti finanzjarji strutturati kif definiti fl-Artikolu 2(1), il-punt (28), tar-Regolament (UE) Nru 600/2014;

(5)	il-kwoti tal-emissjonijiet kif imsemmija fit-Taqsima C, il-punt (11), tal-Anness I tad-Direttiva 2014/65/UE;

(ii)

iċ-ċentru ta’ negozjar ikollu sehem mis-suq f’termini ta’ fatturat fil-livell tal-Unjoni li jaqbeż il-5 % f’kull waħda mis-sentejn kalendarji ta’ qabel il-valutazzjoni mill-awtorità tat-TLPT fi kwalunkwe waħda minn dawn li ġejjin:

(1)	ishma f’kumpaniji u titoli oħrajn ekwivalenti għal ishma f’kumpaniji, sħubijiet jew entitajiet oħrajn, u riċevuti depożitarji fir-rigward tal-ishma;

(2)	bonds jew forom oħrajn ta’ dejn titolizzat, inklużi r-riċevuti depożitarji fir-rigward ta’ tali titoli;

(3)	derivattivi kif definiti fl-Artikolu 2(1), il-punt (29), tar-Regolament (UE) Nru 600/2014,

(4)	prodotti finanzjarji strutturati kif definiti fl-Artikolu 2(1), il-punt (28), tar-Regolament (UE) Nru 600/2014;

(5)	kwoti tal-emissjonijiet kif imsemmija fit-Taqsima C, il-punt (11), tal-Anness I tad-Direttiva 2014/65/UE;

(g)

impriżi tal-assigurazzjoni u tar-riassigurazzjoni li jissodisfaw il-kriterji kollha li ġejjin:

(i)	ikollhom primjum gross miktub (GWP, gross written premium) li jaqbeż il-EUR 1 500 000 000;

(ii)	ikollhom dispożizzjonijiet tekniċi li jaqbżu l-EUR 10 000 000 000;

(iii)

impriżi tal-assigurazzjoni li joffru biss attivitajiet tal-ħajja jew li joffru kemm attivitajiet tal-ħajja kif ukoll mhux tal-ħajja u li għandhom assi totali li jaqbżu t-3,5 % tas-somma tal-assi totali stmati f’konformità mal-Artikolu 75 tad-Direttiva 2009/138/KE tal-Parlament Ewropew u tal-Kunsill (11) tal-impriżi tal-assigurazzjoni u tar-riassigurazzjoni stabbiliti fl-Istat Membru;

Għall-finijiet ta’ (f)(ii), meta ċ-ċentru ta’ negozjar ikun parti minn grupp li jikkondividi s-sistemi tal-ICT jew l-istess fornitur intragrupp ta’ servizzi tal-ICT, għandu jitqies il-fatturat tal-kuntratti tat-titoli u tad-derivattivi fiċ-ċentri ta’ negozjar kollha li jappartjenu għall-istess grupp u li jkunu stabbiliti fl-Unjoni.

Għall-finijiet tal-punt (g), l-awtoritajiet tat-TLPT għandhom jidentifikaw subsett tal-impriżi kollha tal-assigurazzjoni u tar-riassigurazzjoni billi japplikaw il-kriterji stabbiliti fil-punti (g)(i), (ii), u (iii). L-impriżi tal-assigurazzjoni u tar-riassigurazzjoni inklużi f’dak is-subsett għandhom ikunu meħtieġa jagħmlu TLPT meta jissodisfaw ukoll kwalunkwe wieħed mill-kriterji li ġejjin:

(a)	primjum gross miktub (GWP) li jaqbeż it-EUR 3 000 000 000;

(b)	dispożizzjonijiet tekniċi li jaqbżu t-EUR 30 000 000 000;

(c)	assi totali li jaqbżu l-10 % tas-somma tal-assi totali stmati f’konformità mal-Artikolu 75 tad-Direttiva 2009/138/KE tal-impriżi tal-assigurazzjoni u tar-riassigurazzjoni stabbiliti fl-Istat Membru.

Artikolu 2 3

3. Meta aktar minn entità finanzjarja waħda li tappartjeni għall-istess grupp u li tikkondividi s-sistemi tal-ICT, jew meta aktar minn entità finanzjarja waħda li tuża l-istess fornitur intragrupp ta’ servizzi tal-ICT, jissodisfaw il-kriterji stabbiliti fil-paragrafu 2, l-awtoritajiet tat-TLPT ta’ dawk l-entitajiet finanzjarji għandhom, f’konformità mal-Artikolu 16(2), jiddeċiedu jekk ir-rekwiżit li jsir TLPT fuq bażi individwali huwiex rilevanti għal dawk l-entitajiet finanzjarji.

Meta l-awtorità tat-TLPT tal-impriża prinċipali ta’ grupp ta’ entitajiet finanzjarji msemmija fl-ewwel subparagrafu tkun differenti mill-awtoritajiet tat-TLPT tal-entitajiet finanzjarji tal-grupp, dik l-awtorità għandha tiġi kkonsultata mill-awtoritajiet tat-TLPT tal-entitajiet finanzjarji li jappartjenu għal dak il-grupp dwar jekk huwiex xieraq li jsir TLPT fuq bażi individwali.

Artikolu 2 Identifikazzjoni tal-entitajiet finanzjarji meħtieġa li jagħmlu TLPT

1. Ħarsa ġenerali

1.1 Referenzi

1.2 Rekwiżiti identifikati

1.3 Standards relatati

2. Rekwiżiti identifikati

3. Standards relatati