KAPITOLU II Obbligi ta' l-Istat ta' Reġistrazzjoni.

Artikolu 4

1.  L-Istati Membri għandhom jeħtieġu, bħala kondizzjoni għal liċenza jew permess li jawtorizza bastiment li jaqbad Dissostichus spp., li dak il-bastiment jiżbarka l-qabdiet unikament fi Stati li huma Partijiet Kontraenti għall-CCAMLR jew li b'xi mod ieħor japplikaw l-iskema ta' dokumentazzjoni ta' qbid.

2.  L-Istati Membri għandhom jehmżu mal-liċenzi u l-permessi li jawtorizzaw bastimenti li jaqbdu Dissostichus spp., l-ismijiet tal-Partijiet Kontraenti tal-CCAMLR u ta' l-Istati li nnotifikaw lis-Segretarjat tal-CCAMLR li huma japplikaw l-iskema ta' dokumentazzjoni ta' qbid.

3.  L-Istati Membri għandhom jieħdu l-miżuri neċessarji kollha biex jiżguraw li kull meta jiġi żbarkat jew trasbordat Dissostichus spp., il-bastimenti tal-bandiera tagħhom li huma awtorizzati li jaqbdu Dissostichus spp. ikunu mlew dokument ta' qbid.

▼B

Artikolu 5

L-Istati Membri għandhom jieħdu il-passi neċessarji kollha sabiex jassiguraw li kull trasbord ta' Dissostichus spp. għal fuq il-bastimenti reġistrati f'pajjiżhom, għandu jkun akkumpanjat minn dokument ta' qbid komplut.

Artikolu 6

L-Istati Membri għandhom jipprovdu formoli ta' dokumenti ta' qbid lil kull bastiment reġistrat f'pajjiżhom li jkun awtorizzat biex jaħsad id-Dissostichus spp. u lil dawk il-bastimenti biss.

Artikolu 7

L-Istati Membri għandhom jassiguraw li kull formola ta' dokument ta' qbid li huma joħorġu tkun tinkludi numru ta' identifikazzjoni speċifiku kif indikat fl-Anness numru I.

Huma għandhom jniżżlu wkoll fuq kull formola ta' dokument ta' qbid in-numru tal-liċenza tas-sajd jew tal-permess li jawtorizza s-sajd tad-Dissostichus spp. li kien maħruġ lill-bastiment reġistrat f'pajjiżhom.