Airteagal 24 Toiliú a chur ar fionraí nó a choinneáil siar

1.   Áiritheoidh na Ballstáit go dtabharfar de chumhacht do FIUnna gníomhaíocht phráinneach a dhéanamh, go díreach nó go hindíreach, i gcás ina mbíonn amhras ann go bhfuil baint ag idirbheart le sciúradh airgid nó le maoiniú na sceimhlitheoireachta, chun toiliú a chur ar fionraí nó a choinneáil siar i ndáil leis an idirbheart sin.

I gcás ina mbunófar an gá le toiliú i ndáil le hidirbheart a chur ar fionraí nó a choinneáil siar bunaithe ar amhras arna thuairisciú de bhun Airteagal 69 de Rialachán (AE) 2024/1624, áiritheoidh na Ballstáit go bhforchuirfear fionraí nó coinneáil siar an toilithe ar an eintiteas faoi oibleagáid laistigh den tréimhse dá dtagraítear in Airteagal 71 den Rialachán sin. I gcás ina mbeidh an gá le hidirbheart a chur ar fionraí bunaithe ar obair anailíseach FIU, gan beann ar cibé acu ar chomhdaigh nó nár chomhdaigh an t-eintiteas faoi oibleagáid tuairisc roimh ré, déanfaidh an FIU an fhionraí a fhorchur a luaithe is féidir.

Forchuirfidh an FIU fionraí nó coinneáil siar an toilithe i ndáil leis an idirbheart chun na cistí a chaomhnú, chun a anailísí a dhéanamh, lena n-áirítear anailís ar an idirbheart, chun a mheasúnú an bhfuil an t-amhras deimhnithe agus, más amhlaidh atá, chun torthaí na n-anailísí a scaipeadh ar na húdaráis inniúla ábhartha chun gur féidir bearta iomchuí a ghlacadh.

Leagfaidh na Ballstáit síos an tréimhse fionraí nó an tréimhse chun toiliú a choinneáil siar is infheidhme maidir le hobair anailíseach na FIUnna, ar tréimhse í nach mbeidh níos faide ná 10 lá oibre. Féadfaidh na Ballstáit tréimhse níos faide a leagan síos i gcás, de bhun an dlí náisiúnta, ina gcomhlíonann FIUnna an fheidhm maidir le sócmhainní coiriúla a rianú, a urghabháil, a reo nó a choigistiú. I gcás ina leagtar síos tréimhse fionraí nó tréimhse chun toiliú a choinneáil siar níos faide, áiritheoidh na Ballstáit go bhfeidhmeoidh FIUnna a bhfeidhm faoi réir coimircí náisiúnta iomchuí, amhail an fhéidearthacht don duine ar cuireadh a idirbheart nó a hidirbheart ar fionraí agóid a dhéanamh i gcoinne na fionraí sin os comhair cúirte.

Áiritheoidh na Ballstáit go dtabharfar de chumhacht do na FIUnna deireadh a chur leis an bhfionraí nó an choinneáil siar toilithe tráth ar bith i gcás ina gcinnfidh siad nach bhfuil gá leis an bhfionraí nó an choinneáil siar toilithe sin a thuilleadh chun na cuspóirí a leagtar amach sa tríú fomhír a chomhlíonadh.

Áiritheoidh na Ballstáit go dtabharfar de chumhacht do FIUnna an toiliú dá dtagraítear sa mhír seo a chur ar fionraí nó a choinneáil siar arna iarraidh sin do FIU ó Bhallstát eile.

2.   I gcás ina mbíonn amhras ann go bhfuil baint ag cuntas bainc nó cuntas íocaíochta, cuntas cripteashócmhainní nó gaolmhaireacht gnó le sciúradh airgid nó maoiniú na sceimhlitheoireachta, áiritheoidh na Ballstáit go dtabharfar de chumhacht don FIU gníomhaíocht phráinneach a dhéanamh, go díreach nó go hindíreach, chun úsáid an chuntais sin a chur ar fionraí nó chun an ghaolmhaireacht gnó a chur ar fionraí ar mhaithe leis na cistí a chaomhnú, chun a anailísí a dhéanamh, chun a mheasúnú an bhfuil an t-amhras deimhnithe agus, má tá, chun torthaí na n-anailísí a scaipeadh ar na húdaráis inniúla ábhartha chun gur féidir bearta iomchuí a ghlacadh.

Leagfaidh na Ballstáit síos an tréimhse fionraí is infheidhme i ndáil le hobair anailíseach an FIU, ar tréimhse í nach mbeidh níos faide ná 5 lá oibre. Féadfaidh na Ballstáit tréimhse níos faide a leagan síos i gcás, de bhun an dlí náisiúnta, ina gcomhlíonann FIUnna an fheidhm maidir le sócmhainní coiriúla a rianú, a urghabháil, a reo nó a choigistiú. I gcás ina leagtar síos tréimhse fionraí níos faide, áiritheoidh na Ballstáit go bhfeidhmeoidh FIUnna a bhfeidhm faoi réir coimircí náisiúnta iomchuí, amhail an fhéidearthacht don duine a bhfuil a chuntas bainc nó chuntas íocaíochta, a chuntas cripteashócmhainní nó a ghaolmhaireacht gnó á chur ar fionraí agóid a dhéanamh i gcoinne na fionraí sin os comhair cúirte.

Áiritheoidh na Ballstáit go dtabharfar de chumhacht do FIUnna deireadh a chur leis an bhfionraí tráth ar bith i gcás ina gcinnfidh siad nach bhfuil gá leis an bhfionraí a thuilleadh chun na cuspóirí a leagtar amach sa chéad fhomhír chomhlíonadh.

Áiritheoidh na Ballstáit go dtabharfar de chumhacht do FIUnna úsáid an chuntais nó an ghaolmhaireacht gnó dá dtagraítear sa mhír seo a chur ar fionraí arna iarraidh sin do FIU ó Bhallstát eile.

3.   Ní bheidh an FIU ná a stiúrthóirí ná a fhostaithe faoi dhliteanas de chineál ar bith mar gheall ar fhorchur fionraí nó ar choinneáil siar an toilithe i gcomhréir leis an Airteagal seo.