Airteagal 40 Éisteacht a thabhairt do na daoine atá faoi réir imscrúduithe

1.   Sula ndéanfaidh sé aon chinneadh lena bhforchuirtear beart maoirseachta, fíneáil nó íocaíocht phionósach thréimhsiúil de bhun Airteagail 35, 36 nó 37, tabharfaidh ESMA an deis do na daoine atá faoi réir na n-imscrúduithe éisteacht a fháil faoina thorthaí. Is ar na torthaí sin a bhfuil deis ag na daoine atá faoi réir na n-imscrúduithe a dtuairimí a thabhairt ina leith, agus orthu sin amháin, a bhunóidh ESMA a chinntí.

Ní bheidh feidhm ag an gcéad fhomhír i gcás ina bhfuil gá le gníomhaíocht phráinneach de bhun Airteagal 35 chun gardhamáiste mór don chóras airgeadais a chosc. I gcás den sórt sin, féadfaidh ESMA cinneadh eatramhach a ghlacadh agus tabharfaidh sé deis do na daoine lena mbaineann éisteacht a fháil a luaithe is féidir tar éis dó a chinneadh a dhéanamh.

2.   Déanfar cearta cosanta na ndaoine atá faoi réir na n-imscrúduithe a urramú go hiomlán le linn na n-imscrúduithe. Beidh siad i dteideal rochtain a bheith acu ar chomhad ESMA, faoi réir leas dlisteanach daoine eile maidir lena rúin ghnó a chosaint. Ní fholóidh rochtain ar an gcomhad faisnéis rúnda ná doiciméid ullmhúcháin inmheánacha ESMA.