Airteagal 12 Na critéir a bhfuil feidhm acu maidir le comhar idirnáisiúnta i dtaca le sábháilteacht núicléach

1.   Déanfar comhthuiscint agus comhaontú cómhalartach idir an tríú tír agus an Comhphobal a dhaingniú, i bprionsabal, trí iarraidh fhoirmiúil chuig an gCoimisiún. Beidh an iarraidh sin ina ceangal ar an rialtas ar leith.

2.   Tríú tíortha ar mian leo oibriú i gcomhar leis an gComhphobal, beidh siad ina bpáirtithe sa Chonradh maidir le Neamhleathadh Arm Núicléach agus beidh Prótacal Breise i bhfeidhm acu nó beidh comhaontú maidir le coimirciú ábhair núicléach tugtha i gcrích acu le IAEA. Glacfaidh siad go hiomlán leis na bunphrionsabail sábháilteachta mar a shonraítear i gCaighdeáin na Sábháilteachta IAEA agus beidh siad ina bpáirtithe sna coinbhinsiúin ábhartha, amhail an Coinbhinsiún ar shábháilteacht núicléach agus an Coinbhinsiún Comhpháirteach maidir le Sábháilteacht i mBainistiú Breosla Spíonta agus maidir le Sábháilteacht i mBainistiú Dramhaíola Radaighníomhaí, nó beidh céimeanna tugtha acu lena léirítear gealltanas daingean aontú do na coinbhinsiúin sin. I gcás comhar ghníomhach, déanfar meastóireacht ar an ngealltanas sin gach bliain, agus tuarascálacha náisiúnta agus doiciméid eile maidir le cur chun feidhme na gcoinbhinsiún ábhartha á gcur san áireamh. Ar bhonn na meastóireachta sin déanfar cinneadh maidir le leanúint den chomhar. I gcásanna éigeandála, ba cheart, go heisceachtúil, solúbthacht a léiriú agus na prionsabail sin á gcur i bhfeidhm.

3.   Chun comhlíonadh chuspóirí comhair na hIonstraime a áirithiú agus chun faireachán a dhéanamh ar chomhlíonadh na gcuspóirí sin, glacfaidh an tríú tír lena mbaineann leis an meastóireacht ar na gníomhaíochtaí a dhéanfar. Leis an meastóireacht sin beifear in ann faireachán agus fíorú a dhéanamh ar chomhlíonadh na gcuspóirí comhaontaithe agus féadfaidh sí a bheith ina coinníoll le go leanfar den ranníocaíocht ón gComhphobal a íoc.

4.   Níl sé d’aidhm ag comhar a thugann an tAontas i réimse na sábháilteachta núicléiche agus slándála faoin Rialachán seo fuinneamh núicléach a chur chun cinn agus mar sin ní léireofar é mar bheart chun an fuinneamh sin a chur chun cinn i dtríú tíortha.