Airteagal 13 Trédhearcacht coinníollacha miondíola maidir le glaonna agus teachtaireachtaí SMS fánaíochta

1.   Chun foláireamh a thabhairt do chustaiméirí seirbhísí fánaíochta go mbeidh muirir fánaíochta á ngearradh orthu nuair a bheidh glao á dhéanamh nó á fháil acu nó nuair a bheidh teachtaireacht SMS á seoladh acu, déanfaidh gach soláthraí seirbhísí fánaíochta ar leith, ach amháin i gcás ina mbeidh fógra tugtha ag na custaiméirí don soláthraí seirbhísí fánaíochta nach bhfuil an tseirbhís sin ag teastáil uathu, faisnéis bhunúsach phearsantaithe phraghsála maidir leis na muirir fánaíochta, lena n-áirítear CBL, a bhfuil feidhm acu maidir le déanamh agus fáil glaonna agus maidir le seoladh teachtaireachtaí SMS ag an gcustaiméir sin sa Bhallstát a bhfuil cuairt á tabhairt air a sholáthar do na custaiméirí, gan aon mhoill mhíchuí agus saor in aisce, trí bhíthin teachtaireacht uathoibríoch nuair a rachaidh siad isteach i mBallstát nach é Ballstát a soláthraí baile é.

Léireofar an fhaisnéis bhunúsach phearsantaithe phraghsála sin in airgeadra an bhille baile arna sholáthar ag soláthraí baile an chustaiméara agus áireofar inti faisnéis maidir leis na nithe seo a leanas:

Déanfaidh soláthraithe seirbhísí fánaíochta faisnéis a sholáthar do chustaiméirí seirbhísí fánaíochta, nuair a rachaidh siad isteach i mBallstát seachas Ballstát a soláthraí baile, maidir leis an riosca go bhféadfadh muirir mhéadaithe a bheith ann mar gheall ar sheirbhísí breisluacha a bheith á n-úsáid trí bhíthin teachtaireacht uathoibríoch, gan aon mhoill mhíchuí agus saor in aisce, ach amháin i gcás ina mbeidh fógra tugtha ag custaiméirí seirbhísí fánaíochta dá soláthraí seirbhísí fánaíochta nach bhfuil an tseirbhís sin ag teastáil uathu. Áireofar ar an bhfaisnéis sin nasc chun rochtain a fháil ar leathanach gréasáin tiomnaithe, saor in aisce, ar a mbeidh faisnéis atá cothrom le dáta maidir leis na cineálacha seirbhísí a d’fhéadfadh a bheith faoi réir costais mhéadaithe agus, i gcás ina mbeidh fáil uirthi, faisnéis faoi raonta uimhrithe le haghaidh seirbhísí breisluacha nó faisnéis bhreise ábhartha eile atá sa bhunachar sonraí a bhunaítear de bhun Airteagal 16, an chéad mhír, pointe (a), i gcomhréir le hAirteagal 16, an tríú mír. Áireofar ar an leathanach gréasáin faisnéis faoi na táillí is infheidhme maidir le huimhreacha saorghlao agus fánaíocht á déanamh, más ann dóibh.

Áireofar freisin san fhaisnéis bhunúsach phearsantaithe phraghsála dá dtagraítear sa chéad fhomhír den mhír seo an uimhir saor in aisce dá dtagraítear i mír 2 chun faisnéis níos mionsonraithe a fháil.

Tráth a bhfaighidh custaiméirí gach teachtaireacht ar leith, beidh an deis acu fógra a thabhairt don soláthraí seirbhísí fánaíochta, saor in aisce agus ar shlí éasca, lena thabhairt le fios nach bhfuil an teachtaireacht uathoibríoch ag teastáil uathu. Beidh sé de cheart ag custaiméirí a mbeidh fógra tugtha acu nach mbeidh an teachtaireacht uathoibríoch ag teastáil uathu a cheangal ar an soláthraí seirbhísí fánaíochta, tráth ar bith agus saor in aisce, an tseirbhís a sholáthar arís.

Déanfaidh soláthraithe seirbhísí fánaíochta an fhaisnéis bhunúsach phearsantaithe phraghsála dá dtagraítear sa chéad fhomhír a sholáthar go huathoibríoch do chustaiméirí faoi mhíchumas, trí ghuthghlao, saor in aisce, má iarrann siad amhlaidh.

Cé is moite den tagairt d’aon bheartas maidir le húsáid chóir agus leis an bhformhuirear a chuirtear i bhfeidhm i gcomhréir le hAirteagal 6, beidh feidhm ag an gcéad fhomhír, an dara fomhír, an cúigiú fomhír agus an séú fomhír den mhír seo maidir le seirbhísí fánaíochta guthghlaonna agus SMS arna n-úsáid ag custaiméirí seirbhísí fánaíochta agus iad ag nascadh le líonraí neamh-thrastíre poiblí cumarsáide soghluaiste náisiúnta nó idirnáisiúnta, agus arna soláthar ag soláthraí seirbhísí fánaíochta agus maidir le seirbhísí fánaíochta guthghlaonna agus SMS arna n-úsáid ag custaiméirí seirbhísí fánaíochta ag taisteal dóibh lasmuigh den Aontas agus arna soláthar ag soláthraí seirbhísí fánaíochta.

2.   I dteannta na faisnéise dá bhforáiltear faoi mhír 1, beidh sé de cheart ag custaiméirí faisnéis phearsantaithe níos mionsonraithe faoi phraghsáil ar na muirir fánaíochta a mbeidh feidhm acu sa líonra a bhfuil cuairt á tabhairt air maidir le guthghlaonna agus teachtaireachtaí SMS mar aon le faisnéis faoi na bearta trédhearcachta a bhfuil feidhm acu de bhua an Rialacháin seo, a iarraidh agus a fháil, gan beann ar an áit san Aontas ina bhfuil siad, saor in aisce, trí ghuthghlao soghluaiste nó trí theachtaireachtaí SMS. Déanfar iarraidh mar sin chuig uimhir saor in aisce a cheapfaidh an soláthraí seirbhísí fánaíochta chun na críche sin. Ní bheidh feidhm ag na hoibleagáidí dá bhforáiltear i mír 1 maidir le gléasanna nach dtacaíonn le feidhmiúlacht SMS.

3.   Seolfaidh an soláthraí seirbhísí fánaíochta fógra don chustaiméir seirbhísí fánaíochta nuair a bheidh an toirt is infheidhme maidir le húsáid chóir de sheirbhísí fánaíochta guthghlaonna nó SMS rialáilte tomhailte go hiomlán nó nuair a bheidh aon teorainn úsáide arna cur i bhfeidhm i gcomhréir le Airteagal 6 bainte amach. Léireoidh an fógra sin an formhuirear fánaíochta rialáilte a chuirfear i bhfeidhm ar aon tomhaltas breise ar sheirbhísí fánaíochta guthghlaonna nó SMS rialáilte ag an gcustaiméir seirbhísí fánaíochta. Beidh sé de cheart ag gach custaiméir a cheangal ar an soláthraí seirbhísí fánaíochta stopadh d’fhógraí den sórt sin a sheoladh chucu agus beidh sé de cheart acu, tráth ar bith agus saor in aisce, a cheangal ar an soláthraí seirbhísí fánaíochta an tseirbhís sin a sholáthar arís.

4.   Déanfaidh soláthraithe seirbhísí fánaíochta an fhaisnéis iomlán a thabhairt do chustaiméirí faoi na muirir fánaíochta a bheidh i bhfeidhm, tráth a mbeidh síntiúis á nglacadh. Soláthróidh siad faisnéis nuashonraithe dá gcuid custaiméirí seirbhísí fánaíochta freisin maidir le muirir fánaíochta is infheidhme gan aon mhoill mhíchuí gach uair a tharlaíonn athrú ar na muirir sin.

Seolfaidh soláthraithe seirbhísí fánaíochta meabhrúchán ag eatraimh réasúnacha ina dhiaidh sin chuig na custaiméirí go léir a roghnaigh taraif eile.

5.   Cuirfidh soláthraithe seirbhísí fánaíochta faisnéis ar fáil dá gcuid custaiméirí maidir le fánaíocht neamhaireach a sheachaint go héifeachtach i réigiúin teorann. Glacfaidh soláthraithe seirbhísí fánaíochta na céimeanna réasúnacha uile chun a gcuid custaiméirí a chosaint ar mhuirir fánaíochta a íoc ar sheirbhísí fánaíochta ar seirbhísí iad a ndearnadh rochtain neamhaireach ina leith agus na custaiméirí sin lonnaithe ina mBallstát baile.

6.   Glacfaidh soláthraithe seirbhísí fánaíochta na céimeanna réasúnacha uile chun a gcuid custaiméirí a chosaint ar mhuirir bhreise a íoc ar ghuthghlaonna agus ar theachtaireachtaí SMS as nascadh go neamhaireach le líonraí neamh-thrastíre poiblí soghluaiste, trína chur ar chumas custaiméirí seirbhísí fánaíochta, mar shampla, diúltú do nascadh le líonraí neamh-thrastíre. I gcás ina dtairgfear sásra den sórt sin um rogha an diúltaithe, beidh sé de cheart ag an gcustaiméir seirbhísí fánaíochta rogha a dhéanamh ag am ar bith, go héasca agus saor in aisce gan líonraí neamh-thrastíre a úsáid agus a iarraidh go ndéanfar an nasc leis na líonraí sin a athbhunú.