1. Biex il-klijenti tar-roaming jiġu notifikati dwar il-fatt li se jkunu soġġetti għal tariffi tar-roaming meta jagħmlu jew jirċievu telefonati jew meta jibagħtu messaġġi SMS, kull fornitur tar-roaming għandu, għajr meta l-klijenti jkunu nnotifikaw lill-fornitur tar-roaming tagħhom li ma jeħtiġux dan is-servizz, jipprovdi informazzjoni personalizzata bażika lill-klijenti, permezz ta’ messaġġ awtomatiku, mingħajr dewmien żejjed u mingħajr ħlas, meta jidħlu fi Stat Membru ieħor li mhux dak tal-fornitur domestiku tagħhom dwar il-prezzijiet dwar it-tariffi tar-roaming, inkluża l-VAT, li japplikaw għal dawk il-klijenti biex jagħmlu u jirċievu telefonati u biex jibagħtu messaġġi SMS fl-Istat Membru miżjur.
Dik l-informazzjoni personalizzata bażika dwar il-prezzijiet għandha tingħata bil-munita tal-kont tal-pajjiż tal-oriġini pprovdut mill-fornitur domestiku tal-klijent u għandha tinkludi informazzjoni dwar:
|
(a)
|
kwalunkwe politika ta’ użu ġust li l-klijenti tar-roaming huma soġġetti għaliha fl-Unjoni kollha u t-tariffi supplimentari applikabbli għall-użu li jaqbeż kwalunkwe limitu skont dik il-politika ta’ użu ġust; u
|
|
(b)
|
kwalunkwe tariffa supplimentari applikata skont l-Artikolu 6.
|
Il-fornituri tar-roaming għandhom jipprovdu lill-klijenti tar-roaming, meta jidħlu fi Stat Membru li mhuwiex dak tal-fornitur domestiku tagħhom, informazzjoni dwar ir-riskju potenzjali ta’ żieda fit-tariffi minħabba l-użu ta’ servizzi b’valur miżjud permezz ta’ messaġġ awtomatiku, mingħajr dewmien żejjed u mingħajr ħlas, ħlief meta klijent tar-roaming ikun innotifika lill-fornitur tar-roaming tiegħu li ma jeħtieġx dan is-servizz. Tali informazzjoni għandha tinkludi link għall-aċċess, mingħajr ħlas, ta’ paġna web apposta li tipprovdi informazzjoni aġġornata dwar it-tipi ta’ servizzi li jistgħu jkunu soġġetti għal żieda fil-kostijiet u, fejn disponibbli, informazzjoni dwar il-meded tan-numri għas-servizzi ta’ valur miżjud jew informazzjoni addizzjonali rilevanti oħra li tinsab fil-bażi tad-data stabbilita skont l-Artikolu 16, l-ewwel paragrafu, il-punt (a), f’konformità mal-Artikolu 16, it-tielet paragrafu. Il-paġna web għandha tinkludi informazzjoni dwar it-tariffi applikabbli għan-numri bla ħlas waqt ir-roaming, jekk ikun hemm.
L-informazzjoni personalizzata bażika dwar il-prezzijiet imsemmija fl-ewwel subparagrafu ta’ dan il-paragrafu għandha tinkludi wkoll in-numru mingħajr ħlas imsemmi fil-paragrafu 2 biex tinkiseb informazzjoni aktar dettaljata.
Għal kull messaġġ, il-klijenti għandu jkollhom l-opportunità li jinnotifikaw lill-fornitur tar-roaming, mingħajr ħlas u faċilment, li ma jeħtiġux il-messaġġ awtomatiku. Klijenti li jinnotifikaw li ma jeħtiġux il-messaġġ awtomatiku għandu jkollhom id-dritt li fi kwalunkwe ħin u mingħajr ħlas jitolbu lill-fornitur tar-roaming biex jerġa’ jipprovdi s-servizz.
Il-fornituri tar-roaming għandhom jipprovdu lill-konsumaturi b’diżabbiltà bl-informazzjoni personalizzata bażika dwar il-prezzijiet msemmija fl-ewwel subparagrafu, b’mod awtomatiku, permezz ta’ telefonata bil-vuċi, mingħajr ħlas, jekk jintalbu dan.
Għajr ir-referenza għal kwalunkwe politika ta’ użu ġust u t-tariffa supplimentari applikata skont l-Artikolu 6, l-ewwel, it-tieni, il-ħames u s-sitt subparagrafi ta’ dan il-paragrafu għandhom japplikaw ukoll kemm għas-servizzi tar-roaming bil-vuċi u SMS użati mill-klijenti tar-roaming meta jkunu qed jikkonettjaw ma’ networks pubbliċi ta’ komunikazzjoni mobbli mhux terrestri nazzjonali jew internazzjonali, u provduti minn fornitur tar-roaming kif ukoll għas-servizzi tar-roaming bil-vuċi u SMS użati mill-klijenti tar-roaming li jkunu qed jivvjaġġaw barra mill-Unjoni u pprovduti minn fornitur tar-roaming.