IARSCRÍBHINN VI Critéir maidir le bearta féinrialála

Oscailteacht na rannpháirtíochta

Ní mór bearta féinrialála a bheith oscailte do rannpháirtíocht aon oibreora a dhéanann táirge a chumhdaítear leis an mbeart féinrialála a chur ar an margadh, lena n-áirítear FBManna agus oibreoirí tríú tír, sa chéim ullmhúcháin agus sa chéim cur chun feidhme araon. Ba cheart d’oibreoirí eacnamaíocha a bhfuil sé ar intinn acu beart féinrialála a bhunú fógra poiblí a dhéanamh go bhfuil sé beartaithe acu déanamh amhlaidh sula dtosaítear ar an mbeart a fhorbairt.

Inbhuanaitheacht agus breisluach

Ní mór do bhearta féinrialála freagairt ar chuspóirí beartais an Rialacháin seo agus ní mór iad a bheith comhsheasmhach leis na gnéithe eacnamaíocha agus sóisialta den fhorbairt inbhuanaithe. Ní mór do bhearta féinrialála cur chuige comhtháite a bheith acu i leith an comhshaol, leasanna na dtomhaltóirí, an tsláinte, cáilíocht saoil agus leasanna eacnamaíocha a chosaint.

Ionadaíochas

Ní mór an earnáil tionsclaíochta agus a gcomhlachais ghaolmhara a ghlacann páirt i mbeart féinrialála a bheith ina léiriú ar thromlach mór den earnáil eacnamaíoch ábhartha, i gcomhréir le hAirteagal 21(3), an chéad fhomhír, pointe (b). Ní mór a áirithiú go n-urramófar dlí iomaíochta an Aontais, go háirithe Airteagal 101 CFAE maidir le comhaontuithe frithiomaíocha.

Cuspóirí cainníochtaithe agus céimneacha

Ní mór na cuspóirí arna sainiú ag na sínitheoirí ina mbearta féinrialála a leagan síos i dtéarmaí atá soiléir, inchainníochtúil agus gan débhrí, ag tosú ó bhunlíne dhea-shainithe. I gcás ina gcumhdaítear tréimhse fhada ama leis an mbeart féinrialála, ní mór spriocanna eatramhacha a áireamh. Ní mór a bheith in ann faireachán a dhéanamh ar chomhlíontacht le cuspóirí agus spriocanna eatramhacha ar bhealach inacmhainne agus inchreidte trí úsáid a bhaint as táscairí soiléire agus iontaofa.

Rannpháirtíocht na sochaí sibhialta

D’fhonn trédhearcacht a áirithiú, ní mór bearta féinrialála a phoibliú, lena n-áirítear ar líne ar shuíomh gréasáin a bhfuil rochtain ag an bpobal air agus a bhfuil rochtain gan bhac air agus trí mhodhanna leictreonacha eile chun faisnéis a scaipeadh.

Tabharfar cuireadh do gheallsealbhóirí, lena n-áirítear na Ballstáit, an earnáil tionsclaíochta, eagraíochtaí comhshaoil neamhrialtasacha agus comhlachais tomhaltóirí, barúil a thabhairt ar bheart féinrialála.

Faireachán agus tuairisciú

Ní mór cigire neamhspleách a roghnú agus a ainmniú chun faireachán a dhéanamh ar a mhéid a chomhlíonann na sínitheoirí an beart féinrialála. Ní mór don bheart féinrialála an cigire neamhspleách a chumhachtú chun comhlíontacht le ceanglais an bhirt féinrialála a fhíorú. Leis an mbeart féinrialála freisin, ní mór a leagan síos an nós imeachta chun an cigire neamhspleách a roghnú agus na rialacha chun a áirithiú go mbeidh an cigire saor ó choinbhleacht leasa agus go mbeidh na scileanna is gá aige chun comhlíontacht leis na ceanglais atá sa bheart féinrialála a fhíorú.

Gach bliain, ní mór do gach sínitheoir an fhaisnéis agus na sonraí uile is gá a thuairisciú chun go mbeidh an cigire neamhspleách in ann comhlíontacht an tsínitheora leis an mbeart féinrialála a fhíorú go hiontaofa.

Ní mór don chigire neamhspleách tuarascáil ar chomhlíonadh a tharraingt suas ag an deireadh de gach tréimhse tuarascála bliana.

I gcás nach gcomhlíonann sínitheoir ceanglais an bhirt féinrialála, ní mór dó gníomhaíocht cheartaitheach a dhéanamh. Tabharfaidh an cigire neamhspleách fógra do na sínitheoirí eile atá rannpháirteach sa bheart féinrialála faoi neamhchomhlíonadh an tsínitheora agus faoin ngníomhaíocht cheartaitheach atá beartaithe ag an sínitheoir a dhéanamh.

Déanfaidh an cigire neamhspleách torthaí aon ghníomhaíochta faireachais margaidh arna déanamh ag údarás faireachais margaidh ar lena linn a sainaithníodh neamhchomhlíonadh cheanglais an bhirt féinrialála a chur i gcuntas, go háirithe sa tuarascáil ar chomhlíonadh, agus déanfar gníomhaíocht cheartaitheach.

A chostéifeachtaí atá sé beart féinrialála a riar

Ní fhéadfaidh an costas atá ar an mbeart féinrialála a riar, go háirithe a mhéid a bhaineann le faireachán a dhéanamh, a bheith ina shiocair le hualach riaracháin díréireach, i gcomparáid lena gcuspóirí agus le hionstraimí beartais eile atá ar fáil.