Airteagal 10 Oibleagáidí allmhaireoirí

1.   Ní chuirfidh allmhaireoirí ach glantaigh nó dromchlaghníomhaithe atá comhlíontach ar an margadh.

2.   Sula gcuirfidh siad glantach nó dromchlaghníomhaí ar an margadh, áiritheoidh allmhaireoirí an méid seo a leanas:

3.   Soláthróidh allmhaireoirí an bhileog sonraí comhábhar sula gcuirfidh siad glantaigh nó dromchlaghníomhaithe úsáideoirí deiridh ar an margadh agus, i gcás inar gá, tabharfaidh siad an bhileog sonraí comhábhar cothrom le dáta, i gcomhréir le hAirteagal 8(6). Coinneoidh an t-allmhaireoir an fhaisnéis sa bhileog sonraí comhábhar faoi rún.

4.   I gcás ina measann allmhaireoirí, nó ina bhfuil cúis acu a chreidiúint, nach gcomhlíonann glantach nó dromchlaghníomhaí an Rialachán seo, ní chuirfidh siad ar an margadh é nó go dtabharfar i gcomhréir é. Thairis sin, i gcás ina bhfuil riosca do shláinte an duine nó don chomhshaol ag baint leis an nglantach nó leis an dromchlaghníomhaí, cuirfidh na hallmhaireoirí an monaróir agus na húdaráis faireachais margaidh ar an eolas faoi sin.

5.   Áiritheoidh allmhaireoirí go gcomhlíonfaidh glantaigh agus dromchlaghníomhaithe a chuireann siad ar an margadh Airteagal 17(1), (3), (4) agus (5), Airteagal 18(1), Airteagal 19(1) agus (2) agus, i gcás inarb infheidhme, Airteagal 17(2), Airteagal 18(2) agus Airteagal 19(3).

6.   Áiritheoidh allmhaireoirí, fad a bheidh glantach nó dromchlaghníomhaí faoina bhfreagracht, nach ndéanfar comhlíonadh an Rialacháin seo a chur i mbaol le dálaí stórála ná iompair.

7.   I gcás ina meastar é a bheith iomchuí maidir le feidhmíocht glantaigh nó dromchlaghníomhaí nó maidir leis na rioscaí a bhaineann leo, déanfaidh allmhaireoirí tástáil shamplach ar na glantaigh agus ar na dromchlaghníomhaithe sin, imscrúdóidh siad gearáin agus, más gá, coimeádfaidh siad clár um ghearáin maidir le glantaigh agus dromchlaghníomhaithe neamh-chomhlíontacha agus maidir le haisghairm na nglantach agus na ndromchlaghníomhaithe sin, agus coimeádfaidh siad dáileoirí ar an eolas faoin bhfaireachán sin.

8.   I gcás ina measann allmhaireoirí nó ina bhfuil cúis acu a chreidiúint nach gcomhlíonann glantach nó dromchlaghníomhaí atá curtha ar an margadh acu an Rialachán seo, cuirfidh siad an monaróir agus na húdaráis inniúla ar an eolas láithreach agus comhoibreoidh siad leo agus déanfaidh siad an beart ceartaitheach is gá láithreach chun an glantach nó an dromchlaghníomhaí a thabhairt i gcomhréir, chun é a tharraingt siar nó chun é a aisghairm, de réir mar is iomchuí. Thairis sin, i gcás ina measann allmhaireoirí nó ina bhfuil cúis acu a chreidiúint go bhfuil riosca do shláinte an duine nó don chomhshaol ag baint le glantach nó le dromchlaghníomhaí atá curtha ar an margadh acu, cuirfidh siad an monaróir agus údaráis náisiúnta inniúla na mBallstát inar chuir siad ar fáil ar an margadh é ar an eolas láithreach ina thaobh sin, agus tabharfaidh siad mionsonraí, go háirithe, faoi aon neamhchomhlíonadh agus faoi aon bheart ceartaitheach a rinneadh.

9.   Áiritheoidh allmhaireoirí go gcoinneofar oibreoirí eacnamaíocha eile sa slabhra soláthair lena mbaineann ar an eolas gan mhoill maidir le haon neamhchomhlíonadh nó aon riosca do shláinte an duine nó don chomhshaol a shainaithin siad agus maidir le haon ghníomhaíocht cheartaitheach, aisghairm nó tarraingt siar dá bharr sin.

10.   Coinneoidh allmhaireoirí an tagairt don aitheantóir táirge uathúil agus don doiciméadacht theicniúil dá dtagraítear in Airteagal 8(2) ar fáil do na húdaráis faireachais margaidh ar feadh tréimhse 10 mbliana ón dáta a cuireadh an glantach nó an dromchlaghníomhaí ar an margadh.

11.   Mar thoradh ar iarraidh réasúnaithe ó údarás náisiúnta inniúil, déanfaidh allmhaireoirí an fhaisnéis agus an doiciméadacht ar fad is gá chun léiriú a thabhairt ar chomhlíonadh an ghlantaigh nó an dromchlaghníomhaí leis an Rialachán seo a chur ar fáil don údarás sin, i bhfoirm leictreonach agus, arna iarraidh sin, i bhfoirm páipéir, i dteanga is féidir leis an údarás sin a thuiscint go héasca. Oibreoidh allmhaireoirí i gcomhar leis an údarás sin, arna iarraidh sin dó, maidir le haon ghníomhaíocht a dhéanfar chun deireadh a chur leis na rioscaí a bhaineann le glantach nó le dromchlaghníomhaí atá curtha ar an margadh acu.

12.   Fíoróidh allmhaireoirí an bhfuil na bealaí cumarsáide dá dtagraítear in Airteagal 8(11) ar fáil go poiblí do thomhaltóirí agus d’úsáideoirí deiridh eile. I gcás nach bhfuil siad ar fáil, déanfaidh na hallmhaireoirí foráil do na bealaí sin, agus riachtanais inrochtaineachta do dhaoine faoi mhíchumas á gcur san áireamh.