Airteagal 16 Ceanglais uileghrúpa

1.   Áiritheoidh máthairghnóthas go mbeidh feidhm ag na ceanglais i leith nósanna imeachta inmheánacha, measúnú riosca agus foirne dá dtagraítear i Roinn 1 den Chaibidil seo i ngach brainse agus fochuideachta den ghrúpa sna Ballstáit, agus i dtríú tíortha, i gcás grúpaí a bhfuil a gceannoifig lonnaithe san Aontas. Chuige sin, déanfaidh an máthairghnóthas measúnú riosca uileghrúpa, agus an measúnú riosca uileghnó a dhéanann gach brainse agus fochuideachta de chuid an ghrúpa á gcur san áireamh, agus déanfaidh siad beartais, nósanna imeachta agus rialuithe uileghrúpa a bhunú agus a chur chun feidhme, lena n-áirítear maidir le cosaint sonraí agus maidir le comhroinnt faisnéise laistigh den ghrúpa chun críocha AML/CFT chun a áirithiú go bhfuil fostaithe laistigh den ghrúpa ar an eolas faoi na ceanglais a eascraíonn as an Rialachán seo. Cuirfidh na heintitis faoi oibleagáid laistigh den ghrúpa na beartais, na nósanna imeachta agus na rialuithe uileghrúpa sin chun feidhme agus a sainiúlachtaí agus na rioscaí ar a bhfuil siad neamhchosanta á gcur san áireamh.

Áireofar na gnéithe uile a liostaítear in Airteagail 9 agus 10 faoi seach,, sna beartais, nósanna imeachta agus rialuithe uileghrúpa agus sna measúnuithe riosca uileghrúpa dá dtagraítear sa chéad fhomhír.

Chun críocha na chéad fhomhíre, i gcás ina bhfuil bunaíochtaí ag grúpa i níos mó ná Ballstát amháin agus, i gcás grúpaí a bhfuil a gceannoifig lonnaithe san Aontas, i dtríú tíortha, cuirfidh máthairghnóthais san áireamh an fhaisnéis arna foilsiú ag údaráis na mBallstát uile nó na dtríú tíortha ina bhfuil bunaíochtaí an ghrúpa lonnaithe.

2.   Bunófar feidhmeanna maidir le comhlíonadh ar leibhéal an ghrúpa. Áireofar ar na feidhmeanna sin bainisteoir um chomhlíonadh ar leibhéal an ghrúpa agus, i gcás ina mbíonn údar cuí leis de bharr na ngníomhaíochtaí a dhéantar ar leibhéal an ghrúpa, oifigeach um chomhlíonadh. Déanfar an cinneadh maidir le méid na bhfeidhmeanna maidir le comhlíonadh a dhoiciméadú.

Tuairisceoidh an bainisteoir um chomhlíonadh dá dtagraítear sa chéad fhomhír go tráthrialta do chomhlacht bainistíochta i gcáil a fheidhme bainistíochta ar an máthairghnóthais maidir le cur chun feidhme na mbeartas, na nósanna imeachta agus na rialuithe uileghrúpa. Ar a laghad, cuirfidh an bainisteoir um chomhlíonadh tuarascáil isteach uair sa bhliain maidir le cur chun feidhme bheartais, nósanna imeachta agus rialuithe inmheánacha an eintitis faoi oibleagáid agus déanfaidh sé na gníomhaíochtaí is gá chun aon easnaimh a sainaithnítear a leigheas ar bhealach tráthúil. I gcás inar comhlacht é an comhlacht bainistíochta i gcáil a fheidhme bainistíochta atá freagrach, i dteannta a chéile, as a chinntí, tabharfaidh an bainisteoir um chomhlíonadh cúnamh agus comhairle dó agus ullmhóidh sé na cinntí is gá chun an tAirteagal seo a chur chun feidhme.

3.   Éileoidh na beartais, nósanna imeachta agus rialuithe i ndáil le faisnéis dá dtagraítear i mír 1 a chomhroinnt ar na heintitis faoi oibleagáid laistigh den ghrúpa faisnéis a mhalartú nuair atá an chomhroinnt sin ábhartha chun críoch díchill chuí do chustaiméirí agus bainistiú riosca a bhaineann le sciúradh airgid agus maoiniú sceimhlitheoireachta. Cumhdófar go sonrach le faisnéis a chomhroinnt laistigh den ghrúpa sainaithint agus céannacht an chustaiméara, a úinéirí tairbhiúla nó an duine a ngníomhaíonn an custaiméir thar a c(h)eann, cineál agus cuspóir na gaolmhaireachta gnó agus na n-idirbheart tráthrialta agus na hamhrais, agus na hanailísí bunúsacha a ghabhann leo, gur fáltais ón ngníomhaíocht choiriúil atá sna cistí nó go mbaineann siad le maoiniú na sceimhlitheoireachta a tuairiscíodh chuig FIU de bhun Airteagal 69, mura dtugann an FIU treoir éigin eile ina leith.

Ní chuirfidh na beartais, nósanna imeachta agus rialuithe uileghrúpa cosc ar na heintitis laistigh de ghrúpa nach eintitis faoi oibleagáid iad chun faisnéis a thabhairt do na heintitis faoi oibleagáid laistigh den ghrúpa céanna i gcás ina bhfuil an chomhroinnt sin ábhartha chun go gcomhlíonfaidh na heintitis faoi oibleagáid na ceanglais a leagtar amach sa Rialachán seo.

Cuirfidh na máthairghnóthais beartais, nósanna imeachta agus rialuithe uileghrúpa ar bun chun a áirithiú go gcuirtear an fhaisnéis a mhalartaítear de bhun na chéad fhomhíre agus an dara fomhír faoi réir ráthaíochtaí leordhóthanacha i dtéarmaí rúndachta, cosanta sonraí agus úsáid na faisnéise, lena n-áirítear lena nochtadh a chosc.

4.   Faoin 10 Iúil 2026, forbróidh AMLA dréachtchaighdeáin theicniúla rialála agus cuirfidh sé faoi bhráid an Choimisiúin lena nglacadh iad. Leis na dréachtchaighdeáin theicniúla rialála sin sonrófar na híoscheanglais a bhaineann le beartais uileghrúpa, nósanna imeachta agus rialuithe, lena n-áirítear íoschaighdeáin don chomhroinnt faisnéise laistigh den ghrúpa, na critéir lena sainaithnítear an máthairghnóthas sna cásanna a chumhdaítear le hAirteagal 2(1), pointe (42)(b), agus na coinníollacha faoina bhfuil feidhm ag forálacha an Airteagail seo maidir leis na heintitis atá i struchtúir ag a bhfuil úinéireacht choiteann, bainistíocht choiteann nó rialú coiteann maidir le comhlíonadh, lena n-áirítear gréasán nó comhpháirtíochtaí, chomh maith leis na critéir lena sainaithnítear an máthairghnóthais san Aontas sna cásanna sin.

5.   Tarmligtear an chumhacht chuig an gCoimisiún an Rialachán seo a fhorlíonadh trí na caighdeáin theicniúla rialála dá dtagraítear i mír 4 den Airteagal seo a ghlacadh i gcomhréir le hAirteagail 49 go 52 de Rialachán (AE) 2024/1620.