Airteagal 160 Dóchúlacht mainneachtana (PD)

Maidir le neamhchosaintí a shanntar do na haicmí neamhchosanta dá dtagraítear in Airteagal 147(2), pointe (b), nó pointe (c)(i), (ii) nó (iii), chun neamhchosaintí a ualaítear ó thaobh riosca agus méideanna caillteanais ionchasaigh na neamhchosaintí sin a ríomh, agus chuige sin amháin, go háirithe chun críocha Airteagail 153 agus 157, agus Airteagal 158(1), (5) agus (10), ní bheidh luach PD a úsáidtear mar ionchur de na méideanna neamhchosanta a ualaítear ó thaobh riosca agus d’fhoirmlí maidir le caillteanas ionchasach níos lú ná an luach seo a leanas: 0,05  %.

Maidir le neamhchosaintí a shanntar do na haicmí neamhchosanta dá dtagraítear in Airteagal 147(2), pointe (aa)(i) nó (ii), chun méideanna neamhchosanta a ualaítear ó thaobh riosca agus méideanna caillteanais ionchasaigh na neamhchosaintí sin a ríomh, agus chuige sin amháin, ní bheidh luach PD a úsáidtear le haghaidh gach neamhchosanta mar ionchur de na méideanna neamhchosanta a ualaítear ó thaobh riosca agus d’fhoirmlí maidir le caillteanas ionchasach níos lú ná an luach seo a leanas: 0,03  %.

I gcás earraí infhaighte corparáideacha ceannaithe nach bhfuil institiúid in ann meastachán a dhéanamh ar PDanna ina leith nó i gcás nach gcomhlíonann meastacháin PD na hinstitiúide do na ceanglais atá leagtha amach i Roinn 6, cinnfear PDanna na ►C9  neamhchosaintí ◄ sin de réir na modhanna seo mar a leanas:

100 % an PD a bheidh ag oibleagáideoirí mainneachtana.

Maidir le neamhchosaint atá cumhdaithe le cosaint creidmheasa neamhchistithe, féadfaidh institiúid a úsáideann a meastacháin LGD féin faoi Airteagal 143 le haghaidh na neamhchosanta atá cumhdaithe le cosaint creidmheasa neamhchistithe agus i gcás neamhchosaintí díreacha inchomparáide ar sholáthraí na cosanta, féadfaidh sí an chosaint creidmheasa neamhchistithe a aithint sa PD i gcomhréir le hAirteagal 183.

I gcás riosca caolúcháin i leith earraí infhaighte corparáideacha ceannaithe, beidh PD cothrom le meastacháin caillteanais ionchasaigh na hinstitiúide ar an riosca caolúcháin. Institiúid a mbeidh cead faighte aici ón údarás inniúil de bhun Airteagal 143 úsáid a bhaint as a meastacháin LGD féin le haghaidh neamhchosaintí ar chorparáidí agus ar féidir léi a meastacháin ar chaillteanas ionchasach le haghaidh riosca caolúcháin earraí infhaighte corparáideacha ceannaithe a mhiondealú ina PDanna agus ina LGDanna ar shlí a measfaidh an t-údarás inniúil a bheith iontaofa, féadfaidh sí úsáid a bhaint as na meastacháin PD a tháinig ón miondealú sin. Féadfaidh institiúidí cosaint creidmheasa neamhchistithe a aithint in PD i gcomhréir le Caibidil 4.

Aon institiúid a mbeidh cead faighte aici ón údarás inniúil de bhun Airteagal 143 a meastacháin LGD féin a úsáid le haghaidh riosca caolúcháin i leith earraí infhaighte corparáideacha ceannaithe, féadfaidh sí cosaint creidmheasa neamhchistithe a aithint trí bhíthin PDanna a choigeartú faoi réir Airteagal 161(3).