4.1 Foilsiú an tsásra um malartuithe

Ba cheart do na húdaráis réitigh tuairisc ardleibhéil ar a gcur chuige a fhoilsiú ar a suíomh gréasáin i leith fhorghníomhú dhíluacháil agus chomhshó na n-ionstraimí caipitil agus na ndliteanas ar féidir a tharrtháil go hinmheánach (“Tuairisc ar an Sásra um Malartuithe”) lena gcuirfí san áireamh gach gné de, ó na céimeanna tosaigh go forghníomhú críochnaitheach an tsásra um malartuithe, agus lena n-áireofaí aon choigeartuithe cinntitheacha luachála ex post, i gcás inarb infheidhme.

Ba cheart go n-áireofaí sa Tuairisc ar an Sásra um Malartuithe an fhaisnéis seo a leanas ar a laghad:

• a. Sainaithint agus tuairisc ar ról na ngeallsealbhóirí a bheidh rannpháirteach i nós imeachta an tSásra um Malartuithe, lena n-áirítear taisclanna lárnacha urrús, bainisteoir speisialta féideartha⁴ , údaráis ábhartha um margaí agus, i gcás inarb ábhartha, aon chomhairleoir malartuithe a bheidh le ceapadh ag an údarás réitigh chun tacú le forghníomhú an tsásra um malartuithe. Ba cheart go mbeadh a gcuid sonraí teagmhála san áireamh leis an tuairisc, i gcás inar féidir.
• b. Cur chuige maidir le scor nó fionraí trádála agus díliostú nó baint ionstraimí ó na hionaid trádála.
• c. Tuairisc shoiléir ar fheidhmiú na hionstraime eatramhaí féideartha, más ann di.
• d. Cur síos ar ionstraimí ábhartha a dhíluacháil agus a chealú, lena n-áirítear réitigh a d’fhéadfadh a bheith ann chun déileáil le hionstraimí nár socraíodh a n-idirbhearta go fóill (“idirbhearta le linn eitilte”).
• e. Tuairisc mhionsonraithe, bíodh is gur táscach í, ar an nós imeachta um chomhshó, lena n-áireofaí ionstraimí nua a sheachadadh i gcás inarb ábhartha, ina bhféadfaí tagairt a dhéanamh do cheann amháin díobh seo a leanas:
• a. Ionstraimí nó dliteanais arna bhfortarrtháil a chomhshó go cothromas nua (“comhshó díreach”);
• b. Ionstraimí nó dliteanais arna bhfortarrtháil lena mbaineann ionstraimí eatramhacha a chomhshó;
• c. meascán den dá rud.
• f. Cur chuige chun aghaidh a thabhairt ar dhifríochtaí a d’fhéadfadh a bheith ann idir luacháil chinntitheach agus luacháil shealadach, amhail cúiteamh i gcás ró-chomhshóite.
• g. Cur chuige chun déileáil le haon scaireanna codánacha.
• h. Amlíne mhionsonraithe, bíodh is gur táscach í, chun na céimeanna thuas a bhaint amach, agus idirdhealú iomchuí á dhéanamh idir:
• a. an timthriall pleanála réitigh,
• b. cur chun feidhme an chinnidh réitigh,
• c. an tréimhse ina gcuirtear an sásra um malartuithe chun feidhme; agus
• d. deireadh an nóis imeachta réitigh.
• i. Teimpléid tháscacha nó príomhghnéithe na n-ionstraimí dlí atá le húsáid chun tarrtháil inmheánach a chur chun feidhme go foirmiúil, i gcás ina bhfuil siad ar fáil.

⁴ Má cheaptar é, i gcomhréir le hAirteagal 35 de Threoir 2014/59/AE.

Sa Tuairisc ar an Sásra um Malartuithe, ba cheart a lua go bhféadfadh forghníomhú iarbhír na nósanna imeachta um dhíluacháil agus comhshó a bheith éagsúil leis an gceann a leagtar amach sa Tuairisc sin.

Ba cheart do na húdaráis réitigh an Tuairisc ar an Sásra um Malartuithe a thabhairt cothrom le dáta, i gcás ina n-athraíonn siad a gcur chuige. Sa Tuairisc ar an Sásra um Malartuithe, ba chóir a lua go soiléir gur doiciméad beo é ar a d’fhéadfaí a nuashonrú tráth ar bith.