1 Prionsabal na comhréireachta a chur i bhfeidhm

Ba cheart do sheirbhíseoirí creidmheasa a méid, a n-eagrúchán inmheánach agus cineál, scála agus castacht a ngníomhaíochtaí a chur san áireamh agus measúnú á dhéanamh ar eolas agus ar thaithí leordhóthanach a n-orgán bainistíochta agus riaracháin ina iomláine agus nuair a bhíonn beartais ghaolmhara agus próisis ghaolmhara á bhforbairt agus á gcur chun feidhme lena n-áirithítear go gcomhlíontar na ceanglais. Ba cheart beartais agus próisis ní ba shofaisticiúla a bheith i bhfeidhm ag seirbhíseoirí creidmheasa a fhreastalaíonn ar phunanna móra creidmheasa nó creidmheasa níos casta, agus ag an am céanna féadfaidh seirbhíseoirí creidmheasa níos lú a sholáthraíonn creidmheas nach bhfuil chomh casta sin beartais agus próisis níos simplí a chur chun feidhme.

Chun prionsabal na comhréireachta a chur i bhfeidhm agus chun cur chun feidhme iomchuí cheanglais rialachais Threoir (AE) 2021/2167 a áirithiú mar a shonraítear a thuilleadh leis na Treoirlínte seo, ba cheart do sheirbhíseoirí creidmheasa agus d’údaráis inniúla na critéir seo a leanas a chur san áireamh:

• a. méid an tseirbhíseora creidmheasa mar a léirítear le líon na foirne;
• b. méid an fhiachais agus líon na gcomhaontuithe seirbhísithe creidmheasa a mbainistíonn an seirbhíseoir creidmheasa iad;
• c. foirm dhlíthiúil an tseirbhíseora creidmheasa;
• d. cibé an bhfuil an seirbhíseoir creidmheasa liostaithe nó nach bhfuil;
• e. cibé an bhfuil nó nach bhfuil an seirbhíseoir creidmheasa ina chuid de ghrúpa atá faoi réir Threoir 2013/36/AE ar bhonn comhdhlúite agus, má tá, an measúnú comhréireachta le haghaidh an ghrúpa;
• f. an ndéantar gníomhaíochtaí trasteorann agus méid na n-oibríochtaí i ngach dlínse;
• g. cineál agus castacht na ngníomhaíochtaí gnó uile a ndéanann an seirbhíseoir creidmheasa iad, mar aon le struchtúr eagraíochtúil an tseirbhíseora creidmheasa; agus
• h. raon feidhme agus castacht na socruithe seachfhoinsithe nó soláthair seirbhíse atá ann cheana le soláthraithe seirbhísí creidmheasa eile.