4.4. Faisnéis faoi na comhlachtaí poiblí sna Ballstáit atá ainmnithe chun gearáin a láimhseáil

Ba cheart d'údaráis inniúla arna n-ainmniú i gcomhréir le hAirteagal 21(3) de Threoir (AE) 2021/2167 ÚBE a chur ar an eolas maidir le cé acu an iad na húdaráis inniúla atá ainmnithe sa dlínse sin freisin chun gearáin faoi sheirbhíseoirí creidmheasa a láimhseáil i gcomhréir le hAirteagal 24(3) den Treoir sin. I gcás inar ainmníodh údaráis inniúla eile sa dlínse sin chun gearáin a láimhseáil, ba cheart do na húdaráis inniúla arna n-ainmniú faoi Airteagal 21(3) de Threoir (AE) 2021/2167 ÚBE a chur ar an eolas dá réir sin. Ba cheart an fhaisnéis maidir le húdaráis inniúla arna n-ainmniú chun gearáin a láimhseáil a tharchur chuig ÚBE tráth nach déanaí ná dáta cur i bhfeidhm na dTreoirlínte seo. I gcás inarb ábhartha, cuirfidh na húdaráis inniúla ÚBE ar an eolas faoi aon athruithe a dhéanfar ina dhiaidh sin ar na húdaráis inniúla agus ar a gcúraimí faoi seach laistigh de sheachtain amháin.

Ba cheart d’údaráis inniúla, atá freagrach i gcomhréir le hAirteagal 9 de Threoir (AE) 2021/2167 as liosta nó clár seirbhíseoirí creidmheasa a fhoilsiú agus a choinneáil ar bun, tagairt do shuíomh gréasáin ÚBE atá tiomnaithe don fhorléargas ar na húdaráis inniúla faoi seach sna Ballstáit atá ainmnithe chun gearáin a láimhseáil a áireamh i gcur i láthair an liosta nó an chláir ar a suíomh gréasáin, ach ní ar an liosta ná ar an gclár féin.