Artikolu 12 Rekwiżiti fejn il-livelli jkunu anqas mill-valuri limitu, mill-valuri fil-mira u mill-għanijiet tal-konċentrazzjoni tal-esponiment medju

1.   F’żoni fejn il-livelli tad-diossidu ta’ sustanzi niġġiesa fl-arja ambjentali jkunu taħt il-valuri limitu rispettivi speċifikati fit-Taqsima 1 tal-Anness I, l-Istati Membri għandhom iżommu l-livelli ta’ dawk is-sustanzi niġġiesa taħt il-valuri limitu.

2.   F’żoni fejn il-livelli ta’ sustanzi niġġiesa fl-arja ambjentali jkunu taħt il-valuri fil-mira rispettivi speċifikati fit-Taqsimiet 1 u 2 tal-Anness I, l-Istati Membri għandhom jieħdu l-miżuri meħtieġa li ma jinvolvux kostijiet sproporzjonati biex iżommu dawk il-livelli taħt il-valuri fil-mira.

L-Istati Membri għandhom jagħmlu sforz biex jiksbu l-għanijiet fit-tul għall-ożonu speċifikati fit-Taqsima 2 tal-Anness I, u, ladarba jintlaħqu, għandhom jagħmlu sforz biex iżommu l-livelli tal-ożonu taħt dawk l-għanijiet fit-tul sa fejn jippermettu fatturi li jinkludu n-natura transkonfini tat-tniġġis tal-ożonu, il-komposti organiċi volatili minn sorsi bijoġeniċi u l-kundizzjonijiet meteoroloġiċi, u sakemm kwalunkwe miżura meħtieġa ma tinvolvix kostijiet sproporzjonati.

3.   F’unitajiet territorjali tal-esponiment medju fejn l-indikaturi tal-esponiment medju għall-PM2,5 u l-NO2 huma taħt il-valur rispettiv tal-għanijiet tal-konċentrazzjoni tal-esponiment medju għal dawk is-sustanzi niġġiesa kif stabbilit fit-Taqsima 5 tal-Anness I, l-Istati Membri għandhom iżommu l-livelli ta’ dawk is-sustanzi niġġiesa taħt l-għanijiet tal-konċentrazzjoni tal-esponiment medju.

4.   L-Istati Membri għandhom jagħmlu sforz biex jiksbu u jippreżervaw l-aħjar kwalità tal-arja ambjentali u livell għoli ta’ protezzjoni tal-ambjent u tas-saħħa tal-bniedem, bil-għan li jinkiseb l-għan ta’ tniġġis żero kif imsemmi fl-Artikolu 1(1), f’konformità mar-rakkomandazzjonijiet tal-WHO, u taħt il-livelli limitu ta’ valutazzjoni stipulati fl-Anness II.