Artikolu 20 Pjanijiet ta’ azzjoni għal żmien qasir

1.   Meta, f’żona partikolari, ikun hemm ir-riskju li l-livell ta’ sustanzi niġġiesa jaqbeż wieħed jew iktar mil-livelli limitu ta’ allert speċifikati fit-Taqsima 4 tal-Anness I, l-Istati Membri għandhom jistabbilixxu pjanijiet ta’ azzjoni għal żmien qasir li jindikaw il-miżuri ta’ emerġenza li għandhom jittieħdu għal perjodu qasir sabiex jitnaqqsu r-riskju jew id-durata ta’ tali qabża.

Madankollu, meta jkun hemm riskju li l-livell limitu ta’ allert fir-rigward tal-ożonu se jinqabeż, l-Istati Membri jistgħu joqgħodu lura milli jistabbilixxu tali pjanijiet ta’ azzjoni għal żmien qasir meta ma jkun hemm l-ebda potenzjal sinifikanti, filwaqt li jitqiesu l-kundizzjonijiet ġeografiċi, meteoroloġiċi u ekonomiċi nazzjonali, li jitnaqqsu r-riskju, id-durata jew il-gravità ta’ tali qabża.

Meta, għall-materja partikolata (PM10 u PM2,5), il-potenzjal li jitnaqqas ir-riskju ta’ tali qbiż ikun limitat ħafna, filwaqt li jitqiesu l-kundizzjonijiet ġeografiċi u meteoroloġiċi lokali u l-ispeċifiċitajiet tas-sistemi tat-tisħin domestiku, l-Istati Membri jistgħu jistabbilixxu pjan ta’ azzjoni għal żmien qasir li jiffoka biss fuq azzjonijiet speċifiċi li jkollhom l-għan li jipproteġu kemm il-pubbliku ġenerali kif ukoll il-popolazzjoni sensittiva u l-gruppi vulnerabbli, kif ukoll informazzjoni li tinftiehem faċilment dwar l-imġiba rakkomandata biex jitnaqqas l-esponiment għall-qbiż imkejjel jew previst.

2.   Meta jistabbilixxu l-pjanijiet ta’ azzjoni għal żmien qasir imsemmija fil-paragrafu 1 ta’ dan l-Artikolu, l-Istati Membri jistgħu, skont il-każ individwali, jipprevedu miżuri effettivi biex jikkontrollaw u, meta jkun meħtieġ, jissospendu temporanjament l-attivitajiet li jikkontribwixxu għar-riskju li jinqabżu l-valuri limitu jew il-valuri fil-mira jew il-livell limitu ta’ allert rispettivi. L-Istati Membri għandhom iqisu wkoll il-lista ta’ miżuri stabbilita fl-Anness IX għall-pjanijiet ta’ azzjoni tagħhom għal żmien qasir, u skont is-sehem tas-sorsi tat-tniġġis ewlenin għall-qabżiet li għandhom jiġu indirizzati, għandhom jikkunsidraw li jinkludu, meta jkun xieraq, f’dawk il-pjanijiet ta’ azzjoni għal żmien qasir miżuri fir-rigward ta’ attivitajiet bħalma huma t-trasport, ix-xogħlijiet ta’ kostruzzjoni, l-installazzjonijiet industrijali, l-agrikoltura u l-użu ta’ prodotti u t-tisħin domestiku. Fil-qafas ta’ dawk il-pjanijiet għandhom jitqiesu wkoll azzjonijiet speċifiċi li jkollhom fil-mira l-protezzjoni tal-popolazzjoni sensittiva u l-gruppi vulnerabbli, inklużi t-tfal.

3.   L-Istati Membri għandhom jikkonsultaw lill-pubbliku f’konformità mad-Direttiva 2003/35/KE, u lill-awtoritajiet kompetenti, li, minħabba r-responsabbiltajiet tagħhom fil-qasam tat-tniġġis tal-arja u l-kwalità tal-arja, x’iktarx li jkunu kkonċernati mill-implimentazzjoni tal-pjanijiet ta’ azzjoni għal żmien qasir, dwar l-abbozzi ta’ pjanijiet ta’ azzjoni għal żmien qasir u kwalunkwe aġġornament sinifikanti tagħhom qabel ma jiġu ffinalizzati.

4.   Meta l-Istati Membri jkunu stabbilew pjan ta’ azzjoni għal żmien qasir, huma għandhom iqiegħdu għad-dispożizzjoni tal-pubbliku u ta’ organizzazzjonijiet xierqa bħalma huma l-organizzazzjonijiet tal-ambjent u tas-saħħa, l-organizzazzjonijiet tal-konsumaturi, l-organizzazzjonijiet li jirrappreżentaw l-interessi tal-popolazzjoni sensittiva u l-gruppi vulnerabbli, l-organizzazzjonijiet li jirrappreżentaw il-professjonisti tal-kura tas-saħħa u korpi rilevanti oħra tal-kura tas-saħħa u l-federazzjonijiet industrijali rilevanti kemm ir-riżultati tal-investigazzjonijiet tagħhom dwar il-fattibbiltà u l-kontenut ta’ pjanijiet ta’ azzjoni speċifiċi għal żmien qasir kif ukoll l-informazzjoni dwar l-implimentazzjoni ta’ dawk il-pjanijiet.

5.   Il-pjanijiet ta’ azzjoni għal żmien qasir għandhom jiġu kkomunikati lill-Kummissjoni fi żmien sena mill-adozzjoni tagħhom fil-qafas tar-rapportar annwali skont l-Artikolu 23.

6.   Meta jkunu qed jistabbilixxu l-pjanijiet ta’ azzjoni tagħhom għal żmien qasir li jindikaw il-miżuri ta’ emerġenza li għandhom jittieħdu, l-Istati Membri jistgħu jitolbu lill-Kummissjoni torganizza skambju tal-aħjar prattiki sabiex l-Istati Membri rikjedenti jkunu jistgħu jibbenefikaw mill-esperjenza ta’ Stati Membri oħra.