Artikolu 6 Kooperazzjoni bejn l-awtoritajiet superviżorji nazzjonali

1.   L-awtoritajiet superviżorji nazzjonali għandhom jiskambjaw, fil-qafas tal-Bord ta’ Kooperazzjoni tal-Awtoritajiet Superviżorji Nazzjonali msemmi fl-Artikolu 18, informazzjoni rilevanti għal awtoritajiet superviżorji nazzjonali oħra, b’mod partikolari informazzjoni relatata mal-ħidma u l-proċess tat-teħid ta’ deċiżjonijiet, l-aħjar prattiki u proċeduri tagħhom fl-applikazzjoni ta’ dan ir-Regolament.

2.   L-awtoritajiet superviżorji nazzjonali għandhom jikkooperaw, meta xieraq, permezz ta’ arranġamenti ta’ ħidma, għall-finijiet ta’ assistenza reċiproka fil-kompiti tagħhom stabbiliti fl-Artikolu 5 u t-trattament ta’ investigazzjonijiet u stħarriġ.

3.   Fil-każ ta’ forniment transfruntier ta’ servizzi tan-navigazzjoni bl-ajru fi spazji tal-ajru li jaqgħu taħt ir-responsabbiltà ta’ żewġ Stati Membri jew aktar, l-Istati Membri kkonċernati għandhom jiżguraw li jiġu konklużi l-ftehimiet meħtieġa għas-superviżjoni ta’ dawk is-servizzi. L-awtoritajiet superviżorji nazzjonali kkonċernati għandhom jiffaċilitaw il-forniment ta’ dawk is-servizzi transfruntieri mill-fornituri tas-servizzi tan-navigazzjoni bl-ajru u jistgħu jistabbilixxu arranġamenti ta’ ħidma jew pjanijiet ta’ sorveljanza xierqa li jispeċifikaw l-implimentazzjoni tal-kooperazzjoni tagħhom.

4.   Fil-każ tal-forniment transfruntier ta’ servizzi tan-navigazzjoni bl-ajru fi spazju tal-ajru li hu fir-responsabbiltà ta’ Stat Membru ieħor, il-ftehimiet imsemmija fil-paragrafu 3 għandhom jipprevedu r-rikonoxximent reċiproku tat-twettiq, minn kull wieħed mill-Istati Membri jew mill-awtoritajiet tagħhom, tal-kompiti stipulati f’dan ir-Regolament u tar-riżultati tat-twettiq ta’ dawn il-kompiti. Għandhom jispeċifikaw ukoll liema awtorità superviżorja nazzjonali għandha tkun inkarigata mill-kompiti stipulati fl-Artikolu 5(1).

5.   Meta jkun permess mil-liġi nazzjonali u bil-għan li jkun hemm kooperazzjoni reġjonali, l-awtoritajiet superviżorji nazzjonali jistgħu wkoll jikkonkludu ftehimiet dwar il-qsim tar-responsabbiltajiet fir-rigward tal-kompiti superviżorji.

6.   Il-ftehimiet imsemmija f’dan l-Artikolu għandhom jiġu notifikati mill-Istati Membri kkonċernati lill-Kummissjoni.