Artikolu 31 Żona tal-imposti u rati unitarji

1.   Ir-rati unitarji għandhom jiġu stabbiliti għal kull sena kalendarja u għal kull żona tal-imposti, abbażi tal-kostijiet iddeterminati u t-tbassir tat-traffiku stabbiliti fil-pjanijiet ta’ prestazzjoni kif ukoll tal-aġġustamenti applikabbli li jirriżultaw mis-snin preċedenti u minn dħul ieħor, b’mod partikolari fondi pubbliċi, inkluż appoġġ finanzjarju minn programmi ta’ assistenza tal-Unjoni.

2.   Mingħajr preġudizzju għall-Artikolu 30(5), l-Istati Membri għandhom jiddefinixxu, qabel il-bidu ta’ perjodu referenzjarju, iż-żoni tal-imposti għas-servizzi tan-navigazzjoni bl-ajru u għandhom jidentifikaw il-fornituri tas-servizzi tat-traffiku tal-ajru li jaqgħu fl-ambitu ta’ kull żona tal-imposti. Il-Kummissjoni għandha tadotta att ta’ implimentazzjoni sabiex tiddefinixxi l-kundizzjonijiet li taħthom l-Istati Membri jistgħu jimmodifikaw jew jistabbilixxu żona ġdida ta’ imposti fit-terminal matul perjodu referenzjarju. Dak l-att ta’ implimentazzjoni għandu jiġi adottat f’konformità mal-proċedura ta’ eżami msemmija fl-Artikolu 48(3).

3.   Ir-rati unitarji għandhom jiġu stabbiliti mill-Istati Membri, u jkunu soġġetti għall-verifika mill-Kummissjoni li jikkonformaw mal-Artikolu 29, l-Artikolu 30 u ma’ dan l-Artikolu.

Meta l-Kummissjoni ssib li rata unitarja ma tissodisfax dawk ir-rekwiżiti, ir-rata unitarja għandha tiġi rieżaminata kif xieraq mill-Istat Membru kkonċernat, u emendata sabiex tissodisfa dawk ir-rekwiżiti.

Ir-rati unitarji għandhom jiġu ppubblikati.

4.   L-Istati Membri jistgħu jiddefinixxu żoni komuni tal-imposti u, f’każijiet bħal dawn, għandhom jistabbilixxu rati unitarji komuni għal dawk iż-żoni tal-imposti.