Artikolu 45 Użu flessibbli tal-ispazju tal-ajru

1.   Filwaqt li jqisu il-karatteristiċi u n-natura ta’ attivitajiet militari f’kull Stat Membru kif ukoll l-organizzazzjoni tal-materji militari taħt ir-responsabbiltà tagħhom, l-Istati Membri għandhom jiżguraw l-applikazzjoni tal-kunċett tal-użu flessibbli tal-ispazju tal-ajru fl-Ajru Uniku Ewropew, biex jiffaċilitaw il-ġestjoni tal-ispazju tal-ajru u l-ġestjoni tat-traffiku tal-ajru fil-kuntest tal-politika komuni tat-trasport u, fejn adatt, b’konsistenza mal-Pjan Regolatorju Ewropew tal-ATM.

2.   Kull sena l-Istati Membri għandhom jirrapportaw lill-Kummissjoni dwar l-applikazzjoni tal-kunċett tal-użu flessibbli tal-ispazju tal-ajru, fil-kuntest tal-politika komuni tat-trasport, fir-rigward tal-ispazju tal-ajru taħt ir-responsabbiltà tagħhom.

3.   Meta, b’mod partikolari fid-dawl tar-rapporti ppreżentati mill-Istati Membri, ikunu meħtieġa kundizzjonijiet uniformi għall-applikazzjoni tal-kunċett tal-użu flessibbli tal-ispazju tal-ajru fl-Ajru Uniku Ewropew, il-Kummissjoni għandha tadotta, fil-limiti tal-politika komuni tat-trasport u mingħajr preġudizzju għall-Artikolu 1(2), atti ta’ implimentazzjoni li jistabbilixxu tali kundizzjonijiet uniformi. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 48(3).

4.   F’każijiet ta’ diffikultajiet operazzjonali sinifikanti fl-applikazzjoni ta’ dan l-Artikolu li jfixklu s-salvagwardja ta’ interessi essenzjali tas-sigurtà jew tad-difiża, l-Istati Membri jistgħu jissospendu temporanjament din l-applikazzjoni bil-kundizzjoni li jinfurmaw mingħajr dewmien lill-Kummissjoni u lill-Istati Membri l-oħra b’dan. Wara l-introduzzjoni ta’ sospensjoni temporanja, jistgħu jiġu żviluppati l-aġġustamenti għar-regoli adottati skont il-paragrafu 3 għall-ispazju tal-ajru taħt ir-responsabbiltà tal-Istat Membru kkonċernat. Is-sospensjoni temporanja u kwalunkwe aġġustament bħal dan għandhom jitneħħew meta dawk id-diffikultajiet operazzjonali ma jibqgħux jeżistu.