4.1 Principles for specifying the range of application of the rating systems

Sistema ta’ klassifikazzjoni fis-sens tal-punt (1) tal-Artikolu 142(1) tar-Regolament (UE) Nru 575/2013 għandha tkopri dawk l-iskoperturi kollha fejn id-debituri jew il-faċilitajiet juru motivaturi komuni tar-riskju u tal-affidabbiltà tal-kreditu u d-disponibbiltà komparabbli b’mod fundamentali ta’ informazzjoni relatata mal-kreditu. Il-mudell tal-PD u tal-LGD fi ħdan sistema ta’ klassifikazzjoni jista’ jinkludi diversi segmenti ta’ kalibrazzjoni. Fejn id-debituri jew l-iskoperturi kollha fil-medda ta’ applikazzjoni tal-mudell tal-PD jew tal-LGD ikunu kalibrati b’mod konġunt, il-kamp ta’ applikazzjoni sħiħ tal-mudell jitqies bħala segment tal-kalibrazzjoni uniku.

Jenħtieġ li l-iskoperturi koperti mill-istess sistema ta’ klassifikazzjoni jiġu trattati b’mod simili mill-istituzzjoni f’termini tal-immaniġġjar tar-riskju, it-teħid ta’ deċiżjonijiet u l-approvazzjoni tal-krediti, u jiġu assenjati għal skala ta’ klassifikazzjoni tad-debituri komuni għall-finijiet tal-Artikolu 170(1)(b) tar-Regolament (UE) Nru 575/2013 u skala ta’ klassifikazzjoni tal-faċilitajiet komuni għall-finijiet tal-Artikolu 170(1)(e) ta’ dak ir-Regolament.

Sabiex issir kwantifikazzjoni ta’ diversi parametri tar-riskju fi ħdan sistema ta’ klassifikazzjoni, jenħtieġ li l-istituzzjonijiet japplikaw l-istess definizzjoni ta’ inadempjenza għall-istess osservazzjonijiet storiċi li ntużaw f’mudelli differenti. Jenħtieġ li l-istituzzjonijiet japplikaw ukoll l-istess trattament ta’ diversi inadempjenzi tal-istess debitur jew skopertura f’sorsi tad-data interna, esterna u aggregata.