6. Measúnú ar an gceanglas íosta maidir le dearlaic chaipitil

Ba cheart d’údaráis inniúla a chinntiú go mbeidh an dearlaic chaipitil sheasta íosta is infheidhme dá dtagraítear in Airteagal 48e(1), pointí (a) nó (b) CRD ag an BTT atá beartaithe tráth a údaraithe, ag brath ar cibé acu atá an BTT is iarratasóir aicmithe faoi aicme 1 nó aicme 2, bunaithe ar mheasúnú foriomlán an údaráis inniúil ar an iarratas i i leith na n-eilimintí atá liostaithe in Airteagal 48a(1) agus (2) de CRD. Ar aon dul leis sin, ba cheart go gcumhdófaí leis an dearlaic chaipitil íosta meán na ndliteanas réamh-mheasta don tréimhse ionchais 3 bliana den phlean gnó.

Ba cheart d’údaráis incháilitheacht na n-ionstraimí lena gcomhdhéantar an dearlaic chaipitil a dheimhniú, go háirithe go bhfuil siad ar fáil lena n-úsáid gan srian agus láithreach ag an BTT chun rioscaí nó caillteanais a chumhdach a luaithe a tharlaíonn na rioscaí nó na caillteanais sin agus go bhfuil siad oiriúnach lena dtaisceadh i gcuntas eascró de réir Airteagal 48e(3) de CRD, de réir na gceanglas atá leagtha amach in Airteagal 48e(2) de CRD agus le Treoirlínte ÚBE maidir leis na hionstraimí lena gcomhlíontar ceanglais don dearlaic chaipitil.

Chuige sin, ba cheart do na húdaráis inniúla athbhreithniú a dhéanamh freisin ar an dréachtchonradh/na dréachtchonarthaí chun na sócmhainní incháilithe a chur i dtaisce i gcuntas eascró i gcomhréir le hAirteagal 48e(3) de CRD. Go sonrach, ba cheart dóibh a fhíorú ‘go bhfuil an cuntas eascró á choinneáil sa Bhallstát inar údaraíodh an brainse le hinstitiúid chreidmheasa nach bhfuil mar chuid de ghrúpa a cheannghnóthais nó, i gcás ina gceadaítear sin faoin dlí náisiúnta, le banc ceannais an Bhallstáit’. Ina theannta sin, agus na híoscheanglais oibríochtúla a leagtar amach i Treoirlínte ÚBE maidir leis na hionstraimí a chomhlíonann ceanglais maidir le dearlaic chaipitil á gcur san áireamh, ba cheart d’údaráis inniúla a mheas go n-áirithítear leis na forálacha conarthacha go gcomhlíontar an ceanglas íosta maidir le dearlaic chaipitil i gcónaí agus infhaighteacht na n-ionstraimí incháilithe sin i gcás réiteach nó foirceannadh an bhrainse tríú tír de réir Airteagal 48e(3) CRD.

Ba cheart d’údaráis inniúla athbhreithniú a dhéanamh ar bhunús dlíthiúil na n-ionstraimí agus go bhfuil socruithe leordhóthanacha i bhfeidhm chun a chinntiú go gcoinnítear iad ar leabhair an BTT.

Ba cheart d’údaráis inniúla a fhíorú go bhfuil na hionstraimí incháilithe a chomhlíonann an ceanglas maidir le dearlaic chaipitil taiscthe sa chuntas eascró ag an gceannghnóthas is iarratasóir. Sa chás nach bhfuil na hionstraimí incháilithe sin taiscthe go páirteach nó go hiomlán fós tráth a gcuirtear isteach an t-iarratas ar údarú, ba cheart d’údaráis inniúla a chinntiú go bhfuil gealltanas tugtha ag an gceannghnóthas is iarratasóir san iarratas ar údarú na n-ionstraimí incháilithe sin a chur i dtaisce ar a dhéanaí roimh an nóiméad a bheidh éifeacht ag an údarú chun BTT a bhunú, nuair a dheonaítear é, i gcomhréir leis an dlí náisiúnta.