CAIBIDIL VI FORÁLACHA CRÍOCHNAITHEACHA

Airteagal 27

Féadfaidh gach Ballstát a chinneadh, tráth ar bith, go nglacfaidh sé le haistriúcháin de EPOCanna agus EPOC-PRanna i dteanga oifigiúil amháin nó níos mó de chuid an Aontais mar aon lena dteanga oifigiúil nó lena dteangacha oifigiúla, agus cuirfidh sé an cinneadh sin in iúl i ndearbhú i scríbhinn arna chur faoi bhráid an Choimisiúin. Cuirfidh an Coimisiún na dearbhuithe ar fáil do na Ballstáit uile agus don Ghréasán Breithiúnach Eorpach.

Airteagal 29

Glacfaidh an Coimisiún gníomhartha tarmligthe i gcomhréir le hAirteagal 30 chun Iarscríbhinní I, II, III, V agus VI a leasú chun aghaidh a thabhairt go héifeachtach ar an ngá a d’fhéadfadh a bheith le feabhsuithe maidir le hinneachar na bhfoirmeacha EPOC agus EPOC-PR agus na bhfoirmeacha a bheidh le húsáid chun faisnéis a sholáthar maidir le dodhéantacht EPOC nó EPOC-PR a fhorghníomhú, chun eisiúint iarrata ar fhianaise a thabhairt ar aird tar éis Ordú Caomhnaithe Eorpach a dheimhniú agus chun síneadh a chur le caomhnú fianaise leictreonaí.

Airteagal 33

Faoin 18 Lúnasa 2029, déanfaidh an Coimisiún meastóireacht ar an Rialachán seo. Tarchuirfidh an Coimisiún tuarascáil mheastóireachta chuig Parlaimint na hEorpa, chuig an gComhairle, chuig an Maoirseoir Eorpach ar Chosaint Sonraí agus chuig Gníomhaireacht an Aontais Eorpaigh um Chearta Bunúsacha. Mar chuid den tuarascáil mheastóireachta sin, beidh measúnú ar chur i bhfeidhm an Rialacháin seo agus ar na torthaí a baineadh amach i dtaobh na gcuspóirí atá leis mar aon le measúnú ar thionchar an Rialacháin seo ar na cearta bunúsacha. Déanfar an mheastóireacht i gcomhréir leis na treoirlínte an Choimisiúin maidir le reachtóireacht níos fearr. Soláthróidh na Ballstáit an fhaisnéis is gá don Choimisiún chun an tuarascáil mheastóireachta a ullmhú.