Airteagal 11 Rochtain gairmithe sláinte ar shonraí leictreonacha pearsanta sláinte

1.   I gcás ina bpróiseálann gairmithe sláinte sonraí i bhformáid leictreonach, beidh rochtain acu ar shonraí leictreonacha pearsanta sláinte ábhartha agus riachtanacha daoine nádúrtha atá faoina gcóireáil, trí na seirbhísí rochtana gairmithe sláinte dá dtagraítear in Airteagal 12, gan beann ar an mBallstát cleamhnachta ná ar an mBallstát ina ndéantar an chóireáil.

2.   I gcás ina bhfuil Ballstát cleamhnachta an duine nádúrtha atá á chóireáil agus an Ballstát ina gcuirtear an chóireáil ar an duine nádúrtha sin éagsúil óna chéile, is tríd an mbonneagar trasteorann dá dtagraítear in Airteagal 23 a sholáthrófar rochtain trasteorann ar shonraí leictreonacha pearsanta sláinte an duine nádúrtha atá á chóireáil.

3.   Áireofar sa rochtain dá dtagraítear i míreanna 1 agus 2 den Airteagal seo ar a laghad na catagóirí tosaíochta de shonraí leictreonacha pearsanta sláinte dá dtagraítear in Airteagal 14.

I gcomhréir leis na prionsabail dá bhforáiltear in Airteagal 5 de Rialachán (AE) 2016/679, bunóidh na Ballstáit rialacha lena bhforálfar do na catagóirí de shonraí leictreonacha pearsanta sláinte a bhíonn inrochtana ag catagóirí éagsúla gairmithe sláinte nó le haghaidh cúraimí cúraim sláinte éagsúla. Cuirfear i gcuntas sna rialacha sin an fhéidearthacht go bhforchuirfí srianta faoi Airteagal 8 den Rialachán seo.

4.   I gcás cóireáil i mBallstát seachas an Ballstát cleamhnachta, beidh sna rialacha dá dtagraítear i mír 3 na rialacha de chuid na mBallstát ina ndéantar an chóireáil.

5.   I gcás ina bhfuil srian curtha ag duine nádúrtha ar rochtain ar shonraí leictreonacha pearsanta sláinte de bhun Airteagal 8, ní chuirfear an soláthraí cúraim sláinte ná an gairmí sláinte ar an eolas faoi shrianta den sórt sin.

De mhaolú ar an gcéad mhír d’Airteagal 8, i gcás inar gá chun leasanna ríthábhachtacha an ábhair sonraí a chosaint, féadfar rochtain ar na sonraí leictreonacha srianta sláinte a dheonú don soláthraí cúraim sláinte nó don ghairmí sláinte. Déanfar cásanna den sórt sin a logáil i bhformáid atá soiléir agus intuigthe agus beidh rochtain éasca ag an ábhar sonraí orthu.

Féadfaidh na Ballstáit foráil a dhéanamh maidir le coimircí breise.