Airteagal 92 Bord maidir leis an Spás Eorpach Sonraí Sláinte

1.   Leis seo bunaítear Bord maidir le Spás Eorpach Sonraí Sláinte (‘Bord EHDS’) chun comhar agus malartú faisnéise a éascú idir na Ballstáit agus an Coimisiún. Beidh Bord EHDS comhdhéanta de bheirt ionadaithe in aghaidh an Bhallstáit, eadhon ionadaí amháin chun críoch úsáide príomhúla agus ionadaí amháin chun críoch úsáide tánaistí, arna n-ainmniú ag gach Ballstát. Beidh vóta amháin ag gach Ballstát. Gabhfaidh comhaltaí Bhord EHDS orthu féin gníomhú ar mhaithe le leas an phobail agus ar bhealach neamhspleách.

2.   Déanfaidh ionadaí ón gCoimisiún agus ceann de na hionadaithe ó na Ballstáit dá dtagraítear i mír 1 comhchathaoirleacht ar chruinnithe Bhord EHDS.

3.   Tabharfar cuireadh do na húdaráis faireachais margaidh dá dtagraítear in Airteagal 43, don Bhord Eorpach um Chosaint Sonraí agus don Mhaoirseoir Eorpach ar Chosaint Sonraí, don Ghníomhaireacht Leigheasra Eorpach, don Lárionad Eorpach um Ghalair a Chosc agus a Rialú agus do Ghníomhaireacht an Aontais Eorpaigh um Chibearshlándáil (ENISA), freastal ar na cruinnithe, i gcás inarb ábhartha, i gcomhréir le Bord EHDA.

4.   Féadfaidh Bord EHDS cuireadh a thabhairt d’údaráis náisiúnta, saineolaithe agus breathnóirí chomh maith le hinstitiúidí, comhlachtaí, oifigí agus gníomhaireachtaí de chuid an Aontais, mar aon leis na cinn dá dtagraítear i mír 3, agus do bhonneagair thaighde agus do bhonneagair chomhchosúla eile freastal ar a chruinnithe.

5.   Féadfaidh Bord EHDS comhoibriú le saineolaithe seachtracha i gcás inarb iomchuí.

6.   Ag brath ar na feidhmeanna a bhaineann le sonraí leictreonacha sláinte a úsáid, féadfaidh Bord EHDS oibriú i bhfoghrúpaí i gcás ábhair áirithe, ina ndéanfar ionadaíocht ar údaráis sláinte digití nó ar chomhlachtaí rochtana sonraí sláinte. Tacóidh na foghrúpaí sin le Bord EHDS maidir le saineolas sonrach agus féadfaidh cruinnithe comhpháirteacha a bheith acu, de réir mar is gá.

7.   Glacfaidh Bord EHDS a rialacha nós imeachta agus a chód iompair, tar éis togra a fháil ón gCoimisiún. Déanfar foráil leis na rialacha nós imeachta sin maidir le comhdhéanamh, eagrú, feidhmiú agus comhar na bhfoghrúpaí dá dtagraítear i mír 6 den Airteagal seo agus maidir le comhar Bhord EHDS leis an bhfóram geallsealbhóirí dá dtagraítear in Airteagal 93.

Déanfaidh Bord EHDS cinntí a ghlacadh trí chomhthoil a mhéid is féidir. Mura féidir teacht ar chomhthoil, déanfaidh Bord EHDS cinntí a ghlacadh bunaithe ar thromlach de dhá thrian de na Ballstáit.

8.   Comhoibreoidh Bord EHDS le comhlachtaí, eintitis agus saineolaithe ábhartha eile, amhail an Bord Eorpach um Nuálaíocht Sonraí arna bhunú le hAirteagal 29 de Rialachán (AE) 2022/868, údaráis inniúla arna n-ainmniú i gcomhréir le hAirteagal 37 de Rialachán (AE) 2023/2854, comhlachtaí maoirseachta arna n-ainmniú i gcomhréir le hAirteagal 46b de Rialachán (AE) Uimh. 910/2014, an Bord Eorpach um Chosaint Sonraí arna bhunú le hAirteagal 68 de Rialachán (AE) 2016/679, comhlachtaí cibearshlándála, lena n-áirítear ENISA, agus an Néal Eorpach maidir leis an Eolaíocht Oscailte, d’fhonn teacht ar réitigh is forbartha i dtreo úsáid sonraí inaimsithe, inrochtana, idir-inoibritheacha agus in-athúsáidte (FAIR) sa taighde agus sa nuálaíocht.

9.   Tabharfaidh rúnaíocht arna soláthar ag an gCoimisiún cúnamh do Bhord EHDS.

10.   Foilseoidh Bord EHDS a dhátaí cruinnithe agus na miontuairiscí ar a phléití agus foilseoidh sé, gach dara bliain, tuarascáil ar a ghníomhaíochtaí.

11.   Glacfaidh an Coimisiún, trí bhíthin gníomhartha cur chun feidhme, na bearta is gá chun Bord EHDS a bhunú agus ar mhaithe lena oibríocht. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 98(2).