Artikolu 92 Bord tal-Ispazju Ewropew tad-Data dwar is-Saħħa

1.   B’dan qed jiġi stabbilit Bord tal-Ispazju Ewropew tad-Data dwar is-Saħħa (il-“Bord tal-EHDS” - European Health Data Space Board) biex jiffaċilita l-kooperazzjoni u l-iskambju ta’ informazzjoni fost l-Istati Membri u l-Kummissjoni. Il-Bord tal-EHDS għandu jkun magħmul minn żewġ rappreżentanti għal kull Stat Membru, jiġifieri rappreżentant wieħed għal għanijiet ta’ użu primarju u wieħed għal għanijiet ta’ użu sekondarju, innominati minn kull Stat Membru. Kull Stat Membru għandu jkollu vot wieħed. Il-membri tal-Bord tal-EHDS għandhom jimpenjaw ruħhom li jaġixxu fl-interess pubbliku u b’mod indipendenti.

2.   Rappreżentant tal-Kummissjoni u wieħed mir-rappreżentanti tal-Istati Membri msemmija fil-paragrafu 1 għandhom jippresjedu flimkien il-laqgħat tal-Bord tal-EHDS.

3.   Awtoritajiet tas-sorveljanza tas-suq imsemmija fl-Artikolu 43, l-EDPB u l-Kontrollur Ewropew għall-Protezzjoni tad-Data, l-Aġenzija Ewropea għall-Mediċini, iċ-Ċentru Ewropew għall-Prevenzjoni u l-Kontroll tal-Mard, u l-Aġenzija tal-Unjoni Ewropea għaċ-Ċibersigurtà (ENISA) għandhom jiġu mistiedna għal-laqgħat, fejn rilevanti skont il-Bord tal-EHDS.

4.   Il-Bord tal-EHDS jista’ jistieden awtoritajiet, esperti u osservaturi nazzjonali kif ukoll istituzzjonijiet, korpi, uffiċċji u aġenziji tal-Unjoni, minbarra dawk imsemmija fil-paragrafu 3, u infrastrutturi tar-riċerka u infrastrutturi simili oħra biex jattendu l-laqgħat tiegħu.

5.   Il-Bord tal-EHDS jista’ jikkoopera ma’ esperti esterni fejn xieraq.

6.   Skont il-funzjonijiet relatati mal-użu ta’ data elettronika dwar is-saħħa, il-Bord tal-EHDS jista’ jaħdem f’sottogruppi għal ċertu suġġetti, li fihom l-awtoritajiet tas-saħħa diġitali jew il-korpi tal-aċċess għad-data dwar is-saħħa għandhom ikunu rrappreżentati. Dawk is-sottogruppi għandhom jappoġġaw lill-Bord tal-EHDS b’għarfien espert speċifiku u jista’ jkollhom laqgħat konġunti, kif meħtieġ.

7.   Il-Bord tal-EHDS għandu jadotta r-regoli ta’ proċedura tiegħu u kodiċi ta’ kondotta, wara proposta mill-Kummissjoni. Dawk ir-regoli ta’ proċedura għandhom jipprevedu l-kompożizzjoni, l-organizzazzjoni, il-funzjonament u l-kooperazzjoni tas-sottogruppi msemmijafil-paragrafu 6 ta’ dan l-Artikolu u l-kooperazzjoni tal-Bord tal-EDHS mal-forum tal-partijiet ikkonċernati msemmija fl-Artikolu 93

Il-Bord tal-EHDS għandu jadotta deċiżjonijiet b’kunsens kemm jista’ jkun. Jekk ma jkunx jista’ jintlaħaq kunsens il-Bord il-Bord tal-EHDS għandu jadotta deċiżjonijiet b’maġġoranza ta’ żewġ terzi tal-Istati Membri.

8.   Il-Bord tal-EHDS għandu jikkoopera ma’ korpi, entitajiet u esperti rilevanti oħra, bħall-Bord Ewropew għall-Innovazzjoni fil-Qasam tad-Data stabbilit bl-Artikolu 29 tar-Regolament (UE) 2022/868, l-awtoritajiet kompetenti maħtura f’konformità mal-Artikolu 37 tar-Regolament (UE) 2023/2854, il-bordijiet superviżorji maħtura f’konformità mal-Artikolu 46b tar-Regolament (UE) Nru 910/2014, il-BEPD stabbilit bl-Artikolu 68 tar-Regolament (UE) 2016/679, il-korpi taċ-ċibersigurtà, inkluż l-ENISA u l-Cloud Ewropew tax-Xjenza Miftuħa, bil-ħsieb li jintlaħqu soluzzjonijiet avvanzati lejn l-użu tad-data traċċabbli, aċċessibbli, interoperabbli u li tista’ tintuża mill-ġdid (FAIR) fir-riċerka u fl-innovazzjoni.

9.   Il-Bord tal-EHDS għandu jkun megħjun minn segretarjat ipprovdut mill-Kummissjoni.

10.   Il-Bord tal-EHDS għandu jippubblika d-dati tal-laqgħat u l-minuti tad-deliberazzjonijiet tiegħu, u jippubblika rapport dwar l-attivitajiet tiegħu kull sentejn.

11.   Il-Kummissjoni għandha tadotta l-miżuri meħtieġa għall-istabbiliment u l-operat tal-Bord tal-EHDS, permezz ta’ atti ta’ implimentazzjoni. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 98(2).