Airteagal 29 Tríú tíortha a bhfuil easnaimh straitéiseacha shuntasacha orthu ina gcórais náisiúnta AML/CFT a shainaithint

1.   Déanfaidh an Coimisiún tríú tíortha a bhfuil easnaimh straitéiseacha shuntasacha orthu ina gcórais náisiúnta AML/CFT a shainaithint agus a ainmniú mar ‘thríú tíortha ardriosca’.

2.   Chun na tríú tíortha dá dtagraítear i mír 1 den Airteagal seo a shainaithint, tugtar an chumhacht don Choimisiún gníomhartha tarmligthe a ghlacadh i gcomhréir le hAirteagal 85 chun an Rialachán seo a fhorlíonadh, i gcás:

Glacfar na gníomhartha tarmligthe sin laistigh de 20 lá féilire ó dheimhníonn an Coimisiún go bhfuil na critéir i bpointí (a), (b) nó (c) comhlíonta.

3.   Chun críocha mhír 2, cuirfidh an Coimisiún san áireamh glaonna ar chur i bhfeidhm beart feabhsaithe díchill chuí agus beart maolaitheach breise (‘frithbhearta’) le heagraíochtaí idirnáisiúnta agus socraitheoirí caighdeán a bhfuil inniúlacht acu sa réimse maidir le cosc a chur ar sciúradh airgid agus maoiniú sceimhlitheoireachta, chomh maith le meastóireachtaí, measúnuithe, tuarascálacha nó ráitis phoiblí ábhartha atá tarraingthe suas acu.

4.   I gcás ina sainaithnítear tríú tír i gcomhréir leis na critéir dá dtagraítear i mír 2, cuirfidh eintitis faoi oibleagáid na bearta feabhsaithe díchill chuí a liostaítear in Airteagal 34(4) i bhfeidhm maidir leis na gaolmhaireachtaí gnó nó na hidirbhearta ócáideacha a bhaineann le daoine nádúrtha nó daoine dlítheanacha ón tríú tír sin.

5.   Sainaithneofar sa ghníomh tarmligthe dá dtagraítear i mír 2, ar na frithbhearta a liostaítear in Airteagal 35, na frithbhearta sonracha lena maolaítear rioscaí sonracha a eascraíonn ó gach tríú tír ardriosca.

6.   I gcás ina sainaithníonn Ballstát riosca sonrach sciúrtha airgid nó maoinithe sceimhlitheoireachta a bhaineann le tríú tír a shainaithin an Coimisiún i gcomhréir leis na critéir dá dtagraítear i mír 2 nach dtugtar aghaidh air leis na frithbhearta dá dtagraítear i mír 5, féadfaidh sé a cheangal ar eintitis faoi oibleagáid atá bunaithe ina chríoch frithbhearta breise sonracha a chur i bhfeidhm chun na rioscaí sonracha a bhaineann leis an tríú tír sin a mhaolú. Cuirfear an riosca a sainaithníodh agus na frithbhearta comhfhreagracha in iúl don Choimisiún laistigh de 5 lá tar éis na frithbhearta a chur i bhfeidhm.

7.   Déanfaidh an Coimisiún athbhreithniú ar na gníomhartha tarmligthe dá dtagraítear i mír 2 ar bhonn rialta lena áirithiú go gcuirfear na hathruithe sa chreat AML/CFT den tríú tír san áireamh sna frithbhearta sonracha a shainaithneofar de bhun mhír 5 agus go mbeidh siad i gcomhréir leis na rioscaí agus leordhóthanach maidir leo.

Ar fhógra a fháil de bhun mhír 6, déanfaidh an Coimisiún measúnú ar an bhfaisnéis a gheofar chun a chinneadh an ndéanann na rioscaí tírshonracha sin difear do shláine mhargadh inmheánach an Aontais. I gcás inarb iomchuí, déanfaidh an Coimisiún athbhreithniú ar na gníomhartha tarmligthe dá dtagraítear i mír 2, trí na frithbhearta is gá a chur leis chun na rioscaí breise sin a mhaolú. I gcás ina measann an Coimisiún nach bhfuil gá leis na bearta sonracha breise arna gcur i bhfeidhm ag Ballstát faoi mhír 6 chun rioscaí sonracha a eascraíonn as an tríú tír sin a mhaolú, féadfaidh sé cinneadh a dhéanamh, trí bhíthin gníomh cur chun feidhme, go gcuirfidh an Ballstát deireadh leis an bhfrithbheart sonrach breise.