Artikolu 15a L-integrazzjoni tal-enerġija rinnovabbli fil-binjiet

Sabiex jiġu promossi l-produzzjoni u l-użu tal-enerġija rinnovabbli fis-settur tal-bini, l-Istati Membri għandhom jiddeterminaw sehem nazzjonali indikattiv tal-enerġija rinnovabbli prodotta fuq il-post jew fil-qrib u kif ukoll enerġija rinnovabbli meħuda mill-grilja tal-konsum finali tal-enerġija fis-settur tal-bini tagħhom fl-2030 li jkun konsistenti ma’ mira indikattiva ta’ sehem ta’ mill-anqas 49 % ta’ enerġija minn sorsi rinnovabbli fis-settur tal-bini fil-konsum finali tal-enerġija tal-Unjoni fil-binjiet fl-2030. L-Istati Membri għandhom jinkludu s-sehem nazzjonali indikattiv tagħhom fil-pjanijiet nazzjonali integrati dwar l-enerġija u l-klima ppreżentati skont l-Artikoli 3 u 14 tar-Regolament (UE) 2018/1999 kif ukoll informazzjoni dwar kif qed jippjanaw li jilħquh.

L-Istati Membri jistgħu jgħoddu s-sħana u l-kesħa mormija mas-sehem nazzjonali indikattiv msemmi fil-paragrafu 1, sa limitu ta’ 20 % ta’ dak is-sehem. Jekk jiddeċiedu li jagħmlu dan, is-sehem nazzjonali indikattiv għandu jiżdied b’nofs il-perċentwal tas-sħana u l-kesħa mormija użati magħduda għal dak is-sehem.

L-Istati Membri għandhom jintroduċu miżuri xierqa fir-regolamenti nazzjonali u fil-kodiċijiet tagħhom dwar il-bini u, meta applikabbli, fl-iskemi ta’ appoġġ tagħhom, biex iżidu s-sehem tal-elettriku u t-tisħin u t-tkessiħ minn sorsi rinnovabbli, prodotti fuq il-post jew fil-qrib kif ukoll enerġija rinnovabbli meħuda mill-grilja fl-istokk tal-bini. Tali miżuri jistgħu jinkludu miżuri nazzjonali relatati ma’ żidiet sostanzjali fl-awtokonsum ta’ enerġija rinnovabbli, il-komunitajiet tal-enerġija rinnovabbli, il-ħżin tal-enerġija lokali, l-irriċarġjar intelliġenti u rriċarġjar bidirezzjonali, servizzi oħra ta’ flessibbiltà bħar-rispons tad-domanda, u flimkien ma’ titjib fl-effiċjenza enerġetika relatat mal-koġenerazzjoni u rinnovazzjonijiet kbar li jżidu l-għadd ta’ bini b’użu ta’ kważi żero enerġija u bini li jmur lil hinn mir-rekwiżiti minimi tar-rendiment fl-użu tal-enerġija previsti fl-Artikolu 4 tad-Direttiva 2010/31/UE.

L-Istati Membri għandhom jiżguraw li l-binjiet pubbliċi fil-livell nazzjonali, reġjonali u lokali, jissodisfaw rwol eżemplari fir-rigward tas-sehem tal-enerġija rinnovabbli użata, f’konformità mal-Artikolu 9 tad-Direttiva 2010/31/UE u l-Artikolu 5 tad-Direttiva 2012/27/UE. L-Istati Membri jistgħu jippermettu li dak l-obbligu jiġi ssodisfat billi, fost l-oħrajn, jipprevedu li s-soqfa ta’ binjiet pubbliċi jew pubbliċi privati mħallta jintużaw minn partijiet terzi għal installazzjonijiet li jipproduċu enerġija minn sorsi rinnovabbli.

Meta jitqies li huwa rilevanti, l-Istati Membri jistgħu jippromwovu l-kooperazzjoni bejn l-awtoritajiet lokali u l-komunitajiet tal-enerġija rinnovabbli fis-settur tal-bini, b’mod partikolari permezz tal-użu tal-akkwist pubbliku.

Sabiex jinkiseb is-sehem indikattiv tal-enerġija rinnovabbli previst fil-paragrafu 1, l-Istati Membri għandhom jippromwovu l-użu ta’ sistemi u tagħmir tat-tisħin u t-tkessiħ rinnovabbli u jistgħu jippromwovu teknoloġija innovattiva, bħal sistemi u tagħmir tat-tisħin u t-tkessiħ elettrifikati, ibbażati fuq sorsi rinnovabbli u intelliġenti, ikkomplementati, meta applikabbli, bil-ġestjoni intelliġenti tal-konsum tal-enerġija fil-binjiet. Għal dak il-għan, l-Istati Membri għandhom jużaw il-miżuri, l-għodod u l-inċentivi xierqa kollha, inklużi, it-tikketti tal-enerġija żviluppati skont ir-Regolament (UE) 2017/1369, iċ-ċertifikati tar-rendiment fl-użu tal-enerġija stabbiliti skont l-Artikolu 11 tad-Direttiva 2010/31/UE, u ċertifikati jew standards xierqa oħra żviluppati fil-livell tal-Unjoni jew nazzjonali, u għandhom jiżguraw l-għoti ta’ informazzjoni u pariri adegwati dwar alternattivi rinnovabbli u effiċjenti ħafna fl-użu tal-enerġija kif ukoll dwar l-istrumenti u l-inċentivi finanzjarji disponibbli għall-promozzjoni ta’ rata ta’ sostituzzjoni akbar ta’ sistemi ta’ tisħin antiki u bidla akbar għal soluzzjonijiet ibbażati fuq l-enerġija rinnovabbli.