Artikolu 19 Mudell ta’ implimentazzjoni

1.   Il-Programm għandu jiġi implimentat, kif xieraq, f’approċċ f’fażijiet sa ma jitlestew l-attivitajiet stabbiliti fl-Artikolu 4. Il-Kummissjoni, f’koordinazzjoni mal-Istati Membri, għandha tiżgura li l-approċċ tal-akkwist jippermetti l-aktar kompetizzjoni wiesgħa possibbli sabiex titrawwem parteċipazzjoni xierqa tal-katina tal-valur industrijali kollha għall-kuntratti relatati mal-forniment tas-servizzi msemmija fl-Artikolu 10(1) u l-kuntratti relatati max-xiri tas-servizzi msemmija fl-Artikolu 10(2).

2.   L-attivitajiet stipulati fl-Artikolu 4 ta’ dan ir-Regolament għandhom jiġu implimentati permezz ta’ diversi kuntratti mogħtija f’konformità mar-Regolament Finanzjarju u l-prinċipji tal-akkwist skont l-Artikolu 20 ta’ dan ir-Regolament u jistgħu jieħdu l-forma ta’ kuntratti ta’ konċessjoni, kuntratti ta’ forniment, ta’ servizz jew ta’ xogħlijiet inkella kuntratti mħallta.

3.   Il-kuntratti msemmija f’dan l-Artikolu għandhom jiġu akkwistati taħt ġestjoni diretta jew indiretta u jistgħu jieħdu l-forma ta’ akkwist interistituzzjonali, kif imsemmi fl-Artikolu 165(1) tar-Regolament Finanzjarju, bejn il-Kummissjoni u l-Aġenzija, fejn il-Kummissjoni għandha tassumi r-rwol ta’ awtorità kontraenti ewlenija.

4.   L-approċċ tal-akkwist imsemmi fil-paragrafu 1 ta’ dan l-Artikolu u l-kuntratti msemmija f’dan l-Artikolu għandhom jikkonformaw mal-atti ta’ implimentazzjoni msemmija fl-Artikoli 9(2), 10(4) u 10(5).

5.   Jekk ir-riżultat tal-approċċ tal-akkwist imsemmi fil-paragrafu 1 ta’ dan l-Artikolu jieħu l-forma ta’ kuntratti ta’ konċessjoni, dawk il-kuntratti ta’ konċessjoni għandhom jistipulaw l-arkitettura tal-infrastruttura governattiva tas-sistema ta’ konnettività sigura, ir-rwoli, ir-responsabbiltajiet, l-iskema finanzjarja u l-allokazzjoni tar-riskji bejn l-Unjoni u l-kuntratturi, billi jittieħed kont tar-reġim ta’ sjieda skont l-Artikolu 6 u l-finanzjament tal-Programm skont il-Kapitolu III.

6.   Jekk ma jingħatax kuntratt ta’ konċessjoni, il-Kummissjoni għandha tiżgura implimentazzjoni ottimali tal-objettiv imsemmi fl-Artikolu 3(1), il-punt (a), billi takkwista, kif xieraq, kuntratt ta’ forniment, ta’ servizz jew ta’ xogħlijiet jew kuntratt imħallat.

7.   Il-Kummissjoni għandha tieħu l-miżuri meħtieġa biex tiżgura l-kontinwità tas-servizzi governattivi jekk il-kuntratturi msemmija f’dan l-Artikolu ma jkunux jistgħu jissodisfaw l-obbligi tagħhom.

8.   Fejn xieraq, il-proċeduri ta’ akkwist għall-kuntratti msemmija f’dan l-Artikolu jistgħu jieħdu wkoll l-forma ta’ akkwisti konġunti mal-Istati Membri, f’konformità mal-Artikolu 165(2) tar-Regolament Finanzjarju.

9.   Il-kuntratti msemmija f’dan l-Artikolu għandhom b’mod partikolari jiżguraw li l-forniment ta’ servizzi bbażati fuq infrastruttura kummerċjali jippreżerva l-interessi essenzjali tal-Unjoni u l-objettivi ġenerali u speċifiċi tal-Programm imsemmija fl-Artikolu 3. Dawk il-kuntratti għandhom jinkludu wkoll salvagwardji adegwati biex jiġi evitat kwalunkwe kumpens żejjed lill-kuntratturi msemmija f’dan l-Artikolu, distorsjonijiet tal-kompetizzjoni, kunflitti ta’ interess, diskriminazzjoni bla bżonn jew kwalunkwe vantaġġ indirett moħbi ieħor. Tali salvagwardji jistgħu jinkludu l-obbligu ta’ separazzjoni tal-kontabilità bejn il-forniment ta’ servizzi governattivi u l-forniment ta’ servizzi kummerċjali, inkluż l-istabbiliment ta’ entità strutturalment u legalment separata mill-operatur integrat vertikalment għall-forniment ta’ servizzi governattivi, u l-forniment ta’ aċċess miftuħ, ġust, raġonevoli u mhux diskriminatorju għall-infrastruttura meħtieġ għall-forniment ta’ servizzi kummerċjali. Il-kuntratti għandhom jiżguraw ukoll li l-kondizzjonijiet tal-Artikolu 22 jiġu ssodisfati matul id-durata kollha tagħhom.

10.   Fejn is-servizzi governattivi u kummerċjali jiddependu fuq sottosistemi jew interfaċċi komuni biex jiżguraw sinerġiji, il-kuntratti msemmija f’dan l-Artikolu għandhom jiddeterminaw ukoll liema minn dawk l-interfaċċi u s-sottosistemi komuni għandhom ikunu parti mill-infrastruttura governattiva sabiex tiġi żgurata l-protezzjoni tal-interessi tas-sigurtà tal-Unjoni u tal-Istati Membri tagħha.