Artikolu 29 Prinċipji għall-iskema ta’ imposti

1.   Mingħajr preġudizzju għall-possibbiltà li l-Istati Membri jiffinanzjaw il-forniment ta’ servizzi tan-navigazzjoni bl-ajru koperti f’dan l-Artikolu permezz ta’ fondi pubbliċi, sa fejn dan ikun konformi mar-regoli tat-Trattat dwar il-kompetizzjoni fejn applikabbli, l-imposti għas-servizzi tan-navigazzjoni bl-ajru għandhom jiġu ddeterminati, imposti u infurzati fuq l-utenti tal-ispazju tal-ajru.

L-iskema ta’ imposti stabbilita skont dan l-Artikolu u l-Artikoli 30 sa 32 għandha tkun konsistenti mal-Artikolu 15 tal-Konvenzjoni ta’ Chicago. Għall-imposti en route, l-iskema ta’ imposti stabbilita skont dan ir-Regolament u l-atti ta’ implimentazzjoni msemmija fl-Artikolu 33 u s-sistema ta’ imposti tal-EUROCONTROL għall-imposti en route għandhom ikunu konsistenti.

2.   L-Artikoli 29 sa 36 ma għandhomx japplikaw għal servizzi tan-navigazzjoni bl-ajru fit-terminal ipprovduti f’ajruporti, li jinsabu fit-territorju tal-Istati Membri li għalihom japplika t-Trattat, b’inqas minn 80 000 movimenti tat-trasport bl-ajru IFR fis-sena. Madankollu, Stat Membru jista’ jiddeċiedi li tali servizzi tan-navigazzjoni bl-ajru fit-terminal ikunu soġġetti għal dawk l-Artikoli.

3.   L-imposti għandhom ikunu bbażati fuq il-kostijiet tal-fornituri tas-servizzi tan-navigazzjoni bl-ajru deżinjati skont l-Artikolu 8 u 10 mġarrba fir-rigward ta’ servizzi u funzjonijiet għall-benefiċċju tal-utenti tal-ispazju tal-ajru tul perjodi referenzjarji fissi kif definit fl-Artikolu 21(3). Dawk il-kostijiet jistgħu jinkludu redditu raġonevoli fuq l-assi.

4.   L-imposti għandhom iħeġġu l-forniment sikur, effiċjenti, effettiv u sostenibbli ta’ servizzi tan-navigazzjoni bl-ajru biex jinkiseb livell għoli ta’ sikurezza u kosteffiċjenza filwaqt li jnaqqsu l-impatt ambjentali tal-avjazzjoni.

5.   Id-dħul riċevut minn fornitur tas-servizzi tan-navigazzjoni bl-ajru deżinjat skont l-Artikoli 8 u 10 minn imposti li jġarrbu l-utenti tal-ispazju tal-ajru f’konformità ma’ dan l-Artikolu ma għandux jintuża biex jiffinanzja servizzi li dak il-fornitur tas-servizzi tan-navigazzjoni bl-ajru jipprovdi bil-kundizzjonijiet tas-suq f’konformità mal-Artikolu 11 jew biex tiġi ffinanzjata kwalunkwe attività kummerċjali oħra minn dak il-fornitur.

6.   Id-data finanzjarja dwar il-kostijiet iddeterminati, il-kostijiet reali u d-dħul relatat tal-fornituri tas-servizzi tan-navigazzjoni bl-ajru deżinjati għandha tiġi rrapportata lill-awtoritajiet superviżorji nazzjonali. Għall-fini li l-Kummissjoni tkun tista’ twettaq il-kompiti tagħha skont dan ir-Regolament, l-awtoritajiet superviżorji nazzjonali għandhom jirrapportaw dik id-data lill-Kummissjoni f’konformità mal-modalitajiet definiti fl-att ta’ implimentazzjoni msemmi fl-Artikolu 33. Id-data finanzjarja dwar il-kostijiet iddeterminati, il-kostijiet reali u d-dħul relatat għandha tkun disponibbli għall-utenti tal-ispazju tal-ajru, u għandha tiġi ppubblikata f’konformità mal-Artikolu 52(3).