Artikolu 58 Proċedura għall-indirizzar tal-imballaġġ li jippreżenta riskju fil-livell nazzjonali

1.   Mingħajr preġudizzju għall-Artikolu 19 tar-Regolament (UE) 2019/1020, meta l-awtoritajiet tas-sorveljanza tas-suq ta' Stat Membru partikolari jkollhom raġuni suffiċjenti biex jemmnu li l-imballaġġ kopert minn dan ir-Regolament jippreżenta riskju għall-ambjent jew għas-saħħa tal-bniedem, huma għandhom, mingħajr dewmien żejjed, iwettqu evalwazzjoni fir-rigward tal-imballaġġ ikkonċernat li tkopri r-rekwiżiti kollha stabbiliti f'dan ir-Regolament li huma rilevanti għal dak ir-riskju. L-operaturi ekonomiċi rilevanti għandhom jikkooperaw kif meħtieġ mal-awtoritajiet tas-sorveljanza tas-suq.

Għall-finijiet tal-ewwel subparagrafu, l-awtoritajiet responsabbli għall-infurzar ta' dan ir-Regolament għandhom isegwu l-ilmenti jew ir-rapporti relatati mal-allegat nuqqas ta' konformità tal-imballaġġ ma' dan ir-Regolament, u jivverifikaw li tkun ittieħdet l-azzjoni korrettiva xierqa.

Meta, matul l-evalwazzjoni mwettqa skont l-ewwel subparagrafu, l-awtoritajiet tas-sorveljanza tas-suq isibu li l-imballaġġ ma jikkonformax mar-rekwiżiti stabbiliti f'dan ir-Regolament, dawn għandhom, mingħajr dewmien, jirrikjedu lill-operatur ekonomiku rilevanti jieħu azzjoni korrettiva xierqa u proporzjonata, f'perjodu preskritt mill-awtoritajiet tas-sorveljanza tas-suq li jkun raġonevoli u proporzjonat man-natura u, meta rilevanti, il-grad tan-nuqqas ta' konformità, biex l-imballaġġ isir konformi ma' dawk ir-rekwiżiti.

2.   Permezz ta' deroga mill-paragrafu 1, meta jkun hemm riskju għas-saħħa tal-bniedem relatat mal-imballaġġ sensittiv għall-kuntatt li jkun soġġett għal liġi speċifika li għandha l-għan li tipproteġi s-saħħa tal-bniedem u dak ir-riskju jiġi ttrasferit għall-kontenut fl-imballaġġ tal-materjal tal-imballaġġ, l-awtoritajiet tas-sorveljanza tas-suq ma għandhomx iwettqu evalwazzjoni fir-rigward tar-riskju għas-saħħa tal-bniedem jew tal-annimali li joriġina mill-materjal tal-imballaġġ. Minflok, għandhom javvertu l-awtoritajiet kompetenti għall-evalwazzjoni ta' tali riskji, b'mod partikolari l-awtoritajiet kompetenti msemmija fir-Regolamenti (UE) 2017/625, (UE) 2017/745, (UE) 2017/746, jew (UE) 2019/6 jew fid-Direttiva 2001/83/KE.

3.   Meta l-awtoritajiet tas-sorveljanza tas-suq iqisu li n-nuqqas ta' konformità ma jkunx limitat għat-territorju tagħhom, huma għandhom jinformaw lill-Kummissjoni u lill-Istati Membri l-oħra bir-riżultati tal-evalwazzjoni u bl-azzjonijiet li talbu lill-operatur ekonomiku jieħu.

4.   L-operatur ekonomiku għandu jiżgura li jittieħdu l-miżuri korrettivi kollha xierqa fir-rigward tal-imballaġġ mhux konformi kollu li l-operatur ekonomiku jkun qiegħed għad-dispożizzjoni fis-suq fl-Unjoni kollha.

5.   Meta l-operatur ekonomiku ma jiħux miżuri korrettivi xierqa fil-perjodu msemmi fil-paragrafu 1, it-tielet subparagrafu, jew jekk jippersisti n-nuqqas ta' konformità, l-awtoritajiet tas-sorveljanza tas-suq għandhom jieħdu l-miżuri proviżorji xierqa kollha biex jipprojbixxu t-tqegħid għad-dispożizzjoni tal-imballaġġ fit-territorju tagħhom, jirtirawh jew isejħuh lura.

L-awtoritajiet tas-sorveljanza tas-suq għandhom jinformaw lill-Kummissjoni u lill-Istati Membri l-oħra b'dawk il-miżuri mingħajr dewmien.

6.   L-informazzjoni li għandha tintbagħat lill-Kummissjoni u lill-Istati Membri l-oħra f’konformità mal-paragrafu 5 ta' dan l-Artikolu għandha tiġi kkomunikata permezz tas-sistema ta' informazzjoni u komunikazzjoni msemmija fl-Artikolu 34 tar-Regolament (UE) 2019/1020 u għandha tinkludi d-dettalji kollha disponibbli, b'mod partikolari d-data meħtieġa għall-identifikazzjoni tal-imballaġġ mhux konformi, l-oriġini tal-imballaġġ, in-natura tal-allegat nuqqas ta' konformità u r-riskju involut, in-natura u d-durata tal-miżuri nazzjonali meħuda u l-argumenti mressqa mill-operatur ekonomiku u, meta jkun applikabbli, l-informazzjoni msemmija fl-Artikolu 61(1) ta' dan ir-Regolament. L-awtoritajiet tas-sorveljanza tas-suq għandhom jindikaw ukoll jekk in-nuqqas ta' konformità huwiex minħabba waħda minn dawn li ġejjin:

7.   L-Istati Membri, barra mill-Istat Membru li jkun qed jieħu l-miżuri skont il-paragrafu 5, għandhom, mingħajr dewmien, jinformaw lill-Kummissjoni u lill-Istati Membri l-oħra dwar kwalunkwe miżura adottata u dwar kwalunkwe informazzjoni addizzjonali għad-dispożizzjoni tagħhom dwar in-nuqqas ta' konformità tal-imballaġġ ikkonċernat, u, jekk l-Istati Membri joġġezzjonaw għall-miżuri meħuda skont il-paragrafu 5, dwar l-oġġezzjonijiet tagħhom.

8.   Meta, fi żmien 3 xhur minn meta tasal l-informazzjoni msemmija fil-paragrafu 5 jew 7, ma tkun tqajmet ebda oġġezzjoni minn xi Stat Membru jew mill-Kummissjoni fir-rigward ta’ miżuri proviżorji meħuda minn Stat Membru, dawk il-miżuri għandhom jitqiesu li jkunu ġustifikati.

L-Istati Membri jistgħu jipprovdu għal perjodu ta’ applikazzjoni itwal jew iqsar għall-miżuri proviżorji minn 3 xhur biex jitqiesu l-ispeċifiċitajiet tar-rekwiżiti kkonċernati.

9.   L-Istati Membri għandhom jiżguraw li l-imballaġġ jiġi rtirat mis-suq tagħhom jew li jittieħdu miżuri restrittivi xierqa oħra mingħajr dewmien fir-rigward tal-imballaġġ jew tal-manifattur ikkonċernat.